مودەلدە تسيفرلى تەڭگەنىڭ تەحنولوگيالىق ىسكە اسىرىلۋىن, الەۋەتتى ەكونوميكالىق پايدالار مەن شىعىنداردى, جۇيەنى رەتتەۋ مۇمكىندىكتەرىن, سونداي-اق ەكوجۇيەنى دامىتۋ الەۋەتىن باعالاۋ بويىنشا زەرتتەۋلەر قامتىلعان. تالداۋ قۇرالدارى رەتىندە تەحنولوگيالىق ەكسپەريمەنتتەر, ەكونوميكالىق مودەلدەۋ, مۇددەلى تاراپتارمەن ديزاين-سەسسيالار قاراستىرىلعان. 2022 جىلدىڭ 4-توقسانىندا نارىققا قاتىسۋشىلارمەن جانە تۇتىنۋشىلارمەن تسيفرلى تەڭگەنىڭ تەحنولوگيالىق پلاتفورماسىن وتپەلى تەستىلەۋ جوسپارلانىپ وتىر.
«زەرتتەۋ ناتيجەلەرىن وبەكتيۆتى ءتۇسىندىرۋ ماقساتىندا تاۋەلسىز حالىقارالىق ساراپشىلار مەن حالىقارالىق قارجى ۇيىمدارى قىزمەتكەرلەرىنىڭ قاتىسۋىمەن «تسيفرلى تەڭگە» جوباسىنىڭ كونسۋلتاتيۆتىك كەڭەسى قۇرىلدى. قارجى نارىعىنىڭ قاتىسۋشىلارىمەن تسيفرلى تەڭگەنىڭ ەكوجۇيەسىن قۇرۋ دا جوبانى دامىتۋداعى تابىستىلىقتىڭ ماڭىزدى فاكتورى. وسى ماقساتتار ءۇشىن كوللابوراتيۆتى الاڭ – Digital Tenge Hub قۇرىلدى, وعان نارىق قاتىسۋشىلارى, ينفراقۇرىلىمدىق ويىنشىلار, حالىقارالىق سەرىكتەستەر قاتىسادى. تسيفرلى تەڭگەنى ەنگىزۋ, ونىڭ ىشىندە وفلاين تولەۋ مۇمكىندىگى ارقىلى تولەم مەن قارجىلىق قىزمەتتەردىڭ قولجەتىمدىلىگىن ارتتىرادى», دەلىنگەن ۇب حابارلاماسىندا.
ساراپشىلاردىڭ ايتۋىنشا, تسيفرلى تەڭگە ينفراقۇرىلىمى قارجى نارىعىنا قاتىسۋشىلار مەن مەملەكەتتىك ورگاندار ءۇشىن قوسىمشا قۇرالعا اينالادى, بۇل سمارت-كونتراكت تەحنولوگياسى نەگىزىندە يننوۆاتسيالىق قىزمەتتەردى قۇرۋعا مۇمكىندىك بەرەدى. بولاشاقتا تسيفرلى تەڭگەنى ەنگىزۋ ترانسشەكارالىق تولەمدەردىڭ تيىمدىلىگىن دە ەسەلەيدى دەگەن ءۇمىت بار.
مودەل قۇرىلىمى سۇراقتار مەن تالداۋ كريتەريلەرىن ءتورت بلوكقا لوگيكالىق تۇردە توپتاستىرادى: تسيفرلى تەڭگە ارحيتەكتۋراسىنىڭ ديزاينىن انىقتايتىن نەگىزگى پارامەترلەر, ارحيتەكتۋراسى جانە ەكونوميكالىق ماسەلەلەردى ەسكەرە وتىرىپ, تسيفرلى تەڭگەنىڭ ديزاينىن ايقىنداۋ, تاڭدالعان تسيفرلى تەڭگە ديزاينىنىڭ ومىرشەڭدىگىن باعالاۋ, تۇجىرىمدامالىق وپەراتسيالىق جانە رەتتەۋشى مودەلدەردى تالداۋ.
«2022 جىلدىڭ سوڭىنا دەيىن زەرتتەۋ اياسىندا تەحنولوگيالىق ەكسپەريمەنتتەردىڭ, ساۋالنامالاردىڭ, ەكونوميكالىق مودەلدەۋدىڭ جانە قارجى نارىعىنا قاتىسۋشىلارمەن جانە ساراپشىلار قوعامداستىعىمەن تالقىلاۋ ناتيجەلەرىنىڭ كومەگىمەن باعالاناتىن تەحنولوگيالىق, ەكونوميكالىق جانە رەتتەۋشى اسپەكتىلەر تالدانادى. تسيفرلى تەڭگەنى ەنگىزۋ تۋرالى شەشىم 2022 جىلدىڭ سوڭىندا الەۋەتتى پايدالار مەن تاۋەكەلدەردى جان-جاقتى زەرتتەۋ, تەحنولوگيالىق اسپەكتىلەردى پىسىقتاۋ, اقشا-كرەديت ساياساتى مەن قارجىلىق تۇراقتىلىققا اسەرىن, سونداي-اق ۇلتتىق تولەم جۇيەسى مەن ونىڭ قاتىسۋشىلارى ءۇشىن ىقتيمال اسەردى باعالاۋ ناتيجەلەرى بويىنشا قابىلدانادى», دەپ مالىمدەيدى ۇب.
تولەم جانە قارجىلىق تەحنولوگيالاردى دامىتۋ ورتالىعىنىڭ باسقارما توراعاسى بينۋر جالەنوۆتىڭ ايتۋىنشا, تسيفرلى تەڭگەنى ەنگىزۋ ءبىر كۇننىڭ شارۋاسى ەمەس.
«تسيفرلى تەڭگەنى ەنگىزۋ ەلدىڭ قارجىلىق تۇراقتىلىعىنا جاعىمسىز اسەر بەرمەۋى كەرەك. تيىسىنشە, بۇل ءبىر كۇننىڭ شارۋاسى ەمەس. قازىر ماماندار تسيفرلى تەڭگە نە ءۇشىن قاجەت جانە ونى ەنگىزۋگە قازاقستاننىڭ ەكونوميكالىق ءھام تەحنولوگيالىق دايىندىعى بار ما دەگەن ماسەلەنى زەردەلەپ جاتىر. ءبىرىنشى كەزەكتەگى ماسەلە كيبەرقاۋىپسىزدىككە كەلىپ تىرەلەتىندىكتەن ىقتيمال تاۋەكەلدەر تارازىعا تارتىلادى», دەيدى ب.جالەنوۆ.
