كەشە بىرقاتار باق-تا جاقىن شەت ەلدەردەن قازاقستانعا اۆتوكولىك اكەلۋگە شەكتەۋ ەنگىزىلەدى دەگەن جاڭالىق جاريالاندى. اقپارات ۇكىمەت باسشىسىنىڭ دەپۋتاتتىق ساۋالعا بەرگەن جاۋابىنان الىنعان. پرەمەر-ءمينيستردىڭ ءباسپاسوز قىزمەتى وسىعان قاتىستى تۇسىنىكتەمە بەردى.
«بۇگىنگى تاڭدا شەتەلدىك كولىكتەردى زاڭنامانى بۇزا وتىرىپ ەلگە اكەلۋ جاعدايلارى جيىلەپ كەتتى. اتاپ ايتقاندا, ۇرلانعان نەمەسە كەپىلگە قويىلعان, جالعان ءنومىر تاعىلعان كولىكتەردى پايدالانۋ فاكتىلەرى انىقتالىپ جاتىر. وسىعان بايلانىستى قازاقستانعا «پروبلەمالىق» اۆتوكولىكتى اكەلۋدىڭ الدىن الۋ جانە جالپى اكىمشىلەندىرۋدى جاقسارتۋ ءۇشىن كولىك قۇرالدارىن اكەلۋ ەرەجەلەرى (ۋاقىتشا ەرەجەلەردى قوسا العاندا) ازىرلەنۋدە. وندا مۇنداي اۆتوموبيلدەرگە باقىلاۋدى كۇشەيتۋ, ءتىپتى ولاردى ەلگە اكەلۋدى شەكتەۋدى كوزدەيتىن تەتىكتەر قاراستىرىلادى», دەلىنگەن حابارلامادا.
ۇكىمەت بۇل شارالار شەت مەملەكەتتەردە تىركەلگەن, ەل اۋماعىنا زاڭدى جولمەن اكەلىنگەن جانە زاڭدى بۇزباي پايدالانىلاتىن اۆتوكولىكتەرگە قولدانىلمايتىنىن اتاپ ءوتتى.
پرەمەر-مينيستر ءباسپاسوز قىزمەتىنىڭ اقپاراتىنشا, بىلتىر باسقا ەلدەردىڭ قۇقىق قورعاۋ ورگاندارىمەن سالىستىرۋ قورىتىندىسى بويىنشا قازاقستانعا اكەلىنگەن 35 مىڭنان استام ءاۆتوموبيلدىڭ بانك تاراپىنان جانە زاڭ بويىنشا شەكتەۋلەرى بولعانى انىقتالدى.
سونىمەن قاتار 600-دەن استام كولىك ەلگە اكەلۋ كەزىندە ەاەو-عا مۇشە ەلدەردىڭ قۇقىق قورعاۋ ورگاندارىنىڭ ىزدەستىرۋىندە بولىپ شىقتى.
