پرەزيدەنت قاسىم-جومارت توقاەۆ بيىلعى 11 قاڭتاردا پارلامەنت ءماجىلىسىنىڭ وتىرىسىندا سويلەگەن سوزىندە: «جالپى, بارىمىزگە ءبىلىم تۋرالى كوزقاراسىمىزدى وزگەرتۋ قاجەت. گۋمانيتارلىق ماماندىقتارمەن اۋەستەنۋ كەزەڭى كەلمەسكە كەتتى. باسىمدىقتى تەحنيكالىق ماماندىقتارعا بەرۋ كەرەك. ينجەنەرلەر مەن ونەركاسىپشىلەردىڭ جاڭا بۋىنىن ءوسىرىپ شىعارۋ قاجەت», دەپ تەحنيكالىق ماماندىقتاردىڭ ماڭىزىن اتاپ وتكەن بولاتىن. وسىعان وراي تەحنيكالىق ماماندىقتارعا بولىنەتىن گرانت سانى 60 پايىزعا وسكەن. باتىس وڭىرلەردەگى تۇلەكتەر ءۇشىن 10 مىڭ گرانت قاراستىرىلعان. سونىمەن قاتار ۋنيۆەرسيتەت عىلىمىن نىعايتۋ, عىلىمي ناتيجەلەردى كوممەرتسيالاندىرۋ بويىنشا ناقتى مىندەتتەر قويىلدى. الداعى ۋاقىتتا گرانتتىق قارجىلاندىرۋ ارقىلى جوو عىلىمىنا مەملەكەتتىك قولداۋ كورسەتىلەدى.
– ۋنيۆەرسيتەت جۇمىس بەرۋشىلەرمەن, حالىقارالىق دەڭگەيدەگى كوشباسشىسى كاسىپورىندارمەن تىعىز بايلانىس ورناتقان. ءبىزدىڭ تۇلەكتەرىمىز ERG, Volkswagen, Simens, Microsoft, Rosneft, روساتوم, Kazatomprom, «سامۇرىق-قازىنا», «تمك», ء«ۇمز», «كازمينەرالس», Kazzinc, سياقتى ءىرى كومپانيالاردا جۇمىس ىستەيدى. جۇمىسقا ورنالاسۋ كورسەتكىشى 96 پايىزدى قۇراپ وتىر دەيدى, – ساۋلە جادىگەرقىزى.
كەيىنگى كەزدە وقۋشىلاردىڭ تەحنيكالىق ماماندىقتارعا قىزىعۋشىلىقتارى تومەندەپ كەتكەنى جاسىرىن ەمەس. الايدا ولار تەحنيكالىق ءبىلىم العان ازاماتتار جۇمىسسىز قالمايتىنىن, جالاقىسى جوعارى كاسىپورىنداردا قىزمەت ەتۋگە مۇمكىندىكتەرى مول ەكەنىن ەسكەرگەنى ءجون. بۇل رەتتە ينجەنەرلىك ءبىلىم الۋعا سۇرانىستى ارتتىرۋ ءۇشىن ءوزارا بايلانىستى ءۇش ءمودۋلدى قامتيتىن ۇزدىكسىز ينجەنەرلىك ءبىلىم بەرۋ جۇيەسى قۇرىلدى. ياعني PreUniversity باعدارلاماسى اياسىندا ءبىلىم باسقارماسىنىڭ قولداۋىمەن تەرەڭدەتىلگەن فيزيكا-ماتەماتيكالىق دايىندىقتى كوزدەيتىن EKTU Educational Academy جەلىلىك ينجەنەرلىك مەكتەبى قۇرىلدى. ول وبلىستىڭ 27 مەكتەبىنىڭ بالالارى مەن مۇعالىمدەرىن بىرىكتىردى. بۇل جوبانىڭ ماقساتى – ايماقتاعى مەكتەپ وقۋشىلارىنىڭ شىعارماشىلىق جانە زەرتتەۋشىلىك قابىلەتتەرىن قولداۋ, فيزيكا, ماتەماتيكا پاندەرى بويىنشا دايىندىعىن كۇشەيتۋ.
– دەمالىس ۋاقىتىندا بالالار ۋنيۆەرسيتەت بازاسىندا نەمەسە «پروستور» جازعى كامپۋسىندا ءبىلىم الادى. قازىر 30 بالا وقىپ جاتىر. قوسىمشا 70-كە جۋىق بالا كەلەسى ەكى ماۋسىمدا لاگەرگە بارۋدى جوسپارلاپ وتىر, – دەيدى ۋنيۆەرسيتەت رەكتورىنىڭ مىندەتىن اتقارۋشى ساۋلە راحمەتۋللينا.
اتالعان ۋنيۆەرسيتەتتىڭ ءبىلىم بەرۋ بازاسى جىلدان-جىلعا نىعايتىلىپ كەلەدى. يسپانيا, يتاليا, سلوۆەنيا ۋنيۆەرسيتەتتەرىمەن بىرلەسە وتىرىپ, تەحنيكالىق ماماندىقتارعا وقىتۋدىڭ زاماناۋي ادىستەرى ازىرلەنگەن. كەلەسى جىلى ۋنيۆەرسيتەت باسشىلىعى اباي, الماتى جانە تۇركىستان وبلىستارىنا شىعاتىن جەلىلىك ينجەنەرلىك مەكتەپتى كەڭەيتۋدى جوسپارلاپ وتىر. وسى جوبا ۇمىتكەرلەردى تەحنيكالىق باعىتقا باۋلۋدىڭ مەكتەپ نەگىزىندەگى دايارلىق دەڭگەيىن ارتتىرادى.
– ىشكى ساپانى قامتاماسىز ەتۋ جۇيەسى – ESG حالىقارالىق ستاندارتتارى نەگىزىندە 10 ستاندارت ازىرلەنىپ, ەنگىزىلدى. مەنىڭ ويىمشا, العا قويىلعان جوسپارلار ورىندالادى. سەبەبى ۇلكەن دايىندىق جۇمىستارى جۇرگىزىلىپ جاتىر, – دەيدى ساۋلە راحمەتۋللينا.
تەحنيكالىق ۋنيۆەرسيتەتتە عىلىم سالاسىنا كوپ كوڭىل ءبولىنىپ كەلەدى. ماسەلەن, جوعارى وقۋ ورنىندا تيتاننان مەديتسينالىق يمپلانت ونىمدەرىن شىعارۋ قولعا الىنعان. ەندىگى كەزەكتە حيرۋرگيالىق قۇرال-سايماندار شىعارۋ كوزدەلىپ وتىر. ول ءۇشىن وسكەمەندەگى د.سەرىكباەۆ اتىنداعى شقتۋ مەن سەمەي مەديتسينالىق ۋنيۆەرسيتەتى اراسىندا كەلىسىم جاسالعان.
– سەمەي مەديتسينالىق ۋنيۆەرسيتەتىنىڭ ءتيىستى پاتەنتى بار. ولار بىزگە حابارلاسىپ, حيرۋرگيالىق وتا جاسايتىن قۇرال-سايماندار جاساۋدى ۇسىندى. بىراق ول ءۇشىن ءتيىستى جابدىقتار قاجەت. قازىر ەكى ۋنيۆەرسيتەت بىرلەسىپ, اقىلداسىپ جاتىرمىز. سودان كەيىن قارجى بولەتىن ينۆەستور ىزدەيمىز, – دەدى د.سەرىكباەۆ اتىنداعى شقتۋ باسقارما توراعاسى-رەكتورىنىڭ مىندەتىن اتقارۋشى ساۋلە راحمەتۋللينا.
اتالعان جوعارى وقۋ ورنىندا ستۋدەنتتەر ءۇشىن قولايلى جاعدايدىڭ ءبارى بار. باس عيمارات پەن جاتاقحانالاردا فيتنەس ورتالىقتارى اشىلعان. ستۋدەنتتەرگە سپورتپەن شۇعىلدانۋ قولجەتىمدى بولۋى ءۇشىن زالدارعا جاڭا جابدىقتار ورناتىلعان. الداعى وقۋ جىلىنا سەرىكتەستەردىڭ عىلىمي جەلىسىن كەڭەيتۋ, زەرتتەۋ ناتيجەلەرىن حالىقارالىق دەڭگەيگە كوتەرۋ, كوممەرتسيالاندىرۋ سەكىلدى ماڭىزدى مىندەتتەر قويىلىپ وتىر.
شىعىس قازاقستان وبلىسى
