«Asar Ume» قايىرىمدىلىق قورىنىڭ باستاماسىمەن قر اقپارات جانە قوعامدىق دامۋ مينيسترلىگى جانە نۇر-سۇلتان قالاسى اكىمدىگىنىڭ قولداۋىمەن, قالالىق جاستار ساياساتى ماسەلەلەرى باسقارماسىنىڭ ۇيىمداستىرۋىمەن وتكەن بۇل ايتۋلى ءىس-شارانىڭ اشىلۋ سالتاناتىنا قر پرەمەر-ءمينيسترىنىڭ ورىنباسارى ەرالى توعجانوۆ, قر عىلىم جانە جوعارى ءبىلىم ءمينيسترى ساياسات نۇربەك, نۇر-سۇلتان قالاسى اكىمىنىڭ ورىنباسارى ەسەت بايكەن جانە ەلىمىزدەگى بىرقاتار قايىرىمدىلىق ۇيىمدارىنىڭ وكىلدەرى قاتىستى.
قر پرەزيدەنتى جانىنداعى جاستار ساياساتى جونىندەگى كەڭەستىڭ مۇشەسى, «Asar Ume» قوعامدىق قورىنىڭ جەتەكشىسى اسحات نۇرماشەۆ باستاماشىلىق ەتكەن «Asar Joly» قايىرىمدىلىق مارافونى وسكەلەڭ ۇرپاقتىڭ رۋحاني-ادامگەرشىلىك تاربيەسىن قالىپتاستىرۋعا, نىعايتۋعا, ەل حالقىنىڭ مادەنيەتى مەن داستۇرلەرىن ناسيحاتتاۋعا باعىتتالعان جاستاردىڭ قوعامدىق پايدالى باستامالارىن قولداۋ ماقساتىندا ءوتىپ جاتىر.
بۇل جوبا ۇكىمەتتىڭ تىكەلەي قولداۋىمەن, اقپارات جانە قوعامدىق دامۋ مينيسترلىگى مەن نۇر-سۇلتان قالاسى اكىمدىگىنىڭ اتسالىسۋىمەن جۇزەگە اسىپ جاتىر جانە الداعى ۋاقىتتا ەلىمىزدىڭ جيىرما وڭىرىندە جالعاسىن تابادى دەپ جوسپارلانىپ وتىر.
«مۇنداي جوبالاردى قولداۋ مەنىڭ تىكەلەي مىندەتىم. «Asar joly» جوباسىنا ەلىمىزدەگى اكىمدىكتەردىڭ بارلىعى كومەكتەسەدى. وتكەندە سوعان بايلانىستى ارنايى وتىرىس وتكىزدىك, اكىمدەرمەن كەلىستىم. بۇل – كىرىستەردى كوبەيتۋ باعىتىنداعى ءبىر عانا ۇلكەن جوبا. وسىنداي جوبالاردى ءبىر جاعادان باس, ءبىر جەڭنەن قول شىعارىپ قولدايىق, دەدى پرەمەر-ءمينيستردىڭ ورىنباسارى ەرالى توعجانوۆ.
«Asar joly» جوباسىنىڭ ماقساتى – 20 مىڭ شاقىرىم جول ءجۇرىپ, بۇكىل ەلىمىزدى ارالاپ, بارلىق قالالارىمىزعا سوعىپ, اتا-بابامىزدان قالعان جولدى قۋىپ, جاقسىلىقتا جارىسىپ, مۇقتاجدارعا پانا بەرىپ, قول ۇشىن سوزىپ, جاس بالالارعا, قيىنشىلىقتا جۇرگەن وتباسىلارعا موتيۆاتسيا بەرۋ. ەل بويىنشا ەلۋ شاقتى وتباسىن باسپانالى ەتۋدى جوسپارلاپ وتىرمىز. ودان باسقا, جۇمىسپەن, بىلىممەن, كاسىپپەن كومەكتەسۋ ويىمىزدا بار, دەيدى «Asar Ume» قايىرىمدىلىق قورىنىڭ جەتەكشىسى اسحات نۇرماشەۆ.
ايتا كەتۋ كەرەك, «Asar Ume» – تۇرمىستىق جاعدايى تومەن جانە قيىن جاعدايعا تاپ بولعان كوپ بالالى وتباسىلارعا كومەك كورسەتەتۋ, جاستاردى جۇمىسقا ورنالاسۋعا, وقۋعا, بيزنەسپەن اينالىسۋعا كومەكتەسەتىن قوعامدىق قور. بۇگىندە قور جاس, ەرەسەك ەرىكتىلەر, كاسىپكەرلەر, جۇمىسشىلار مەن بەلسەندى ازاماتتاردى جاقسىلىق جاساۋدىڭ اينالاسىندا بىرىكتىرۋدە. قور قۇرىلعان 3 جىل ىشىندە قازاقستان بويىنشا ءۇش ميلليوننان استام ادامدى بىرىكتىرىپ, ەلىمىزدەگى از قامتىلعان 440 وتباسىنىڭ باسپانالى بولۋىنا ات سالىسقان.
اتالعان ءىس-شارادا اسار ءداستۇرى عانا جاڭعىرىپ قويماي, ساداق اتۋ, تەڭگە الۋ, اسىق اتۋ سياقتى ۇلتتىق ويىندار دا ويناتىلدى.
