2000 جىلدىڭ 6 شىلدەسىندە مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ قارۋلى كۇشتەرىندە ۇتقىر كۇشتەر قۇرىلدى. ولار كەيىننەن اەروۇتقىر اسكەرلەر بولىپ وزگەردى. ال 2017 جىلى زامان تالابىنا ساي دەسانتتىق-شابۋىلداۋ اسكەرلەرى دەگەن اتاۋ يەلەندى. قازىرگى ۋاقىتتا دەسانتتىق-شابۋىلداۋشى اسكەرلەر جوعارى ءموبيلدى جانە سوڭعى ۇلگىدەگى تەحنيكامەن جابدىقتالعان, نەگىزگى كۇشتەردەن, ونىڭ ىشىندە جاۋ تىلىندا باسقا دا تاپسىرمالاردى ءوز بەتىنشە ورىنداۋعا قابىلەتتى. ولاردىڭ جاۋىنگەرلىك قۋاتىن دەسانتتىق-شابۋىلداۋ, ارتيللەريالىق, بارلاۋ, بىتىمگەرلىك قۇرامالارى, بولىمدەر مەن بولىمشەلەر قۇرايدى.
دەسانتتىق-شابۋىلداۋ اسكەرلەرى بارلىق وقۋ-جاتتىعۋلارعا, سونىڭ ىشىندە حالىقارالىق جاتتىعۋلارعا ۇدايى قاتىسىپ ءجۇر. اتاپ ايتقاندا, ولار ارميا حالىقارالىق ويىندارىندا ناتيجەلى ونەر كورسەتتى. دەسانتشى-جاۋىنگەرلەر ءاردايىم وزدەرىنىڭ جوعارى دايىندىق دەڭگەيىن, كاسىبي شەبەرلىكتەرىن, اسا كۇردەلى تاپسىرمالاردى ورىنداۋعا قابىلەتتىلىگىن كورسەتىپ كەلەدى.
اۋە-دەسانتى دايىندىعى – اسكەردەگى ماڭىزدى ماسەلە. كوك تارلاندارى كۇندىز دە, تۇندە دە, ءتىپتى كۇردەلى مەتەورولوگيالىق جاعدايلاردا دا پاراشيۋتپەن سەنىمدى تۇردە سەكىرەدى. بىتىمگەرلىك قىزمەت اتقارۋدا دا دەسانتتىق-شابۋىلداۋ اسكەرلەرىنىڭ قوسقان ۇلەسى زور. «قازپولك» اسكەري قىزمەتشىلەرى 2003-2008 جىلدار ارالىعىندا يراكتاعى بىتىمگەرلىك ميسسياعا قاتىستى. 2018 جىلدان باستاپ «قازپولك» جانە «تىلەنديەۆ» بىتىمگەرلىك دايىندىق ورتالىعى بازاسىندا قازاقستاندىق بىتىمگەرلەر شەبەرلىگىن شىڭداپ كەلەدى.
دەسانتتىق-شابۋىلداۋ اسكەرلەرىندە قىزمەت ەتۋ قاشاندا ابىرويلى مىندەت سانالادى. بولىمدەر مەن بولىمشەلەردى جاساقتاۋعا قاتاڭ ىرىكتەۋ جۇرگىزىلەدى. مۇندا وتان الدىنداعى بورىشىن وتەۋگە كەلگەن مەرزىمدى اسكەري قىزمەتشىلەر تەر توگەدى. ادەتتە, ولاردىڭ سپورتتىق رازريادتارى بار جانە پسيحولوگيالىق تۇراقتىلىق دەڭگەيى جوعارى. «دەسانتشىلار – قانداي تاپسىرمالاردى ورىنداسا دا, انىق ءارى شەبەر ءىس-قيمىل جاساپ, باتىلدىق پەن ەپتىلىك كورسەتەتىن, شىدامدىلىعى مەن جاۋىنگەرلىك ماشىعى مىقتى, كەز كەلگەن ساتتە ەگەمەن قازاقستاندى قورعاۋعا ءازىر ناعىز جاۋىنگەرلەر», دەيدى قورعانىس مينيسترلىگىنىڭ وكىلدەرى.
