«جىل باسىنان بەرى قاراجامباس جانە تۇپقاراعان تۇبەگىنىڭ وڭتۇستىك-باتىس بولىگىنەن 220 يتبالىقتىڭ ولەكسەسى تابىلدى. ولەكسەلەر سولتۇستىك جانە ورتا كاسپي اكۆاتورياسىنداعى داۋىل مەن سولتۇستىك-باتىس جانە باتىستان سوققان جەلدىڭ اسەرىنەن جاعاعا شىعىپ قالعان. وسى جاعدايعا بايلانىستى ءبىزدىڭ بالىق شارۋاشىلىعى كوميتەتى ءتۇرلى عىلىمي ۇيىمدار جانە مەملەكەتتىك قۇزىرلى ورگاندارمەن بىرلەسىپ, زەرتتەۋ جۇمىسىن جۇرگىزىپ, قورىتىندىعا كەلدى. تابىلعان يتبالىق ولەكسەلەرى ىدىراپ كەتكەندىكتەن ساراپتاما الۋ مۇمكىن بولمادى. سوعان قاراعاندا تەڭىز جانۋارلارى بىرنەشە اي بۇرىن ولگەن», دەدى سەرىكقالي برەكەشەۆ ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.
ءمينيستردىڭ ايتۋىنشا, تەك 67 ولگەن يتبالىقتىڭ قاڭقاسىنا تەكسەرۋ جانە ولشەۋ جۇرگىزىلدى.
«ولاردىڭ 25 پايىزىنان ولىمگە الىپ كەلۋى مۇمكىن مەحانيكالىق اسەر ىزدەرى انىقتالدى. وعان سەبەپ يتبالىقتاردىڭ بالىق اۋلاۋ تورلارىنا ءتۇسىپ قالۋى, ولاردىڭ ءتۇرلى جاراقات الۋى نەمەسە يتبالىقتاردىڭ تىيىم سالىنعان اۋلاۋ قۇرالدارىنا تاپ بولۋى مۇمكىن», دەيدى ول.
زەرتتەۋ ناتيجەسىندە 19 يتبالىقتىڭ جاسىن انىقتاۋ مۇمكىن بولعان. اتاپ ايتقاندا, ولاردىڭ 52 پايىزى 2021-2022 جىلدىڭ قىسىندا تۋعان.
«يتبالىق كۇشىكتەرىنىڭ ءولىمىن ولاردىڭ السىزدىگىمەن, سۋىق سۋدان قاتىپ قالۋىمەن ياعني جاڭا تۋعان يتبالىقتاردىڭ بىردەن اشىق مۇزدى تەڭىزگە شىعۋىمەن بايلانىستىرىپ وتىر. 2021-2022 جىلدىڭ قىسى جىلى بولدى, بۇل يتبالىقتار ءۇشىن قولايسىز. جوعارىدا اتالعان فاكتىلەر ولاردىڭ تابيعي ولىمىنە اكەلدى. جالپى تابىلعان يتبالىقتاردىڭ ەرەسەك جاسى 13 جىل. بارلىق ولەكسە تەكسەرۋدەن سوڭ سانيتاريالىق نورمالاردى ساقتاي وتىرىپ وڭدەلدى», دەيدى س. برەكەشەۆ.
ۆەدومستۆو باسشىسى يتبالىقتار ءولىمىنىڭ تاعى ءبىر سەبەبىن قاشاعان كەن ورنىنداعى تەرەڭدەتۋ جۇمىسىمەن بايلانىستىرىپ وتىر.
