استانالىقتار اۋەزدى ءان تىڭداپ, ونەردەن ەستەتيكالىق ءلاززات الۋ ءۇشىن كوبىنەسە ە.راحماديەۆ اتىنداعى مەملەكەتتىك اكادەميالىق فيلارمونياعا بارىپ جاتادى. اسىرەسە, فيلارمونيا ءسوليسى سايدا قالىقوۆانىڭ كورەرمەنى كوپ دەسەدى. القيسسا. مۋزىكانت, سازگەر سايدا قالىقوۆا اتالعان ونەر ۇجىمىندا كوپتەن بەرى ەڭبەك ەتەدى. «بولاشاق» حالىقارالىق باعدارلاماسىمەن وقىعان ول فلورەنتسيا (يتاليا) قالاسىنداعى Conservatorio Luigi Cherubini ۋنيۆەرسيتەتىندە ماگيستراتۋرانى ۇزدىك ديپلوممەن تامامداعان. سونداي-اق د.د.شوستاكوۆيچ اتىنداعى سانكت-پەتەربۋرگ قالاسىنداعى اكادەميالىق فيلارمونياسىنىڭ دا بەلدى ونەرپازى. سايدا تىڭداۋشىسىن ءوزىنىڭ ەرەكشە تالانتىمەن ءھام فورتەپيانو اسپابىندا اسقان ورىنداۋشىلىق شەبەرلىگىمەن تاڭقالدىرىپ, «قازاقستاننىڭ 100 جاڭا ەسىمى» جوباسىنا ەندى. زاعيپ سازگەردىڭ تالابى مەن تالانتىنا كوز الدىنداعى تاس تۇنەك ەشقاشان كەدەرگى بولعان ەمەس.
«مەن بالا كەزىمنەن مۋزىكاعا اۋەسپىن. التى جاسىمدا اتا-اناما ەشتەڭە ايتپاستان, ءوز بەتىممەن مۋزىكا پەداگوگىنا جازىلدىم. اۋىر دەرتتىڭ سالدارىنان قوس جانارىم كورۋدەن قالسا دا, مۋزىكامەن اينالىسۋدى جالعاستىردىم. نوتانى كوزبەن ەمەس, جۇرەكپەن جاتتادىم. اۋەن مەن اۋەز – مەنىڭ ءومىرىم. سونىڭ ارقاسىندا جاڭا بەلەستەردى باعىندىرىپ, ءتۇرلى كونتسەرتتىك الاڭداردا ونەر كورسەتىپ ءجۇرمىن», دەيدى سايدا قالىقوۆا.
ول العاشقى شىعارماسىن 15 جاسىندا جازعان. «جاڭبىردان كەيىن» كومپوزيتسياسى اق جاۋىننان كەيىنگى تابيعاتتىڭ تاماشاسىن اندەتەدى.
ايتا كەتەيىك, بۇگىندە سازگەر 20-عا جۋىق مۋزىكالىق شىعارمالاردىڭ اۆتورى, 100-دەن استام كلاسسيكالىق مۋزىكانىڭ ۇزدىك شىعارمالارىن جاتقا ورىندايدى. قازاقستاندا عانا ەمەس, رەسەيدە, يتاليادا, تۇركيا مەن رۋمىنيادا ونداعان كونتسەرت وتكىزدى.
ودان بولەك سايدا قالىقوۆا حالىقارالىق بايقاۋلارعا قاتىسىپ, قايىرىمدىلىق ءىس-شارالارىنا دا ءجيى اتسالىسادى. ال شىعارماشىلىقتا رەپەرتۋارىن ۇنەمى جاڭارتىپ وتىرۋعا تىرىسادى.
ەسكە سالساق, مۋزىكانتتىڭ ەلوردالىق مەملەكەتتىك فيلارمونيا ساحناسىندا شىعارماشىلىق جولىنىڭ جيىرما جىلدىعىنا ارنالعان كونتسەرتى ءوتتى. ەندىگى ماقسات – لوندونداعى البەرت-حولل, موناكوداعى فيلارمونيا ساحناسى. تالانتتى سازگەردىڭ ارمانىنا تىلەكشىمىز.
