ىرگەسى 2008 جىلى قالانعانىمەن, قارجى ماسەلەلەرىنە بايلانىستى قۇرىلىسى ون جىلعا سوزىلىپ كەتكەن زاۋىت 2018 جىلدىڭ جەلتوقسانىندا عانا ىسكە قوسىلعان ەدى. ودان كەيىن ەكى جىلعا جەتەر-جەتپەس ۋاقىت ىشىندە شارۋاسى تىعىرىققا تىرەلىپ, جۇمىسىن تاعى توقتاتتى. اراعا ەكى جىل سالىپ قايتا جۇمىس ىستەي باستاعان كاسىپورىن قازىر مەملەكەتتىك ستاندارتقا سايكەس تسەمەنتتىڭ 3 ءتۇرلى ماركاسىن شىعارا باستادى.
بۇگىندە زاۋىتتىڭ ورتالىق باسقارۋ پۋنكتى, ءونىمدى ولشەۋ, قاپتاۋ, جونەلتۋ جەلىلەرى توقتاۋسىز جۇمىس ىستەپ تۇر. كاسىپورىن زەرتحاناسىنىڭ باسشىسى ۆيكتور ياكيمەنكونىڭ ايتۋىنشا, مۇنداعى ءونىمنىڭ ساپاسى 27 ءتۇرلى تەستىلەۋ شارالارى ارقىلى تەكسەرىلەدى. ساپاسىنا قاراي سۇرىپتالعان تسەمەنت ودان كەيىن بيگ-بەگتەر مەن 50 كيلولىق قاپتارعا سالىنىپ, وبلىستاعى ساۋدا ورىندارى مەن وزگە دە وڭىرلەرگە جونەلتىلەدى. وڭتايلىسى, تاۋار اۆتوكولىكپەن دە, تەمىرجول ارقىلى دا تاسىمالدانادى.
– قازىرشە ايىنا 42 مىڭ توننا ءونىم شىعارىپ جاتىرمىز. جىل سوڭىنا دەيىن 280 مىڭ توننا تسەمەنت شىعارۋ كوزدەلىپ وتىر. كەلەسى جىلى ءوندىرىس اۋقىمىن ودان ءارى كەڭەيتىپ, ايلىق ءونىم كولەمىن 45-47 مىڭ تونناعا دەيىن جەتكىزۋدى جوسپارلاپ قويدىق. قازاقستان نارىعىندا سوڭعى جىلدارى وتە قاتاڭ باسەكەلەستىك بەلەڭ الىپ تۇر. بۇدان, ارينە, جاسقانبايمىز, ويتكەنى ءبىزدىڭ ونىمدەر وزگە زاۋىتتاردىڭ ونىمدەرىمەن تەڭ باسەكەگە تۇسە الاتىنىنا سەنىمدىمىن. ەلىمىزدىڭ ءار ايماقتارىنداعى زاۋىتتارىمىزدى تۇتاستاي العاندا, ءبىز جىلىنا 16 ملن توننا تسەمەنت شىعارا الامىز. ال نارىقتاعى سۇرانىستىڭ كولەمى شامامەن 9 ملن تونناداي عانا بولادى. شيكىزات – وزىمىزدىكى. شيكىزاتتىڭ قۇرامىندا نەگىزىنەن كالتسيت تۇيىرشىكتەرى ارالاس اكتاس باسىم. وسى جەردەن 100 شاقىرىم قاشىقتاعى كەنىشتەن اكەلىپ جاتىرمىز, – دەيدى زاۋىت ديرەكتورى ۆاسيلي زايارنىي.
وڭىردەگى قۇرىلىس جۇمىستارى باسەڭدەمەسە, رۋدنىي تسەمەنت زاۋىتىنىڭ ونىمدەرىنە دە سۇرانىس جوعارى بولاتىنى انىق. بيىل قوستانايدا عانا ەمەس, رۋدنىي قالاسى مەن قاشار كەنتىندە دە تۇرعىن ءۇي قۇرىلىسى قارقىندى.
– رۋدنىيدا 60 پاتەرلى, 5 قاباتتى ءبىر ءۇي سالۋعا شامامەن 100 توننا تسەمەنت پايدالانىلادى. جاڭا اشىلىپ جاتقان جەرگىلىكتى كاسىپورىنعا قولداۋ كورسەتۋ ماڭىزدى. سوندىقتان مەردىگەرلەرگە قۇرىلىسقا جەرگىلىكتى ءونىمدى جاراتۋعا كەڭەس بەرىپ, وسى باعىتتا جۇمىس جۇرگىزەمىز, – دەيدى رۋدنىي قالالىق قۇرىلىس ءبولىمىنىڭ باستىعى داۋرەن جاكەنوۆ.
«سترويەليتدوم» قۇرىلىس كومپانياسىنىڭ تەحنيكالىق ديرەكتورى باتىربەك بيتاسوۆتىڭ ايتۋىنشا, رۋدنىيدا شىعىپ جاتقان تسەمەنتتىڭ ساپاسى جوعارى. اتالعان كومپانيا زاۋىتپەن كەلىسىمشارتقا وتىرىپ, قوستانايدا جاڭادان ىرگەسى قالانىپ جاتقان تۇرعىن ءۇي كەشەنىنە جەرگىلىكتى ءونىمدى پايدالانۋدى ءجون كورىپ وتىر.
رۋدنىي تسەمەنت زاۋىتىنىڭ جاڭا باسشىسى ۆاسيلي زايارنىي 30 جىلدان بەرى تسەمەنت ونەركاسىبىندە جۇمىس ىستەپ كەلەدى. بۇعان دەيىن شىعىس قازاقستان وبلىسىنداعى سالالاس ءوندىرىس ورنىنا باسشىلىق ەتكەن تاجىريبەلى مامانعا ءبىر رەت ء«ولىپ, تىرىلگەن» زاۋىتتى تەحنيكالىق تۇرعىدان قايتا وڭالتۋ ماسەلەسى جۇكتەلىپ وتىر.
– بۇل كاسىپورىنداعى وندىرىستىك قۇرال-جابدىقتار جاقسى جاعدايدا ساقتالعان, ءتىپتى جاڭا دەسە دە بولادى. زاۋىت قىتاي جوباسى ارقىلى سالىنعان. پەشى مەن نەگىزگى توراپتارىنىڭ ءبارى قىتايدا جاسالعان. تەك قاپتاۋ ماشيناسى عانا يتاليانىكى. كەيبىر قۇرىلعىلار مەن توراپتاردى قايتا جوندەۋدەن وتكىزۋگە تۋرا كەلدى. بۇل مىندەتتەردى تولىق اتقاردىق. بىراق كادر ماسەلەسى شەشىلمەي تۇر, جۇمىسشىلار جەتىسپەيدى. زاۋىتتىڭ جالپى شتاتى 280 ادامنان تۇرادى. ەگەر ەرتەڭ 120 ادام كەلسە, ءبارىن دە جۇمىسقا الار ەدىك. ەڭ تومەنگى جالاقى – 120 مىڭ تەڭگە. قازىر سارىباي-سوكولوۆ كەن بايىتۋ كومبيناتىندا قانداي ماماندار جۇمىس ىستەپ جاتىر, بىزگە دە سونداي ماماندار كەرەك. ايىرماشىلىعى, مۇنداعى كۇيدىرەتىن پەش اينالىپ تۇرادى, وعان سالالىق ماماندار قاجەت, – دەيدى زاۋىت باسشىسى.
رۋدنىي زاۋىتى بىلتىر جىل بويى مۇلدە جۇمىس ىستەمەي تۇرعاندىقتان, جۇمىسشىلارىنىڭ ەڭبەكاقىسىن دا تولەي المادى. كاسىپورىن الداعى ۋاقىتتا التىجىلدىققا جوسپارلانعان قايتا وڭالۋ كەزەڭىن باستادى. ال جۇمىسشىلاردىڭ ەڭبەكاقىسى مەن ءبىرسىپىرا قوردالانىپ قالعان وزگە قارىزدار ءونىمنىڭ وتۋىنە قاراي كەزەڭ-كەزەڭىمەن وتەلەدى.
قوستاناي وبلىسى
