ترەنينگتى GISP پەدياترياداعى سيمۋلياتسيا بويىنشا حالىقارالىق توبىنىڭ ۇيلەستىرۋشىسى, دميتري روگاچەۆ اتىنداعى بالالار گەماتولوگياسى, ونكولوگيا جانە يممۋنولوگيا ۇلتتىق مەديتسينالىق زەرتتەۋ ورتالىعىنىڭ اككرەديتتەۋ جانە سيمۋلياتسيا ءبولىمىنىڭ باسشىسى ۋگو لوايسا جۇرگىزدى. وقىتۋ بارىسىندا دارىگەرلەر تەوريالىق بولىممەن تانىستى, پاتسيەنتتەردە تىنىس الۋ جەتكىلىكسىزدىگى كەزىندەگى ءوجج اپپاراتتارى رەجىمدەرىنىڭ پارامەترلەرى مەن سىنىپتامالارىن زەرتتەدى. كۋرسقا قاتىسۋشىلار العان بىلىمدەرىن وقىتۋدىڭ پراكتيكالىق بولىگىندە بەكىتتى, ونىڭ بارىسىندا ناقتى جاعدايلار رەجىمىندە مەديتسينالىق اپپاراتۋرا مەن جابدىقتار قولدانىلدى. ترەنينگ سوڭىندا مانەكەندەردەگى كۇردەلى كلينيكالىق جاعدايلاردىڭ سيمۋلياتسيالىق ستسەناريلەرى پىسىقتالدى. وقىتۋدىڭ بۇل ءتاسىلى مامانداردى پاتسيەنتتەردى باسقارۋدا جەدەل جانە ءتيىمدى شەشىم قابىلداۋ ءۇشىن دايىنداۋعا كومەكتەسەدى.
«بۇل كۋرس بەلسەندى فورماتتا, تالقىلاۋلارمەن جانە ساپالى كەرى بايلانىسپەن ءوتتى. ارتىقشىلىعى, كلينيكالىق ماسەلەلەردى شەشۋدە جاڭا ءبىلىمدى قولدانۋ جانە داعدىلاردى كلينيكادا تىكەلەي دامىتۋ مۇمكىندىگى بولدى. وپەراتسيالار جانە وپەراتسيادان كەيىنگى قالپىنا كەلتىرۋ كەزىندە وكپەنى جاساندى جەلدەتۋ اپپاراتتارى پاتسيەنتتەردىڭ ورنىنا تىنىس الۋدى قولدايدى. سوندىقتان, پاتسيەنتتەردىڭ جاعدايىنا بايلانىستى جابدىقتىڭ پارامەترلەرىن رەتتەي ءبىلۋ ولاردىڭ تەز ساۋىعۋى ءۇشىن ماڭىزدى», دەپ ءبولىستى جۇرەك ورتالىعىنىڭ انەستەزيولوگيا ءبولىمىنىڭ كلينيكالىق-اكادەميالىق ديرەكتورى ايدىن قۋانىشبەك.
رەسپيراتورلىق قولداۋدى وقىتۋ ادىستەمەسى سيمۋلياتسيالىق ترەنينگتەر وتكىزۋگە بىلىكتى نۇسقاۋشىلاردى دايىنداۋعا جانە ولاردىڭ كاسىبي بىلىكتىلىگىن ارتتىرۋعا باعىتتالعان. كۋرس اياقتالعاننان كەيىن قاتىسۋشىلار GISP پەدياترياداعى سيمۋلياتسيا بويىنشا حالىقارالىق توبىنىڭ نۇسقاۋشى رەتىندە كۋرستاردى وتكىزۋ قۇقىعىن بەرەتىن حالىقارالىق سەرتيفيكاتتارىن الدى. ايتا كەتەيىك, جۇرەك ورتالىعىنىڭ ماماندارى ءوز وقۋ بازاسىن قۇرىپ, كلينيكادا رەسپيراتورلىق قولداۋ بويىنشا وسىنداي ترەنينگتەر وتكىزۋدى جوسپارلاپ وتىر.
