اتالعان تاپسىرمانى ىسكە اسىرۋ ءۇشىن قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى دەپۋتاتتىق كورپۋسپەن بىرلەسىپ, وپەراتورلاردىڭ پايدالانۋشىلارعا ستاندارتتارعا, تەحنيكالىق نورمالار مەن ساپا كورسەتكىشتەرىنە سايكەس كەلمەيتىن بايلانىس قىزمەتتەرىن كورسەتكەنى ءۇشىن جاۋاپكەرشىلىگىن كۇشەيتۋگە باعىتتالعان شارالاردى ازىرلەدى.
ەندى بۇزۋشىلىقتار انىقتالعان جاعدايدا بايلانىس وپەراتورلارى 100 اەك ورنىنا 1000 اەك-كە ايىپپۇل سالادى, ال ءبىر جىل ىشىندە قايتالاپ بۇزعان جاعدايدا ايىپپۇل سوماسى 200-دەن 1500 اەك-كە دەيىن وسەدى.
ۆەدومستۆو جۇرگىزگەن تالداۋ ناتيجەلەرى بويىنشا, بايلانىس ساپاسىنىڭ ناشارلىعىنا شاعىمدار سانى 10 ەسە وسكەن. 2021 جىلدىڭ قورىتىندىسى بويىنشا مينيسترلىك 562 تەكسەرۋ جۇرگىزدى (2020 جىلى 51 تەكسەرۋ, ال 2019 جىلى 93 تەكسەرۋ جۇرگىزىلدى).
وپەراتورعا قاتىستى بايلانىستىڭ نەمەسە ينتەرنەتتىڭ ناشار ساپاسىنا تەكسەرۋ جۇرگىزۋ ءۇشىن قازاقستاندىقتار رەسمي ءوتىنىشتى تەلەكوممۋنيكاتسيالار كوميتەتىنىڭ نە ءتيىستى وبلىس مينيسترلىگىنىڭ اۋماقتىق بايلانىس ينسپەكتسياسىنىڭ مەكەنجايىنا «ەلەكتروندىق ۇكىمەت» پورتالى, «ە-وtinish» وتىنىشتەر بەرۋ جۇيەسى ارقىلى نە قاعاز تۇرىندە جولداۋلارى قاجەت. وتىنىشتە شاعىمنىڭ ءمانىن, بايلانىس وپەراتورىنىڭ اتاۋىن جانە تەكسەرۋ جۇرگىزۋ قاجەت ءوتىنىش بەرۋشىنىڭ ناقتى مەكەنجايىن كورسەتۋ قاجەت.
ءوتىنىشتى العاننان كەيىن پروكۋراتۋرا ورگاندارىندا تەكسەرۋدى تاعايىنداۋ تۋرالى اكت تىركەلەدى. تەكسەرۋ بارىسىندا كورسەتىلەتىن بايلانىس قىزمەتتەرىنىڭ ساپاسى بويىنشا ولشەۋلەر جۇرگىزىلەدى. وپەراتورعا قاتىستى بۇزۋشىلىقتار انىقتالعان جاعدايدا اكىمشىلىك قۇقىق بۇزۋشىلىق تۋرالى كودەكستىڭ 637-بابىنا سايكەس ايىپپۇل تۇرىندە اكىمشىلىك حاتتاما جاسالادى جانە لاۋازىمدى تۇلعا بەلگىلەگەن مەرزىمگە بۇزۋشىلىقتاردى جويۋ تۋرالى نۇسقاما ەنگىزىلەدى.
