الايدا بالا ۇيىنە قايتارىلعانىمەن ەكى كۇننەن كەيىن قايتا قاشقان. «ارقادا قىس جايلى بولسا ارقار اۋىپ نەسى بار» دەمەكشى, ۇيىندەگى جاعدايى جايلى بولسا, بالا دا ۇيىنەن كەتپەس ەدى. يۋۆەنالدىق پوليتسيا بۇل جاعىنا اسا ءمان بەرمەگەن سياقتى. تەك ىزدەستىرۋ شارالارىنا قايتا كىرىسكەن.
قىزىلجار تۇرعىندارىنىڭ اپتاپ ىستىقتان پانالايتىن جالعىز جەرى – قالا ماڭىنداعى «پەسترىي» كولى. وسى كولدىڭ جاعاجايىندا حالىق قاپتاپ جۇرەدى. يۋۆەنالدىق پوليتسيا 12 جاسار قاشقىندى وسى جاعاجايدى ءسۇزىپ ءجۇرىپ تاپقان. بالا تاعى دا ۇيىنە قايتارىلدى, بىراق بۇل جولى قاشانعا دەيىن اتا-اناسىمەن بىرگە تۇرارى بەلگىسىز...
«پەسترىي» كولىنىڭ جاعاجايىن ءسۇزىپ, ۇلكەندەردىڭ باستاۋىنسىز جۇرگەن بالا اتاۋلىنى قاققان پوليتسەيلەر باسقا دا «جوعالعان بالالارعا» تاپ بولدى. ەلىمىزدىڭ وڭتۇستىگىندەگى تۇركىستان وبلىسىنان سولتۇستىككە «سەرۋەندەۋگە» كەلگەن كامەلەتكە تولماعان 4 بالا دا وسى جاعاجايدا راحاتتانۋدا ەكەن. بۇلاردى دا اتا-انالارى جوعالتىپ, پوليتسياعا ىزدەۋگە بەرىپتى. «سەرۋەندەۋشى سەرىلەردىڭ» جاستارى 16-دان اسپاعان. بىزدە جەكە باستى كۋالاندىراتىن قۇجات 16 جاستان بەرىلەدى عوي, مىنالاردىڭ جولعا بيلەت الۋ ءۇشىن كۋالىكتەرى بولعان سياقتى. ال اقشانى قايدان العانى بەلگىسىز. اتا-اناسىن الاڭداتىپ, مۇنداي سەرۋەنگە شىققاندار اقشا تابۋدىڭ كريمينالدىق جولىن ىزدەيتىندىگى دە حاق. دەمەك, تالاي ادامنىڭ قالتاسىنا ءتۇسىپ نەمەسە ءسال قاراۋسىز قالعان دۇنيەلەرىن قاقشىپ جۇرگەندەرى دە كۇمان تۋعىزباس...
«قازىر تورتەۋى دە كامەلەتكە تولماعانداردى بەيىمدەۋ ورتالىعىنا جەتكىزىلدى, اتا-انالارىنا ولاردىڭ جۇرگەن جەرى تۋرالى حابارلاندى», دەيدى پەتروپاۆل قالاسى پب جپق ءبولىمىنىڭ باستىعى, پوليتسيا مايورى رۋستام سادۋلوۆ.
سونىمەن بىرگە جاسوسپىرىمدەر تاراپىنان تىركەلگەن قىلمىستارعا بۇلاردىڭ قاتىستىلىعى دا انىقتالاتىن شىعار. ءبىر جوقتىڭ ارقاسىندا تابىلعان كوپ جوقتىڭ بولاشاق تاعدىرى تۋرالى اتا-انالارىنا وي سالارلىق تاربيە جۇمىستارى دا جۇرگىزىلۋى كەرەك-اق...
پەتروپاۆل
