ءيا, شالعايداعى جۇرتشىلىق قاشاندا كاسىبي ءارى بىلىكتى دارىگەرلەرگە مۇقتاج. اۋىل تۇرعىندارىنىڭ اق جەلەڭدىلەر قابىلداۋىنا بارۋ ءۇشىن ۇزاق جولدى ەڭسەرۋىنە تۋرا كەلەدى. پاندەميا سالدارىنان ءوڭىر ارالاۋى توقتاعان جىلجىمالى مەديتسينالىق كەشەندەر بۇگىندە قايتا جۇمىسىنا كىرىسۋدە. باياناۋىل اۋداندىق اۋرۋحاناسىنىڭ باس دارىگەرى سەرىكجان ارىنوۆتىڭ ايتۋىنشا, كوشپەلى جىلجىمالى مەديتسينالىق كەشەندەر ايماققا قاراستى اۋىلداردا ەكى كۇن قاتارىنان تۇرعىنداردى قابىلدايدى.
– اۋدانىمىزدان شالعايدا ورنالاسقان اۋىلدار از ەمەس. ەلدى مەكەن تۇرعىندارىنىڭ سانىنا بايلانىستى دارىگەرلەردى ەكى كۇنگە بولەمىز. ياعني ماماندارىمىز العاشقى كۇنى رەنتگەن جانە فليۋوروگرافيا قىزمەتىن كورسەتۋمەن اينالىساتىن بولسا, ەكىنشى كۇنى جالپى قابىلداۋ كابينەتتەرى جۇمىسىن جالعاستىرادى. كەشەن ءىشى تسيفرلىق جابدىقتارمەن جابدىقتالعان. ودان بولەك تەراپەۆت, پەدياتر, حيرۋرگ, اكۋشەر-گينەكولوگ, وكۋليست, كارديولوگ, نەۆروپاتولوگ, ونكولوگ دارىگەرلەرى دە شاعىم بويىنشا قابىلدايدى. جالپى, اۋداندىق جانە قالالىق اۋرۋحانالارعا قاتىناي المايتىن ادامدار ءۇشىن دەنساۋلىق جاعدايىنىڭ قالىپتى ەكەنىنە كوز جەتكىزۋ ءۇشىن جاقسى مۇمكىندىك. وعان قوسا ءتيىمدى تۇستارى بارشىلىق. اسىرەسە بالالار مەن جاسوسپىرىمدەر سكرينينگتەن جانە كاسىبي تەسكەرۋدەن وتە الادى. جىلجىمالى مەديتسينالىق كەشەندە قارت ادامدار مەن مۇمكىندىگى شەكتەۋلى جاندارعا دا جاعداي جاسالعان. وزدەرىڭىزگە بەلگىلى, باياناۋىل اۋدانىندا اۋا رايىنان بولەك, جولدار ۇنەمى كەشەننىڭ قاتىناۋىنا مۇمكىندىك بەرمەيدى. سوندىقتان دا جەر اياعى كەڭىگەن ۋاقىتتا جانە وقۋ جىلىنىڭ باسىندا جىلىنا ەكى مارتە كەشەندى كولىكتەرمەن ساپاردى ۇيىمداستىرامىز. قىس مەزگىلىندە قاردىڭ قۇرساۋىندا جاتقان اۋىلدارعا بارۋ مۇمكىن ەمەس, – دەيدى س.ارىنوۆ.
ماۋسىم ايىنىڭ سوڭىندا مەديتسينالىق جىلجىمالى كەشەننىڭ ساپارى اياقتالىپتى. دارىگەرلەر ۇزىنبۇلاق, ساتباەۆ, مۇسا شورمان, جارىلعاپبەردى, جاڭاجول جانە وزگە دە اۋىلدار مەن اۋىلدىق وكرۋگتەرگە قاتىناعان. شامامەن مىڭنان استام تۇرعىن قامتىلىپتى. اۋىلداعى اعايىندى كوبىنە قان قىسىمى, جۇرەك اۋرۋلارى مازالايتىن كورىنەدى.
كۇركەلى اۋىلدىق وكرۋگىنىڭ تۇرعىنى ايىمگۇل شاحان كەشەندى كولىكتەردىڭ قولايلى ەكەنىن ايتتى.
– جۇمات شانين اۋىلىنا قونىس اۋدارعانىما 1 جىلدان اسا ۋاقىت بولدى. العاش رەت كولىك كەشەنىنىڭ دارىگەرلەرىنىڭ قابىلداۋىنا كىردىم. تيىمدىلىگى سول, ۇزىن-سونار كەزەك كۇتپەيسىڭ. كەشەننىڭ ءىشى وتە تازا, جيناقى. باستىسى, دارىگەرلەر سىپايى. رەنتگەنگە ءتۇسۋ ءۇشىن اۋدان ورتالىعىنا قاتىناۋدىڭ قاجەتى جوق. دەگەنمەن, وعان مەملەكەتتىك مەكەمەلەردە جۇمىس ىستەيتىن ادامدار تەكسەرىلە المايدى دەسەدى. باسىمدىق قاراپايىم تۇرعىندارعا ارنالعان ەكەن. سول سەبەپتى بارلىق اۋىل تۇرعىنىن قامتىعان ءجون دەپ سانايمىن, – دەيدى ا.شاحان.
وبلىستىق دەنساۋلىق ساقتاۋ باسقارماسىنىڭ ارنايى مەديتسينالىق قامتاماسىز ەتۋ, دەنساۋلىق ساقتاۋ جۇيەسىندەگى تسيفرلاندىرۋ جانە مەملەكەتتىك كورسەتىلەتىن قىزمەتتەردى مونيتورينگىلەۋ ءبولىمىنىڭ باس مامانى شولپان مەڭدىعاليەۆانىڭ ايتۋىنشا, ەڭ اۋەلى ايماقتاردا تاپشى مامان تىزبەگى انىقتالىپ, ارنايى دارىگەر جىبەرىلەدى ەكەن.
– وبلىسىمىزدا اقسۋ قالالىق اۋرۋحاناسى, باياناۋىل, جەلەزين, ەرتىس, شارباقتى, پاۆلودار اۋداندارى جىلجىمالى مەديتسينالىق كەشەنمەن قامتىلعان. سايكەسىنشە, اتالعان اۋداندارداعى كولىك كەشەنىنىڭ جۇمىس جوسپارى اياقتالىپ, كەشەن كولىكتەرى وبلىسىمىزداعى وزگە قالا مەن اۋداندارعا جىبەرىلەدى, – دەيدى ول.
پاۆلودار وبلىسى
