قازاق ارۋى وتباسىلىق جاعدايىنا قاراي جاراسىمدى تاقيا, ۇكىلى ساۋكەلە كيگەن, تۇرمىس قۇرعان سوڭ اق ورامال تاققان... ءيا, قازاقتا باس كيىمنىڭ ءتۇرى كوپ; زەرە, تاقيا, توبەتاي, بەرگەك, بورىك, جاۋلىق, جەلەك, جىرعا, كيمەشەك دەپ كەتە بەرەدى.
جۋىقتا وبلىستىق ا.پۋشكين اتىنداعى كىتاپحانانىڭ Maker Space شىعارماشىلىق الاڭىندا تىگىنشى گۋلفيرا باعداۋلەتقىزى تاقيا تىگۋدەن شەبەرلىك ساعاتىن وتكىزدى. قاتىسۋشىلار تاقيانىڭ نەگىزىن قالاي قيۋدى, ونى تىگۋدى جانە اشەكەيلەرمەن بەزەندىرۋدى ۇيرەندى. بار بولعانى ەكى ساعاتتىڭ ىشىندە ءساندى, سالتاناتتى تاقيالار دايىن بولدى. ۇيىمداستىرۋشىلاردىڭ ايتۋىنشا, قىزىعۋشىلار سانى ارتسا, مۇنداي شەبەرلىك ساعاتى جۇيەلى تۇردە ءوتىپ تۇرماق.
– قازاقي ويۋ, اسىل تاستارمەن بەزەندىرىلگەن تاقيالاردىڭ سۇرانىسى كۇننەن كۇنگە ارتىپ كەلەدى. ۇلتتىق قۇندىلىقتىڭ قايتا جاڭارىپ, جاڭعىرىپ جاتقانىنا ءبىز قۋانامىز. حالىققا تاقيا تىگۋدى ۇيرەتىپ, ءداستۇرىمىزدىڭ دارىپتەلۋىنە وسىلايشا ۇلەس قوسقىمىز كەلەدى, – دەيدى گۋلفيرا يزەكوۆا.
تاقيانىڭ سانگە اينالۋىنا قاراي, ءتۇرلى تاقيا تىگىپ, كاسىبىن دوڭگەلەتىپ وتىرعان تىگىنشىلەر دە كوبەيدى. الايدا ا.پۋشكين كىتاپحاناسىنىڭ قابىرعاسىندا اركىم وزىنە جاراسىمدى تاقيا تىگىپ الۋلارىنا ابدەن بولادى. جالپى, بۇل كىتاپحانادا وقىرمان ءۇشىن اتقارىلىپ جاتقان شارۋا ۇشان. وتكەندە عانا ەكولوگيانى پوليەتيلەن پاكەتتەردەن تازارتۋ ماقساتىندا شۇبەرەك سومكە تىگىپ, تابيعاتتى قورعاۋعا ۇگىتتەگەن. كىتاپحانا باسشىلىعىنىڭ مالىمەتىنشە, الداعى ۋاقىتتا ءالى دە اۋقىمدى جوبالار كوپ. ونىڭ ءبارى رەت-رەتىمەن جۇزەگە اسا بەرمەك.
شىعىس قازاقستان وبلىسى
