دەنساۋلىق ساقتاۋ ءمينيسترى اجار عينياتتىڭ تۇركىستانعا جۇمىس ساپارى بارىسىندا وسىنداي دەرەكتەر ايتىلدى. سونداي-اق مارات پاشيموۆ باسقارىپ وتىرعان وبلىستىق قوعامدىق دەنساۋلىق باسقارماسىنىڭ ناتيجەلى ىستەرى اتاپ ءوتىلدى.
وتكەن جىلدان باستاپ پرەزيدەنت تاپسىرماسى بويىنشا «اڭساعان ءسابي» ارنايى باعدارلاماسى ىسكە قوسىلدى, وندا 2026 جىلعا دەيىن ەكۇ-عا جىل سايىن 7000 كۆوتا ءبولۋ قاراستىرىلعان. وتكەن جىلى تۇركىستان وبلىسىندا 453 كۆوتا ءبولىندى, 62 ايەل جۇكتى بولدى, 106-سى بالا تۋدىڭ باقىتىنا يە بولدى. دەگەنمەن وڭىرگە 200-دەن استام دارىگەر كەرەك. اسىرەسە, كارديولوگ, نەۆروپاتولوگ, رەانيماتولوگ, ونكولوگ, وكۋليست, ينفەكتسيونيست سەكىلدى كادرلار تاپشى.
بۇل ورايدا مينيستر ماسەلەنى شەشۋ ماقساتىندا اتقارىلىپ جاتقان جۇمىستار جونىندە دە باياندادى. مىسالى, ەلىمىزدىڭ جوعارى وقۋ ورىندارىن بىتىرگەن جاستار جۇمىسقا شاقىرىلماق. وتكەن جىلى ەلىمىزدىڭ وڭىرلەرىنە مەديتسينالىق جوعارى وقۋ ورىندارىنىڭ 3000-عا جۋىق تۇلەگى جىبەرىلگەن. ونىڭ ىشىندە تۇركىستان وبلىسىنا 180 قىزمەتكەر كەلگەن. ال بيىل 170 تۇلەكتى جىبەرۋ جوسپارلانىپ وتىر. اۋىلعا كەلگەن جاس مامانداردى الەۋمەتتىك قولداۋ شارالارى دا قاراستىرىلادى. وتكەن جىلى 225 مامان كوتەرمە جاردەماقى السا, 183 مامان تۇرعىن ۇيمەن, 92 مامان باسقا دا الەۋمەتتىك قولداۋ شارالارىمەن قامتاماسىز ەتىلگەن. تۇركىستان وبلىسىندا 25 مامان كوتەرمە جاردەماقىعى يە بولعان.
