قىرعىزستاننىڭ كابار اقپارات اگەنتتىگىنىڭ حابارلاۋىنشا, قىرعىزستان تۇرعىنى جەكە كولىگىنە 6 توننا قانت تيەپ, قازاقستانعا اكەلمەك بولعان. بىراق ول ءوز ەلىنىڭ شەكاراسىنان اسىپ كەتە المادى. قۇقىق قورعاۋشىلار «مەرسەدەس-بەنتس» اۆتوكولىگىن تەكسەرىپ, زاڭسىز تاۋاردى تاركىلەپتى. جۇرگىزۋشىنىڭ كورسەتكەن ىلەسپە قۇجاتتارىندا تۇيىرشىكتەلگەن قانتتى شەكارادان كىرگىزۋگە رۇقسات قۇجاتى بولماعان.
ايتا كەتەيىك, قىرعىزستان رەسپۋبليكاسى مينيسترلەر كابينەتىنىڭ قاۋلىسىمەن ەل اۋماعىنان اۋىل شارۋاشىلىعى ونىمدەرىنىڭ جەكەلەگەن تۇرلەرىن اكەتۋگە (ەكسپورتتاۋعا) ۋاقىتشا تىيىم سالۋ تۋرالى قاۋلى قابىلدانعان. اسىرەسە قۇجاتتا تۇيىرشىكتەلگەن قانت پەن قامىس قانتىن ەكسپورتتاۋعا رۇقسات جوق ەكەنى كورسەتىلگەن.
الەمدەگى قانت ءوندىرىسىن سارالاساق, اۋىل شارۋاشىلىعى عالىمدارىنىڭ ايتۋىنشا, قازىرگى كەزدە ەكولوگيالىق جاعدايدىڭ ناشارلاۋىنا بايلانىستى الەمدە قانت ءوندىرۋ ءىسى دە جىلدان-جىلعا ازايىپ بارادى. اسىرەسە ەۋرووداق ەلدەرىندە قانت ءوندىرۋ كورسەتكىشى تومەندەگەن.
ماسەلەن, 2019-2020 جىلدارى ەو ەلدەرى 17,25 ملن توننا قانت وندىرگەن. ال 2020-2021 جىلدارى 16,1 ملن تونناعا دەيىن تومەندەگەن. جالپى, ەۋروپا قىزىلشا قانتىنىڭ الەمدەگى ەڭ ءىرى ءوندىرۋشىسى, جاھانداعى قانت ءوندىرىسىنىڭ 20%-ىن قۇرايدى. قىزىلشادان قانتتى نەگىزىنەن فرانتسيا, بەلگيا, نيدەرلاند, گەرمانيا جانە پولشادا وندىرەدى. قۇرعاقشىلىق پەن قىزىلشانىڭ سارى ۆيرۋس اۋرۋى ەۋروپادا قانت ءوندىرىسىنىڭ تومەندەۋىنە ايتارلىقتاي ىقپال ەتتى.
سونىمەن قاتار الەمدەگى قانت ەكسپورتتاۋشى ەلدەردىڭ ءبىرى تايلاندتا 2019-2020 جىلدارى قانت ءوندىرىسى 7,9 ملن تونناعا دەيىن تومەندەگەن. ماماندار مۇنىڭ باستى سەبەبى ەلدەگى قۇرعاقشىلىق ەكەنىن ايتادى.
جالپى, دۇنيە جۇزىندەگى قانت قۇراعىنىڭ ءوندىرىسى 1,4 ملرد توننانى, ال قانت قىزىلشاسىنىڭ ۇلەسى 270 ملن توننانى قۇرايدى. قانت قۇراعىنان برازيليا – 27,7 ملن توننا, ءۇندىستان – 19,9 ملن توننا, قىتاي – 9,7 ملن توننا, اقش-تا 2,2 ملن توننا ءونىم وندىرەدى. الەم بويىنشا قانت قىزىلشاسىنىڭ ەگىستىگى 5 ملن گەكتار جەرگە ەگىلەدى.
بۇۇ-نىڭ ازىق-ت ۇلىك جانە اۋىل شارۋاشىلىعى ءبولىمىنىڭ اقپاراتىنا سايكەس قانت قىزىلشاسىنىڭ ءىرى وندىرۋشىلەرى رەسەي (45 ملن توننا), فرانتسيا (33 ملن توننا), اقش (31 ملن توننا), گەرمانيا (27 ملن توننا), ۋكراينا (18 ملن توننا), تۇركيا (15 ملن توننا) سانالادى. قازاقستانعا قانت نەگىزىنەن رەسەي مەن بەلارۋس مەملەكەتىنەن جەتكىزىلەدى.
