سپەكتاكلدى حورەوگراف كريستينا پولين قويعان بولاتىن. 5-6 جانە 8-9 شىلدەدە وتكەن پرەمەرالىق كورسەتىلىم بارىسىندا, تەاتردىڭ جاڭا تۋىندىسىنا ءتانتى بولعان كورەرمەن زور قوشەمەتىن ءبىلدىردى.
پرەمەرانى مادەنيەت جانە سپورت ءمينيسترى داۋرەن اباەۆ تا تاماشالادى.
«مەن ءۇشىن ساحناداعى ارەكەت – شىعارماشىلىق قيالدىڭ جەمىسى. مەن ءوز قويىلىمدارىما گرەك ميفولوگياسىنىڭ كەيىپكەرلەرىن قوسۋدى ۇناتامىن. ايتسە دە, ءميفتىڭ مازمۇنىن, سونىمەن قاتار, كەيىپكەرلەردىڭ مىنەز-قۇلقىن ءسال-ءپال وزگەرتەمىن. مەن ءۇشىن ەڭ باستىسى, سپەكتاكل مازمۇنىن بيشىلەردىڭ قيمىلىمەن جەتكىزە ءبىلۋ. ياعني, كوستيۋم, دەكوراتسيا, وزگە دە ساحنالىق بەزەندىرۋدى مەيلىنشە از قولدانۋعا تىرىسامىن. ەڭ ماڭىزدىسى – بي ارقىلى كوڭىل-كۇي ىرعاعىن جەتكىزۋ», دەگەن ويىمەن ءبولىستى قويۋشى-حورەوگراف كريستينا پولين.
«ورفەي مەن ەۆريديكا» بالەتى سازدى اۋەنىمەن, جۇرەك پەرنەسىن شەرتەر پسيحولوگيزم ءارى مۋزىكا مەن ءبيدىڭ ۇندەستىگىمەن ەرەكشەلەنەدى. قويىلىم سەرگەي پروكوفەۆ, ەدۋارد ۋيليام ەلگار, گەورگ فريدريح گەندەل, دەۆيدسون دجاكونەللو سىندى كومپوزيتورلاردىڭ اسەم اۋەندەرىمەن سۇيەمەلدەنگەن. كوستيۋمەر دەننيس پەشكەنىڭ ساحنالىق كوستيۋمدەرىندە وسى ءميفتىڭ سيمۆوليكاسى كورىنىس تاپسا, ستسەنوگراف وتتو بۋبەنيچەكتىڭ دەكوراتسياسىندا تاۋعا ۇقسايتىن بىركەلكى ەمەس, اينالى گەومەتريالىق كەسكىندەر قولدانىلدى.
دەگەنمەن, ەڭ باستىسى, حورەوگرافيا مەن استانالىق تەاتر ارتىستەرىنىڭ شەبەرلىگى. ورفەيدىڭ ءرولىن جەتەكشى سوليست سۇندەت سۇلتانوۆ پەن ءبىرىنشى سوليست ۋەسلي كارۆالو, مۋزا ءارى ورفەيدىڭ سۇيىكتىسىن جەتەكشى سوليست اينۇر ابىلعازينا مەن تاتيانا تەن, ال, ورتانقول جازۋشى اريستەيدىڭ بەينەسىن دارىندى بيشىلەر ەرقانات ەرماعامبەت پەن ەلدار سارسەمباەۆ سومدادى.
سونىمەن قاتار جاڭا قويىلىمعا يليا ماناەنكوۆ, نازەركە ايمۇحامەتوۆا, دارينا قايراشەۆا, بايقادام تۇنعاتاروۆ, ارتۋر ەدسون, ناتاليا فەرناندەس-مەنەس, اڭساعان كوبەنتاي, انار دۇكيەۆا, اققالي تۇرعالي, نۇرزات بەرىكقازى ۇلى جانە سەرىك امانجول سىندى تەاتر ارتىستەرى قاتىستى.
كەشتىڭ ەكىنشى بولىمىندە استانالىق كورەرمەن نازارىنا ۇسىنىلعان چەح ءفالسافاشى-حورەوگرافى يرجي كيلياننىڭ «جولدان تايعاندار» اتتى بالەتى دە سيمفونيالىق وركەستردىڭ ۇرمالى اسپاپتار توبىنىڭ سۇيەمەلدەۋىمەن ورىندالدى. كيليان حورەوگرافياسى مەن ستيۆەن رايحتىڭ داۋىلپاز كومپوزيتسياسىنىڭ شىعارماشىلىق ۇندەستىگىنىڭ جەمىسى – ساحناداعى سەگىز بالەرينانىڭ قالىقتاعان قيمىلىنان-اق ءبىلىنىپ وتىردى. حورەورافتىڭ تۋىندىسى اۋەزدىلىگىمەن, مونوحرومدى ەستەتيكا جانە ورىنداۋشىلىقتىڭ الەمدىك دەڭگەيىمەن ەرەكشەلەنەدى.
«بيىلعى تەاتر ماۋسىمى گاسترولدىك ساپارلار جاعىنان دا, ءتۇرلى جوبالار جاعىنان دا وتە مازمۇندى بولدى. پرەمەرالىق قويىلىمدار, سونىمەن قاتار, رەپەرتۋارداعى ۇزدىك سپەكتاكلدەر كورەرمەن نازارىنا ۇسىنىلدى. «ورفەي مەن ەۆريديكا» بالەتىنىڭ پرەمەراسى دا ويداعىداي ءوتتى. كورەرمەن زور ىقىلاسىن, قوشەمەتىن ءبىلدىردى. تەاتر سۇيەر قاۋىمنىڭ ارقاسىندا ءبىزدىڭ دە تىنىسىمىز اشىلىپ, تىڭ دۇنيەلەر شىعارۋعا تالپىنىپ, شابىتقا بولەنىپ, سۇيىكتى كورەرمەندەرىمىزبەن قايتا قاۋىشۋ ءۇشىن الداعى تەاتر ماۋسىمىن اسىعا كۇتەمىز», دەدى تەاتر ديرەكتورى الەكساندر سوۆوستيانوۆ.
استانا كۇنىنە ورايلاستىرىلعان پرەمەرا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلدى.
