ۆەلوسيپەدشىلەر اسپاندى توڭكەرىپ جەرگە تۇسىرەردەي جانىپ تۇرعان اپتاپ ىستىققا قاراماستان, ارعى-بەرگى جولدى قوسىپ ەسەپتەگەندە, ۇزىندىعى 400 شاقىرىمدى ءجۇرىپ ءوتتى. احمەت ەسكەرتكىشىنىڭ باسىندا وتكەن ءسات ساپار جيىندا پارلامەنت ءماجىلىسىنىڭ دەپۋتاتى سامات اقىشەۆ سپورتشىلارعا اق جول تىلەپ, اتالعان ءىس-شارا احاڭنىڭ الاساپىران عۇمىرى مەن ولمەس مۇراسىن دارىپتەۋدەگى, سونداي-اق بۇقارالىق سپورتتى ناسيحاتتاۋداعى ماڭىزىن اتاپ وتكەن.
ال وبلىستىق قوعامدىق دامۋ باسقارماسىنىڭ باسشىسى مارات جۇرقاباەۆ ۆەلوشەرۋدى ۇيىمداستىرۋشىلارعا العىس ءبىلدىرىپ, ۇلت ۇستازىنا ارنالعان ۇلاعاتتى باستامالار جىل بويى جالعاساتىنىن تىلگە تيەك ەتتى.
مەرەيتويلىق مارافونعا جيىرمادان استام كاسىبي ۆەلوشاباندوز قاتىستى. ولاردى 76 جاستاعى اۋەسقوي ۆەلوشاباندوز, ارداگەر سپورتشى, عالىم-ۇستاز قالقامان جاقىپ اعا باستاعان اۋەسقوي ۆەلوسيپەدشىلەر 20 شاقىرىمعا دەيىن ۇزاتىپ سالدى.
– احمەت بايتۇرسىن ۇلى – قازاق حالقىنىڭ رۋحاني كوسەمى. ءبىزدىڭ ماقسات – جاستارعا ۇلى تۇلعانىڭ ءومىرى مەن ەلگە سىڭىرگەن قىزمەتىن, باعا جەتپەس اسىل مۇراسىن ناسيحاتتاۋ, – دەدى سپورت ارداگەرى.
ۆەلوشەرۋگە قاتىسۋشىلاردىڭ اراسىندا ءۇشىنشى توپتاعى مۇمكىندىگى شەكتەۋلى پاۆەل بابەنكونىڭ دا بولعانىن ايتا كەتكەن ءجون. ۆەلوسپورتقا بالا كەزىنەن اۋەستەنگەنىمەن, پاۆەل ءوزىنىڭ سۇيىكتى سپورتىمەن شىنداپ اينالىسا باستاعانىنا ەكى-اق جىل بولىپتى.
– سول اياعىم پروتەز. بىراق سوعان قاراماستان بىلتىر ءبىرىنشى رەت 200 شاقىرىمدى باعىندىردىم. ەندى, مىنە, 400 شاقىرىمعا جەتەمىن دەپ وتىرمىن. مەنىڭشە, قيمىل-قوزعالىس – بەلسەندى ءومىر ءسۇرۋدىڭ كورىنىسى عانا ەمەس, سونىمەن قاتار وسى ارقىلى كوپتەگەن اداممەن تانىسىپ, ارالاسىپ-قۇرالاسىپ, جاڭا دوس تاباسىڭ. ومىرگە دەگەن قۇشتارلىعىڭ ارتادى, – دەيدى پ.بابەنكو.
سپورتشىلار اۋليەكولدە ءبىر تۇنەپ, جۇما كۇنى شولاقساي ەلدى مەكەنىنە جەتتى. احمەت بايتۇرسىن ۇلى اتىنداعى وڭىرلىك ۋنيۆەرسيتەتتىڭ وقىتۋشىلارى اۋىل مەكتەبىنىڭ جوعارى سىنىپ وقۋشىلارىنا كاسىپتىك باعىت-باعدار بەرۋ جانە تۇلعالىق ءوسۋ جونىنەن ترەنينگتەر وتكىزدى. سونداي-اق اسىق اتۋ جانە شاحمات ويىندارىنان جارىس ۇيىمداستىرىلىپ, سپورتتىق ءىس-شارانىڭ سوڭى كونتسەرتكە ۇلاستى.
«قوستاناي ۆەلوسيپەد قاۋىمداستىعى» قب توراعاسى باۋىرجان تەبەەۆتىڭ ايتۋىنشا, قوستانايدا ۇلى تۇلعالاردىڭ مەرەيتويىنا ارنالعان ۆەلوشەرۋلەر ءداستۇرلى تۇردە ءوتىپ تۇرادى. ماسەلەن, 2020 جىلى اباي قۇنانباي ۇلىنىڭ 175, بىلتىر ى.ءالتىنساريننىڭ 180 جىلدىعىنا وراي اۋقىمدى ۆەلومارافوندار ۇيىمداستىرىلدى.
ۆەلوشاباندوزدار قوستانايعا 16 شىلدەدە بەسىن اۋا قايتا ورالدى.
قوستاناي وبلىسى
