پرەزيدەنت جارلىعىنىڭ جوباسىندا «ب» كورپۋسىنداعى مەملەكەتتىك قىزمەتشىلەردىڭ جۇمىسىن رەتتەۋگە قاتىستى نورمالارعا وزگەرتۋ ەنگىزۋ ۇسىنىلعان.
قۇجاتتىڭ تولىق اتاۋى – «مەملەكەتتىك قىزمەت وتكەرۋدىڭ كەيبىر ماسەلەلەرى تۋرالى» قازاقستان رەسپۋبليكاسى پرەزيدەنتىنىڭ 2015 جىلعى 29 جەلتوقسانداعى № 152 جارلىعىنا وزگەرتۋلەر مەن تولىقتىرۋلار ەنگىزۋ تۋرالى جارلىق جوباسى.
قۇجات جوباسىمەن بىرگە ۇسىنىلىپ وتىرعان وزگەرىستەر مەن قولدانىستاعى نورمالاردىڭ سالىستىرمالى كەستەسى بەرىلگەن. سول كەستەگە سايكەس, قولدانىستاعى جارلىقتىڭ 33-تارماعىنا كەلەسى وزگەرىس ەنگىزۋ ۇسىنىلىپ وتىر:
قازىر «ب» كورپۋسى قىزمەتشىلەرىنىڭ جۇمىسىن باعالاۋدىڭ 4 دەڭگەيلى شاكىلى (شكالا – رەد.) بەلگىلەنگەن – «قاناعاتتانارلىقسىز», «قاناعاتتانارلىق», ء«تيىمدى», «وتە جاقسى». مۇنداعى جەردە 4 دەڭگەيدىڭ مازمۇنى ناقتىلانا تۇسپەك. دالىرەك ايتساق, «لاۋازىمدىق مىندەتتەرىن ءتيىمدى اتقارادى», «لاۋازىمدىق مىندەتتەرىن ءتيىستى تۇردە اتقارادى», «لاۋازىمدىق مىندەتتەرىن قاناعاتتانارلىق دەڭگەيدە اتقارادى», «لاۋازىمدىق مىندەتتەرىن قاناعاتتانارلىقسىز دەڭگەيدە اتقارادى» دەگەن باعالاۋ دەڭگەيلەرى ەنگىزىلەدى.
قولدانىستاعى جارلىقتىڭ 35-تارماعىندا «ب» كورپۋسى قىزمەتشىلەرىنىڭ قىزمەتىن باعالاۋدىڭ ناتيجەلەرى ولاردىڭ قىزمەتتىك تىزىمدەرىنە ەنگىزىلەتىنى ايتىلعان. ۇسىنىلىپ وتىرعان ءتارتىپ بويىنشا بۇل تارماق الىنىپ تاستالماق, ياعني «ب» كورپۋسى قىزمەتشىلەرىنىڭ قىزمەتىن باعالاۋدىڭ ناتيجەلەرى ولاردىڭ قىزمەتتىك تىزىمدەرىنە ەنگىزىلمەۋى مۇمكىن.
قازىرگى تاڭدا تارتىپتىك جازاعا تارتىلعان مەملەكەتتىك ساياسي قىزمەتشى جاڭا تەرىس قىلىق جاساماسا جانە ءوزىن ادال قىزمەتكەر رەتىندە كورسەتسە, تارتىپتىك جازا التى اي وتكەنگە دەيىن الىنۋى مۇمكىن.
ۇسىنىلاتىن جوبادا بۇل تارتىپكە قوسىمشا تالاپ ەنگىزىلمەكشى, ياعني مەملەكەتتىك ساياسي قىزمەتشىلەرگە ورىنداماعانى نەمەسە تيىسىنشە ورىنداماعانى ءۇشىن تارتىپتىك جازالار قولدانىلعان كەزدە قازاقستان رەسپۋبليكاسى پرەزيدەنتىنىڭ, قازاقستان رەسپۋبليكاسى پرەزيدەنتى اكىمشىلىگى باسشىسىنىڭ جانە ونىڭ ورىنباسارلارىنىڭ تاپسىرمالارى بويىنشا ولاردى مەرزىمىنەن بۇرىن الىپ تاستاۋ قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى بويىنشا جۇرگىزىلەدى.
سونداي-اق جاڭا قۇجات اياسىندا مەملەكەتتىك قىزمەتشىلەردىڭ روتاتسيالاۋ مەرزىمى مەن روتاتسياعا جاتاتىن قىزمەتشىلەردىڭ ساناتتارىن كەڭەيتۋ كوزدەلىپ وتىر.
جارلىق جوباسىنىڭ تولىق ءماتىنى اشىق نقا سايتىنا ورنالاستىرىلعان. قۇجات 22 شىلدەگە دەيىن كوپشىلىك تالقىلاۋىندا بولادى.
