«2018 جىلدان باستاپ ايەل ادامداردىڭ زەينەتكەرلىك جاسى جىل سايىن 6 ايعا ارتىپ كەلەدى. وسى ۇدەرىس كەزەڭ-كەزەڭىمەن 10 جىلدا ىسكە اسىرىلادى. زەينەتاقى جاسىن بىرىزدەندىرۋ بيۋدجەت قاراجاتىن ۇنەمدەۋ ءۇشىن ەمەس, لايىقتى زەينەتاقى مولشەرىن قامتاماسىز ەتۋ ءۇشىن ەنگىزىلگەن. وزىڭىزگە بەلگىلى, قازاقستاندىقتار بيۋدجەتتەن بازالىق جانە ىنتىماقتى زەينەتاقىسىن الادى. ىنتىماقتى زەينەتاقى ازاماتتاردىڭ 1998 جىلعا دەيىنگى 2 ەڭبەك ءوتىلى مەن سوڭعى 3 جىلدىق تابىسى نەگىزىندە ەسەپتەلىنەدى. ناتيجەسىندە جىل سايىن بۇل تولەمنىڭ ءتۇرى كەمىپ, جيناقتاۋشى زەينەتاقى ۇلەسى وسەتىن بولادى. سوندىقتان, زەينەتاقى جاسىن تومەندەتۋ زەينەتاقى سالىمدارىنىڭ كولەمىنىڭ كەمۋىنە جانە وسى جۇيەدەن بەرىلەتىن تولەمدەردىڭ دە كۇرت قىسقارۋىنا الىپ كەلەدى», دەدى پرەمەر-مينيستر.
ونىڭ ايتۋىنشا, ءومىر ءسۇرۋ ۇزاقتىعىنىڭ وسۋىنە بايلانىستى زەينەتكەرلىك جاسىن كوتەرۋ ءۇردىسى دامىعان مەملەكەتتەردە دە, كورشىلەس ازەربايجان, ارمەنيا, رەسەي, بەلارۋس ەلدەرىندە دە قولعا الىنىپ جاتىر.
«وسى وزگەرىستەردى ەسەپكە الا وتىرىپ, ەلىمىزدە زەينەتاقى جۇيەسىنىڭ تيىمدىلىگىن ارتتىرۋدىڭ جاڭا شارالارى پىسىقتالىپ جاتىر. ولاردىڭ اياسىندا: 1) زەينەتاقىنىڭ مولشەرىن ارتتىرۋدى كوزدەيتىن زەينەتاقىمەن قامسىزداندىرۋ جۇيەسىنە پارامەترلىك وزگەرىستەر ەنگىزۋ; 2) ينفلياتسيا دەڭگەيىنەن 2%-عا اسا وتىرىپ, ىنتىماقتى زەينەتاقى مولشەرىن يندەكستەۋدى ساقتاۋ; 3) جۇمىسپەن قامتۋ مارتەبەسىنە بايلانىستى زەينەتكەرلىك جاسقا جاقىنداپ قالعان ايەلدەر ءۇشىن جاڭا قولداۋ شارالارىن انىقتاۋ. الەۋمەتتىك جوبالارعا تارتا وتىرىپ, جۇمىس ىستەمەيتىن ايەلدەردىڭ زەينەتاقى جۇيەسىنە قاتىسۋ مەرزىمىن ۇزارتۋ; 4) زەينەتاقىمەن قامسىزداندىرۋ جۇيەسىنىڭ دەموگرافيالىق ترەندتەرگە جانە بيۋدجەت كىرىستەرىنە تاۋەلدىلىگىن تومەندەتۋگە ارنالعان جيناقتاۋدىڭ شارتتى كومپونەنتىن ەنگىزۋ كوزدەلگەن. وسى شارالار زەينەتكەرلەردىڭ بارلىق ساناتتارى ءۇشىن زەينەتاقى تولەمدەرىنىڭ بارابار مولشەرىن قامتاماسىز ەتەدى», دەپ جاۋاپ بەردى ءاليحان سمايىلوۆ.
