تەاتر • 17 شىلدە، 2022

بالەت بيىگىندەگى باقتيار

61 رەت كورسەتىلدى

«استانا وپەرانىڭ» جەتەك­شى ءسوليسى، قازاق­ستاننىڭ ەڭبەك سىڭىرگەن قايراتكەرى باقتيار ادامجاننىڭ ونەر كورسەتۋلەرىنىڭ گەوگرافياسى جىلدان جىلعا كەڭەيۋدە. وسى جازدىڭ وزىندە ونى كورەرمەندەرى الەمنىڭ بىرقاتار ەل­دەرىن­دە ك­ۇتۋدە. اتاپ ايت­ساق، وتان­دا­سى­مىزدىڭ قاتى­سۋى­مەن ماۋسىمدا ميلاندا 8 گالا-كونتسەرت ءوتتى. ەندى ءارتىس يتاليانىڭ باس­قا دا قالالارىنىڭ، سون­داي-اق فرانتسيا مەن اۋست­را­ليا كورەرمەندەرىن تاڭ­عال­دىرۋعا دايىندالۋدا.

ۇلتتىق بالەت ونەرىنىڭ ماڭ­دايىنا باق قۇسى بولىپ قون­عان باقتياردىڭ باعى سول – ونىڭ بيلەرىن  الەمنىڭ تانىمال حورەوگرافتارى وزدەرىنىڭ بالەت­تىك باعدارلامالارىنا قوسۋ­عا اسىق. ال زاماناۋي ءارى كلاسسي­كالىق ونەر تابىنۋشىلارى  «قازاق­ستاننىڭ №1 ءبيشىسى» اتان­عان ونەر يەسىنىڭ  ءاربىر قويىلىمىنا بارۋدى ارماندايدى. تۋعان جەر تورىندە عانا ەمەس، شەتەلدە دە زور تانىمالدىلىققا يە جەتەكشى سوليست ءۇشىن بيىلعى جاز دا ما­ڭىزدى وقيعالارمەن باستالدى.

سونىڭ ەڭ نەگىزگىسى – 17-28 ماۋسىم ارالىعىندا ميلانداعى ار­چيم­بولدي يتاليالىق تەاترىندا وتكەن «روبەرتو بوللە جانە ونىڭ دوستارى» اتتى زامانىمىز­دىڭ ءبىرتۋار ءبيشىسىنىڭ گالا-بالەت كەشتەرىندە  جارقىن ونەر كورسەتۋى. باقتيار  سان-فرانتسيسكو جانە ماريا تەاترلارىنىڭ ج­ەتەكشى بالەت سوليستەرىمەن بىرگە كورەرمەندەردىڭ نازارىنا ل.مين­كۋستىڭ «دون كيحوت» جانە ا.اداننىڭ «كورسار» بالەت­تەرىنەن ءۇزىندى ۇسىندى.

– روبەرتو بوللەمەن وسىدان بەس جىل بۇرىن ماەسترو لۋيد­جي بونينونىڭ ارقاسىندا تانىستىق. لۋيدجي ءبىزدىڭ تەاترعا رولان پەتيدىڭ حورەوگرافياسىندا «پاريج قۇداي اناسىنىڭ سوبورى» سپەكتاكلىن قويۋعا كەلگەن بولاتىن، سوندا ءبىز گالا-كونتسەرتكە قاتار دايىندالدىق. ماەسترو دايىندىق زالىنا كىرىپ، جاتتىعۋىمىزدى بەينەگە جازىپ الدى. كەيىننەن سول بەينەنى روبەرتو بوللەگە كورسەتىپ:  «قازاقستاندا وسىنداي بالەت ءارتىسى بار، ول سەنىڭ «روبەرتو بوللە جانە ونىڭ دوستارى» اتتى گالا-كونتسەرتىڭدە مىندەتتى تۇردە ونەر كورسەتۋى كەرەك، بۇل ءبارىمىز ءۇشىن ۇلكەن جاڭالىق بولادى» دەپ مەنى سىرتتاي تانىستىرعان ەكەن. كەيىن روبەرتو بوللە ماعان الەۋمەتتىك جەلى ارقىلى شىعىپ، كونتسەرتكە شاقىرتۋ جولدادى. ەكەۋمىزدىڭ تانىستىعىمىز وسى­لاي باستالدى،  دەپ باقتيار ادامجان ميلان ساپارى تۋراسىنان سىر اقتاردى. 

سول ۋاقىتتان بەرى روبەرتو بوللە باقتيار ادامجاننىڭ  قاتى­سۋىنسىز بىردە-ءبىر كونتسەرت وتكىزگەن ەمەس. ەكەۋىنىڭ ارا­سىن­داعى شىعارماشىلىق دوس­تىق جىلدان جىلعا نىعايىپ كەلە­دى.  ايتا كەتۋ كەرەك، روبەرتو بول­لەنىڭ گالا-كونتسەرتتەرىنە شاقىر­تۋ الۋ – بۇل ءارتىستىڭ جوعارى شەبەرلىگىنىڭ دالەلى.

– روبەرتو ءوز كورەرمەندەرىن قاتتى قۇرمەتتەيدى. ونىڭ گالا-كونتسەرتىندە ءوزىڭدى جوعارى كاسىبي دەڭگەيدە كورسەتپەسەڭ، ءتيىستى دارەجەڭدى ساقتاپ تۇرماساڭ، ول شىعارماشىلىق دوستىقتى بىردەن شورت ۇزەدى. سەبەبى ونىڭ باعدارلامالارى جوعارى ساپاسىمەن ەرەكشەلەنەدى جانە سوعان ساي ارتىستەرىنە دە قاتاڭ تالاپ قويادى. ماعان دەگەن ءىلتيپاتى، كون­تسەرتىنە شاقىرعانى جانە يتا­ليانىڭ بەدەلدى ساحنالارىندا ونەر كورسەتۋگە جاعداي جاساعانى ءۇشىن وعان وتە ريزامىن،  دەپ اتاپ ءوتتى باقتيار ادامجان.

«استانا وپەرا» پرەمەرىنىڭ يتا­لياعا ساپارى مۇنىمەن اياق­تال­مايدى. باقتيار 21-22 شىلدەدە ەكى كۇن قاتارىنان ريم وپەرا تەاترىندا كورەرمەن نازارىنا «پاريج قۇداي اناسىنىڭ سوبورى» سپەكتاكلىن ۇسىنادى. بالەت جۇلدىزى يتاليالىق ساحنادا كۆازيمودو باستى پارتياسىندا جارقىرايدى.

سونداي-اق وسى ايدا باقتيار ادام­جاندى يسپانيالىق كورەر­مەندەر دە اسىعا كۇتەدى. ءارتىس اليكانتە قالاسىنىڭ باس تەاترىن­دا وتەتىن STARS GALA گالا-بالەتىندە ونەر كورسەتەدى. ايتا كەتەيىك، بۇل گالا-كونتسەرتتە جىل سايىن الەمنىڭ شارتارابى­نان ناعىز كاسىبي تالانتتار باس قو­­سادى. بيىل گالا-بالەتتە «اس­تانا وپەرانىڭ» جەتەكشى سولي­سى­­مەن بىرگە ءبىر ساحنادا ما­ريا، ۇلكەن، ميحايلوۆ تەاتر­­­لارى­نىڭ، بەرلين، ۆەنا مەملەكەتتىك با­لەتى­نىڭ، نيدەر­لاندى ۇلتتىق بالەتى­نىڭ، سونداي-اق باسقا دا ايگىلى تەاتر­لاردىڭ ۇز­دىك ارتىستەرى ونەر­لەرىن پاش ەتە­دى. ارتىستەر با­لەت ونەرىن تەرەڭ تۇسى­­نەتىن ءارى جو­عارى باعالايتىن يس­­پا­نيا­لىق جۇرت­شىلىققا ۇمى­­تىل­ماس اسەر سىي­لايدى دەپ كۇتى­لۋدە. مۇندا باق­تيار ريك­كار­دو دري­گو­نىڭ «بويتۇمار» با­لەتى­نەن پا-دە-دە جانە تسەزار ءپۋني­دىڭ «ەس­مە­رالدا» بالەتىنەن «ديا­نا جانە اكتەون» پا-دە-دەسىن ۇسىنادى.  

باقتيار ادامجاننىڭ الەم بويىنشا گاسترولدىك ونەر كور­سەتۋلەرى تامىزدا اۋسترا­ليادا جالعاسادى. بۇعان دەيىن بەكزات ونەر پاديشاھى وسى ەلدە وتكەن Ballet International Gala الەمدىك شوۋىندا ءوزىنىڭ ءمىنسىز تەحنيكاسىن كورسەتكەن بولاتىن. جىل باسىندا جاسىل قۇرلىق كورەرمەندەرىن ونەرىمەن ءتانتى ەتىپ قايتقان بالەت جۇلدىزى اراعا بىرنەشە اي سالىپ، «استانا وپەرانىڭ» جەتەكشى ءسوليسى ءارى ءوزىنىڭ ساحناداعى جۇبى – شۇعىلا ادەپحانمەن بىرگە تاماشا تاندەمدە اۋستراليالىق جانكۇيەرلەرىن تاعى دا قۋانتۋعا اسىق. ودان بولەك، باقتيار 13-15 قازان كۇندەرى فرانتسيانىڭ  كانن قالاسىندا ونەر كورسەتۋگە دە قىزۋ دايىندىق ۇستىندە.

الەمنىڭ ايگىلى حورەوگراف­تارى­نىڭ عالامنىڭ تۇكپىر-تۇك­پىرىندە وتەتىن بالەت كەشتەرى مەن سپەكتاكلدەرىنە باقتيار ادامجاندى جارىسا شاقىرۋى – ونىڭ الەمنىڭ ۇزدىك بيشىلەرىنىڭ قاتارىندا ەكەنىن تاعى ءبىر دالەلدەي تۇسەدى. بۇل «استانا وپەرانىڭ» جانە بارشا ەلىمىزدىڭ بەدەلىن حالىقارالىق ارەنادا ارتتىراتىنى ءسوزسىز. ەندەشە، جاھاندىق ونەر كەڭىستىگىندە لا­يىم بابىڭ كەلىسىپ،  باعىڭ جانا بەرسىن، باقتيار!

سوڭعى جاڭالىقتار

الماتى ماڭىندا جەر سىلكىندى

ايماقتار • بۇگىن، 10:02

جاس تەننيسشىلەرمەن كەزدەسۋ

تەننيس • بۇگىن، 07:47

جاس عالىمنىڭ جەتىستىگى

عىلىم • بۇگىن، 07:43

ۇقساس جاڭالىقتار