سيىر سۇزگەن ءۇش ادام جاراقات الدى: ءبىر ەر ادام جامباسى سىندى دەگەن كۇدىكپەن اۋرۋحاناعا جاتقىزىلدى. ءبىر ايەل قاشىپ بارا جاتىپ وكشەسىن تايدىرىپ الىپتى. ال ءبىر زەينەتكەر اياعىن سىندىرعان.
پوليتسەيلەر جانۋاردى قالانىڭ انا بۇرىشىنان مىنا بۇرىشىنا قاقپاقىلداپ قۋىپ ءجۇرىپ, ءۇش ساعات دەگەندە ارەڭ قۇرىقتاپ, كوك سيىردىڭ قالانىڭ ىشىندەگى سويۋ تسەحتارىنىڭ بىرىنە مال اپارا جاتقان كولىكتەن سەكىرىپ ءتۇسىپ قالعانىن انىقتادى. بىرەۋلەر بۇل سيىر قۇتىرعان بولۋى كەرەك دەگەن بولجام جاساپتى. بىراق ارنايى كەلىپ تەكسەرگەن ۆەتەرينار ماماندار جانۋاردىڭ ساپ-ساۋ ەكەنىن ايتتى.
اۋىلدا مۇنداي قيتۇرقى مىنەز كورسەتسە, كوك سيىر بىردەن پىشاققا ىلىنەر مە ەدى. قالالىقتاردىڭ ءيى جۇمساق قوي, قانشا ءسۇزىپ, جاراقاتتاپ جاتسا دا, جانۋاردى اياپ, جاناشىرلىق تانىتۋشىلار كوبەيدى. ولار الەۋمەتتىك جەلى ارقىلى ۇندەۋ جاريالاپ, سيىردى سويۋ تسەحىنا بەرمەيمىز, قارجى جيناپ ءوزىمىز ساتىپ الامىز, ءوز ءومىرى ءۇشىن مۇنداي كوزسىز ەرلىك كورسەتكەن جانۋار ءومىر سۇرۋگە ابدەن لايىق دەپ ۇرانداتتى.
جاناشىر توپ اقىرى دەگەندەرىنە جەتىپتى. سيىردىڭ يەسى ولارعا ءوزى حابارلاسقان كورىنەدى. ەرىكتىلەردىڭ ايتۋىنشا, ەتكە وتكىزۋگە الىپ كەتىپ بارا جاتقان جانۋاردىڭ بۇزاۋى بار ەكەن. كولىكتىڭ شاناعىنان سەكىرىپ تۇسكەن بەتتە ءتولى قالعان تۇستىككە قاراي بەت العان جانۋار قالاداعى قاپتاعان كولىك پەن انتالاعان ادامداردىڭ ورتاسىنا ءتۇسىپ قالىپ الاسۇرسا كەرەك.
قازىر ابدەن قاتالاپ قالعان كوك سيىر قاۋىپسىز, جايلى تۇراققا ورنالاستىرىلدى. ەلەنا ەسىمدى مەيىرىمدى ايەل جانۋاردى بۇزاۋىمەن قوسىپ ساتىپ الىپتى. جاڭا قوجايىن بۇزاۋلى سيىرىنىڭ قۇجاتتارىن رەتتەستىرىپ جاتىر.
– پوليتسيادان قاشىپ جۇرگەندە ارتقى اياعىنىڭ ءسىڭىرىن سوزىپ الىپتى, ونى دا ەمدەتەتىن بولامىز, – دەدى ەلەنا.
قوستاناي وبلىسى
