وزەكتى ماسەلەنى سەمەيگە كەلگەن پارلامەنت ءماجىلىسى دەپۋتاتتارىنىڭ الدىندا جەرگىلىكتى بەلسەندىلەر تاعى دا كوتەردى. ماسەلەن, قوعام بەلسەندىسى, Amanat پارتياسىنىڭ مۇشەسى ۆلاديمير ءحاليننىڭ پىكىرىنە سۇيەنسەك, وڭىردەگى گازداندىرۋ ماسەلەسى 2013 جىلدان بەرى ايتىلىپ كەلەدى. الايدا وسى ۋاقىتقا دەيىن سەڭ قوزعالار ەمەس.
«اتالعان ماسەلەنىڭ پارلامەنت پەن ۇكىمەتتىڭ دەڭگەيىندە تالقىلانعانىن, سونداي-اق سەمەي مەن شىعىس قازاقستاندا گازداندىرۋدى پىسىقتاۋ جونىندەگى كوميسسيا قۇرىلىپ, گاز تاراتىلاتىن جەلىنىڭ ءبىر بولىگى پاۆلودارعا دەيىن جالعاساتىنى تۋرالى حاباردارمىز. وسى ماقساتتا كوگىلدىر وتىندى تاراتۋدىڭ بىرنەشە باعىتى ازىرلەنگەنى ءمالىم. اتاپ ايتقاندا, ورتالىق قازاقستاننان تارتۋ مۇمكىندىگى قاراستىرىلعان ەدى. الايدا ونىڭ شىعىنى كوپ. زايسان جاقتان دا گازعا قوسىلۋعا بولادى, بىراق وندا قاجەتتى وتىننىڭ قورى از. ءۇشىنشى نۇسقا – رەسەيدەگى التاي ءوڭىرىن گازداندىرىپ وتىرعان ۆەسەلويار قۇبىرىنا قوسىلۋ», دەدى ۆ.حالين.
قوعام بەلسەندىسى قالانىڭ ەكولوگيالىق احۋالى كوڭىل كونشىتپەيتىنىن جانە جىلۋ قازاندىقتارىنان اۋاعا شىعىپ جاتقان زياندى قالدىقتىڭ كولەمى ەداۋىر ەكەنىن جەتكىزدى. بۇل رەتتە قازاقستان 2060 جىلعا قاراي كومىرتەگىنەن تولىق ارىلۋدى كوزدەپ وتىرعانىن ايتا كەتكەن ورىندى. سول سەبەپتى جاڭا قازاقستاندا وسىنداي تۇيتكىلدى ماسەلەلەر ءوز شەشىمىن تابۋ كەرەك دەپ سانايدى جەرگىلىكتى قوعامدىق ۇيىم وكىلدەرى.
«بۇل ماسەلەنى ءبىز مىندەتتى تۇردە قاراستىرىپ, ارىپتەستەرىمىزبەن اقىلداسامىز. ونى شەشۋدىڭ جولدارىن پىسىقتاۋ قاجەت. اتالعان باعىتتا ۇكىمەتپەن بىرلەسىپ, بارلىق ىقتيمال جوبانى جيناقتاپ, ۇسىنىستاردى جەتكىزەمىز», دەدى پارلامەنت ءماجىلىسىنىڭ دەپۋتاتى ءامىرحان راحىمجانوۆ.
بۇدان بولەك, وڭىردەگى تاعى ءبىر قوردالانعان پروبلەمالاردىڭ ءبىرى – ابدەن توزىعى جەتكەن جولدار ماسەلەسى. ءماجىلىس دەپۋتاتتارى وبلىستىڭ شالعاي ەلدى مەكەندەرىنە ساپار شەگىپ, راسىمەن دە جول ينفراقۇرىلىمى ءجىتى كوڭىلدى قاجەت ەتەتىنىن مويىندادى.
«اباي, اقسۋات, كوكپەكتى جانە كاتونقاراعاي اۋداندارى مەن كۋرچاتوۆ قالالارىن ارالاپ قايتتىم. جول ماسەلەسىنىڭ وزەكتىلىگى ارتىپ تۇرعانىن بايقادىم. دەسە دە سەڭ قوزعالدى دەپ ايتۋعا بولادى. البەتتە, قالعان ۋاقىتتىڭ ىشىندە 405 شاقىرىم جولدى جوندەۋ مۇمكىن ەمەس. مايقاپشاعايدان زايسانعا قاراي, سول سەكىلدى كوكپەكتىدەن قالباتاۋعا دەيىنگى جولدى جوندەۋ باستالىپ كەتتى. الايدا اقسۋاتتان باستاپ كوكپەكتىگە دەيىنگى جول ۋچاسكەسىندە ادام اياعى باسپاعانى كورىنىپ تۇر. ەگەر دە بيىل كەم دەگەندە 100 شاقىرىمداي جولدى جوندەپ وتسە, ونىڭ ءوزى جامان ەمەس», دەدى ءا.راحىمجانوۆ.
ال جانات وماربەكوۆا ايتقانداي, سەمەي ەلىمىزدىڭ مادەني جانە تاريحي ورتالىعى سانالاتىندىقتان قالاداعى كونەدەن سىر شەرتەتىن ارحيتەكتۋرالىق نىسانداردى ساقتاپ, قالپىنا كەلتىرۋگە كوڭىل ءبولۋ كەرەك.
«مادەنيەت مينيسترلىگىمەن بىرلەسىپ, قالاداعى تاريحي عيماراتتاردى ساقتاۋ ماسەلەسىن كوتەردىك. ويتكەنى سەمەي ءوزىنىڭ تاريحي مۇرالارىمەن ايگىلى. سەمەيلىكتەردىڭ قوقىس ۇيىندىلەرىنە بايلانىستى شاعىمدانىپ جاتقانىن بىلەمىز. ايتالىق, مۇنداي كورىنىستى ساياباقتار مەن ۇيلەردىڭ جانىنان وتكەندە بايقاۋعا بولادى. بۇل ورايدا تازالىقتى اركىم وزىنەن باستاپ, بالالارعا ۇلگى كورسەتە ءبىلۋ كەرەك», دەدى ءماجىلىس دەپۋتاتى.
اباي وبلىسى
