قايعىلى وقيعا سۋعا ءتۇسۋ ماۋسىمى اشىلعالى بەرى قاپشاعاي سۋ قويماسىنىڭ دەمالىسى ورىندارىندا ءجيى قايتالانادى. وتكەن ءبىر ايدىڭ شاماسىندا بىرنەشە مارتە دابىل قاعىلىپ, قۇتقارۋشىلار كومەگىنە جۇگىنگەندەر سانى ارتقان. ونىڭ ىشىندە بىرنەشە وقيعا ادام ولىمىمەن اياقتالىپتى.توتەنشە جاعداي قىزمەتىنىڭ ماماندارى ادام ولىمىنە اپارىپ سوعاتىن جاعدايلاردىڭ بارلىعى دەرلىك ارنايى بەلگى قويىلماعان, ياعني سۋعا تۇسۋگە رۇقسات ەتىلمەگەن ايلاقتاردا بولاتىنىن ايتادى. جاعالاۋدىڭ كوزدەن تاسا جاتقان بولىكتەرىندە سۋعا ءتۇسۋ وتە قاۋىپتى. كوبىنە اياق استى سۋعا باتىپ كەتكەن ادامدى قۇتقارۋ ءۇشىن ماماندار جەتىپ ۇلگەرمەيدى ەكەن. ماسەلەن, جاقىندا قاپشاعايداعى «گولۋبوي زاليۆ» اتالاتىن دەمالىس ورنى ماڭىندا ءتورت ادام بىردەي سۋعا باتىپ كەتتى. اجال ايتىپ كەلمەيدى دەگەندەي, وقىس جاعدايدىڭ سالدارىنان ءبىر وتباسى تۇگەلىمەن سۋ استىندا تۇنشىعىپ, قۇتقارۋشىلار كومەك قولىن سوزا الماعان.
– سۋ قويماسىندا شومىلۋ بارىسىندا تولقىن كوتەرىلىپ, ەكى اعايىندى بالا باتا باستاعان. ولاردى اعاسى, تاتەسى جانە اپاسى قۇتقارۋعا ۇمتىلعان. بىراق وكىنىشكە قاراي, تەك اپاسى عانا امان قالدى. قۇتقارۋشىلار ەكى بالا مەن ەر ادامنىڭ دەنەسىن سۋدان الىپ شىقتى. ءبىز ۇنەمى ازاماتتاردان ارنايى جابدىقتالعان ورىنداردا عانا سۋعا شومىلۋدى, جۇزە المايتىن ادامداردى بەلدەن جوعارى تەرەڭدىكتەگى سۋعا تۇسپەۋدى, بالالاردى سۋ جانىندا قاراۋسىز قالدىرماۋدى, سۋ جانىندا دەمالۋ كەزىندە سپيرتتىك ىشىمدىكتەردى ىشپەۋدى جانە تولقىندار مەن داۋىلدى اۋا رايىندا سۋعا شومىلماۋدى سۇرايمىز. وكىنىشكە قاراي, ادامدار بۇل قاۋىپتى ەسكەرە بەرمەيدى, – دەيدى وبلىستىق توتەنشە جاعدايلار دەپارتامەنتىنىڭ وكىلى.
جالپى, قوناەۆ قالاسىندا قۇتقارۋشىلار كەزەكشىلىگى ۇيىمداستىرىلعان 7 قالالىق جاعاجاي بار. ولار قۇتقارۋ مۇنارالارىمەن جانە شومىلۋ كەزىندە ادامداردىڭ قاۋىپسىزدىگىن قامتاماسىز ەتۋ ءۇشىن باسقا دا قاجەتتى قۇرالدارمەن جابدىقتالعان. ال كول جاعالاۋىندا 140 شاماسىندا جەكە دەمالىس ورنى بار.
قازىر قۇتقارۋشىلاردان مازا كەتتى دەسە دە بولادى. ولاردىڭ قىراعىلىعىنىڭ ارقاسىندا اجالدان امان قالعاندار دا جەتەرلىك. تاياۋدا عانا قاپشاعايدا ۇرلەمەلى ماتراسپەن جاعادان 250 مەتر الىسقا ءجۇزىپ كەتكەن 1997 جىلعى ەر ادام قۇتقارىلدى. ءدال وسى ساتتە جاعادان 400 مەتر قاشىقتىققا الىستاپ, سۋعا باتۋ قاۋپى تونگەن تاعى ەكى ەر ادامعا كومەك كورسەتىلگەن ەكەن. وكىنىشكە قاراي, تاعى ءبىر كۇنى قۇتقارۋشىلار قاپشاعاي كولىنەن 2004 جىلى تۋعان ءجاسوسپىرىمنىڭ دەنەسىن الىپ شىقتى. جاسوسپىرىمگە العاشقى مەديتسينالىق كومەك كورسەتىلگەنىمەن ەش ناتيجە بولماعان.
ايتپاقشى, جىل باسىنان بەرى ەلىمىزدە 134 ادام سۋعا كەتىپ قايتىس بولسا, ونىڭ ىشىندە 51 بالا بار. ال ءبىرىنشى ماۋسىمنان بەرى 91 ادامنىڭ اجالى سۋدان كەلسە, ونىڭ دا وتىز سەگىزى ءجاسوسپىرىم ەكەن. وسى ارالىقتا قۇتقارۋشىلار 98 ەرەسەك ادام مەن 29 بالانى قۇتقارىپ, اجالدان امان الىپ قالعان كورىنەدى.
الماتى وبلىسى
