الايدا مىندەتتەلگەن كىتاپتار ءتىزىمى نەمەسە «كىتاپ وقيىق» دەگەن سيپاتتاعى ناۋقاندىق اكتسيالار ارقىلى بۇكىل بالانىڭ وقۋعا دەگەن ىنتاسى بىردەن ارتىپ كەتۋى ەكىتالاي. بۇل جەردە مۇعالىم مەن وقۋشى, اتا-انا مەن بالا اراسىنداعى ءتۇرلى ىنتالاندىرۋ, قىزىقتىرۋ تاسىلدەرى, كەي جاعدايلاردا ءماجبۇرلى ىنتالاندىرۋ امالدارى دا قاجەت.
سونداي ءماجبۇرلى قىزىقتىرۋدىڭ (ىنتالاندىرۋدىڭ) ءبىر جولى مۇعالىمنىڭ وقۋشىلارعا وزدەرى تاڭداعان تاقىرىپتار بويىنشا زەرتتەۋ سيپاتىنداعى جوبالاردى كوبىرەك ۇسىنۋى بولار ەدى دەپ بىلەمىز. ويتكەنى, مۇعالىمنەن تاپسىرما رەتىندە ءبىر تاقىرىپتى الىپ, ونى زەرتتەۋگە ۇڭىلگەن بالانىڭ ول ماسەلە جونىندە كوبىرەك ىزدەنۋىنە تۋرا كەلەدى. مۇعالىمنەن, اتا-اناسىنان سۇرايدى, ىزدەنەدى. وسى كەزدە دۇرىس قولداۋ كورسەتىلسە, قاجەتتى كىتاپتارعا, رەسۋرستارعا باعىت-باعدار بەرىلسە, ىزدەنىس بارىسىندا انىقتالعان جايتتار بالانى قىزىقتىرۋ مۇمكىن. ءسويتىپ قىزىققان تاقىرىپ جونىندە قالاي تەرەڭىرەك بىلۋگە بولاتىنىنا كوزى جەتىپ, وقۋعا دەگەن قۇشتارلىعى دا ويانادى. ياعني, كىتاپ وقۋعا دەگەن ىنتاسىن عىلىمي زەرتتەۋگە دەگەن قىزىعۋشىلىعى ارقىلى وياتۋعا بولادى. ءبىز بۇعان ەلىمىزدىڭ بىرقاتار وڭىرلەرىندە «وقۋعا قۇشتار مەكتەپ» جوباسىن قولداۋ ماقساتىندا سەمينار-ترەنينگتەر وتكىزگەن كەزىمىزدە ناقتى كوز جەتكىزدىك. اتالعان سەمينارلار مۇعالىمدەر مەن وقۋشىلارعا الەمدىك دەڭگەيدەگى عىلىمي-تانىمدىق, زەرتتەۋ رەسۋرستارىن وقۋ پروتسەسىندە, عىلىمي جوبالار ازىرلەۋدە قالاي دۇرىس قولدانۋعا بولاتىنىن ناقتى مىسالدارمەن كورسەتۋگە باعىتتالعان ەدى. سوعان وراي مۇعالىمدەرمەن قاتار, وقۋشىلاردىڭ دا زور قىزىعۋشىلىعىن تۋدىردى. بىراق وكىنىشكە قاراي, اۋىل مەكتەپتەرىنىڭ قازىرگى زامانعى فوتو-بەينە تۇسىرىلىمدەرگە سۇيەنگەن, الەمدىك دەڭگەيدەگى عىلىمي-زەرتتەۋلەردى ۇسىناتىن رەسۋرستار قولجەتىمسىز. كوپشىلىگى ونداي رەسۋرستار بار ەكەندىگىنەن دە بەيحابار.
وسى رەتتە, ءبىر ماسەلەنى دە ايتپاي كەتۋگە بولماس. وڭىرلەردەگى وتاندىق كاسىپورىنداردىڭ كوپشىلىگى قازىر بيزنەستىڭ الەۋمەتتىك جاۋاپكەرشىلىگى اياسىندا بالاباقشا, سپورت كەشەنىن سالۋ نەمەسە بالالاردى قىدىرتۋ سياقتى ءتۇرلى ءىس-شارالارعا قارجى جۇمساپ جاتادى. بىراق ءدال وسى اۋىلدىق مەكتەپتەرگە قاجەتتى ءبىلىم رەسۋرستارىن, كەرەكتى كىتاپ-جۋرنالداردى قولجەتىمدى ەتۋ ىسىنە كوڭىل بولەتىندەرى جوقتىڭ قاسىندا. بىلەتىنىمىز, پرەزيدەنتتىڭ «وقۋعا قۇشتار مەكتەپ» باستاماسىن «تەڭىزشەۆرويل» كومپانياسىنىڭ قولداپ, اتىراۋ قالاسى مەن اتىراۋ وبلىسى جىلوي اۋدانى مەكتەپتەرىن مەرزىمدى باسىلىمدارعا, سونىڭ ىشىندە National Geographic جۋرنالىنا جازىلۋىنا دەمەۋشىلىك ەتكەنى. اتالعان كومپانيانىڭ وسى ءىسى وزگە كاسىپورىندارعا دا ۇلگى بولىپ, بيزنەستىڭ الەۋمەتتىك جاۋاپكەرشىلىگى اياسىنداعى ينۆەستيتسيالارىن اۋىل مەكتەپتەرىنىڭ ءبىلىم ساپاسىن كوتەرەتىن ءىس-شارالارعا باعىتتاسا, نۇر ۇستىنە نۇر بولار ەدى دەپ ويلايمىز.
ورازالى كارىمباي
ساراپشى
