ەۋروپا ورماندارىن ءورت شارپىدى

ۆۆس باسىلىمىنىڭ حابارلاۋىنشا فرانتسيانىڭ جيرون ايماعىندا ءورتتىڭ كەسىرىنەن 12 مىڭنان استام ادام ەۆاكۋاتسيالانعان. يسپانيانىڭ وڭتۇستىگىندە, كوستا-دەل-سولگە جا­قىن جەر­دە 2300-گە جۋىق ادام ميحاس تو­بەلەرىنە تاراعان ورمان ورتىنەن قا­شۋعا ءماجبۇر بولعان. جەرگىلىكتى تۇر­عىندار مۇنداي ورمان ورتتەرىن بۇرىن-سوڭدى كورمەگەنىن ايتادى. فران­تسيانىڭ وڭتۇستىك باتىسىنداعى جانە بوردونىڭ وڭتۇستىگىندەگى ءورت 10 000 گەكتارعا جۋىق اۋماقتى شارپىعان. ءورتتى اۋىزدىقتاۋعا 3 مىڭعا جۋىق ءورت ءسوندىرۋشى جۇمىلدىرىلدى.

پورتۋگاليانىڭ پورتۋ قالاسىنىڭ سولتۇستىك-شىعىسىنىڭ 30 000 گا جەرى جالىنعا ورانعان. ءتىلسىز جاۋدان جەرورتا تەڭىزىنىڭ وزگە بولىكتەرى دە زارداپ شەككەن كورىنەدى. يتاليا ۇكىمەتى قۇرعاقشىلىق جايلاعان پو القابىندا توتەنشە جاعداي جاريالادى. قازىردە ەلدىڭ ەڭ ۇزىن وزەنىنىڭ كوپ بولىگى كىشكەنە كولشىككە اينالعان. گرەكيادا ءورت سوندىرۋشىلەر افينادان وڭتۇستىك-شىعىسقا قاراي 50 شاقىرىمداي جەردەگى فەريزا ايماعىندا جانە كريتتىڭ سولتۇستىك جاعالاۋىنداعى رەتيمنون ماڭىنداعى ءورتتى لەزدە ءسوندىرىپ ۇلگەردى. رەتيمنونعا جاقىن جەردە جەتى اۋىل ەۆاكۋاتسيالانعان.

سونداي-اق ماروككونىڭ سولتۇس­تىگىندە لاراچە, ۋەتسزان, تازا جانە تەتۋان پروۆينتسيالارىن شارپىعان ورتكە بايلانىستى بىرنەشە اۋىل تۇرعىندارى قاۋىپسىز جەرگە كوشىرىلدى. كسار ەل-كەبير ايماعىندا ءبىر اۋىل تولىعىمەن جويىلىپ كەتكەن. فرانتسۋز ءورت سوندىرۋشىلەر فەدەراتسياسىنىڭ باس­شىسى گرەگوري الليونە مۇنىڭ ءبارى جا­ھاندىق جىلىنۋدىڭ سالدارى دەپ ەسەپ­تەيدى. ماماندار كليماتتىڭ ان­تروپوگەندىك وزگەرۋىنە بايلانىستى اپ­تاپ ىستىق جيىلەپ كەتكەنىن ايتادى. ونەر­كاسىپ ءداۋىرى باستالعاننان بەرى اتموس­فەرا شامامەن 1,1°C-گە جىلىعان. ەگەر الەم كو­مىرتەگى شىعارىندىلارىن قىس­قارتپاسا, تەمپەراتۋرا كوتەرىلە بەرەدى.