كەلەسى اپتادا جاپونيا پارلامەنتىنىڭ جوعارعى پالاتاسىن سايلاۋ وتەدى. سيندزو ابە وسى سايلاۋ الدى ناۋقانعا اتسالىسۋ ءۇشىن جاپونيانىڭ وڭتۇستىگىندەگى نارا قالاسىندا ۇيىمداستىرىلعان ميتينگكە قاتىسقان. ول حالىقتى ءوز پارتياسىنىڭ كانديداتىن قولداۋعا شاقىرىپ, ءسوز سويلەپ تۇرعان كەزىندە قاسكوي شابۋىل جاساعان.
«ول سويلەپ جاتىر ەدى, ارتقى جاقتان ءبىر ادام اتىپ شىقتى. كەنەتتەن وق اتتى. ءبىرىنشى اتىلعان وقتىڭ دىبىسى ويىنشىق مىلتىقتىڭ ۇنىنە ۇقساعان سەكىلدى بولدى. ابە قۇلاعان جوق, قاتتى دىبىس ەستىلدى. ەكىنشى وقتان جارقىل كورىندى, ودان سوڭ ءتۇتىن...», دەپ وقيعانى باياندايدى فرانس پرەسس ءتىلشىسى جاپوندىق NHK تەلەارناسىنا سىلتەمە جاساپ. وقيعا ورنىنان تۇسىرىلگەن فوتوسۋرەتتەردەن ونىڭ اق كويلەگىندەگى قان داقتارىمەن جەردە جاتقانىن كورۋگە بولادى. بۇرىنعى پرەمەر-ءمينيستردى جەدەل جاردەممەن جاقىن ماڭداعى اۋرۋحاناعا جەتكىزگەن. جەرگىلىكتى ۋاقىت بويىنشا 17:03-تە سيندزو ابە العان جاراقاتتارىنان اۋرۋحانادا كوز جۇمدى. ابەنى امان الىپ قالۋعا تىرىسقان دارىگەرلەر ءتورت جارىم ساعات بويى ونىڭ ءومىرى ءۇشىن كۇرەسكەنىن ايتادى. وعان وتە كوپ مولشەردە دونورلىق قان قۇيىلعان. بيلىك وقتىڭ ءبىرى مويىننىڭ وڭ جاعىنا تيگەنىن جانە ابەنىڭ كەۋدە تۇسىنان قان كەتكەنىن راستادى.
كۇدىكتى 41 جاستاعى تەتسۋيا ياماگاميدى پوليتسيا وقيعا ورنىندا ۇستاپ, قارۋىن تاركىلەگەن. ول ەشقانداي قارسىلىق كورسەتپەگەن. جەرگىلىكتى اقپارات قۇرالدارىنىڭ حابارلاۋىنشا, تەتسۋيا بۇرىن جاپونيانىڭ تەڭىزدەگى ءوزىن-ءوزى قورعاۋ كۇشتەرىنىڭ قۇرامىندا بولعان. جۇما كۇنگى ءباسپاسوز ءماسليحاتىندا پوليتسيا قارۋلى ادامنىڭ ابەمەن بايلانىسى بار دەپ ەسەپتەيتىن ء«بىر توپ ادامعا» وشپەندىلىك تانىتقانىن مالىمدەدى.
ەلدىڭ قورعانىس ءمينيسترى نوبۋو كيشي بۇرىنعى پرەمەر-مينيسترگە جاسالعان شابۋىلدى كەشىرىلمەس كۇنا دەپ اتاپ ءوتتى. جاپونيا ۇكىمەتىنىڭ باس حاتشىسى حيروكازۋ ماتسۋنو «بۇل مۇلدەم كەشىرىلمەيتىن ايۋاندىق ارەكەت» دەدى. «بۇل قارۋعا يەلىك ەتۋ قاتاڭ شەكتەلگەن جانە ساياسي زورلىق-زومبىلىق جوق ەلدىڭ حالقى ءۇشىن اۋىر وقيعا بولدى, ەلدى ەسەڭگىرەتىپ تاستادى», دەيدى «بي-بي-سي» اقپارات اگەنتتىگىنىڭ توكيوداعى ءتىلشىسى. ەلدىڭ قازىرگى پرەمەر-ءمينيسترى فۋميو كيشيدا بولسا ءىسساپارىنان ورالىپ, بارلىق مينيسترگە توكيوعا كەلۋدى
بۇيىرعان.
جاپونيادا مىلتىقپەن زورلىق-زومبىلىق كورسەتۋ وتە سيرەك كەزدەسەدى. مۇندا تاپانشا يەلەنۋ مۇمكىن ەمەس, ساياسي شابۋىلدار دا جوقتىڭ قاسى. الەمدىك باق-تىڭ مالىمەتىنە سۇيەنسەك, سيندزو ابەنىڭ قاسىندا ارنايى قىزمەتتىڭ كۇزەتشىلەرى بولعان. دەگەنمەن وق اتقان ادامنىڭ وعان بىرنەشە مەتر قاشىقتىققا جاقىنداۋىنا ەشقانداي كەدەرگى كەلتىرە الماعان.
سيندزو ابە ەلدىڭ پرەمەر-مينيستر لاۋازىمىنا ەكى رەت تاعايىندالدى. ول –جاپونيا ۇكىمەتىنىڭ وزگە باسشىلارىنا قاراعاندا بۇل قىزمەتتى ەڭ ۇزاق ۋاقىت اتقارعان تۇلعا. ابە مىرزا 2020 جىلى دەنساۋلىعىنا بايلانىستى وتستاۆكاعا كەتتى. Reuters اگەنتتىگىنىڭ مالىمەتىنە ساي, ول بيلەۋشى ليبەرالدىق-دەموكراتيالىق پارتيانىڭ ىقپالدى تۇلعاسى سانالادى جانە پارتياداعى نەگىزگى فراكتسيالاردىڭ ءبىرىن باقىلاعان.
سيندزو ابە – جاپونيانىڭ بۇرىنعى سىرتقى ىستەر ءمينيسترىنىڭ ۇلى جانە بۇرىنعى پرەمەر-ءمينيستردىڭ نەمەرەسى. ۇكىمەت باسىنا 2006 جىلى كەلىپ, جاپونيانىڭ سوعىستان كەيىنگى تاريحىنداعى ەڭ جاس پرەمەر-مينيستر اتاندى. ابە ۇكىمەت تىزگىنىن ۇستاعان باستاپقى كەزەڭ ونىڭ پارتياسى ءۇشىن جانجالدار مەن ساياسي ماسەلەلەرگە تولى بولدى. ءبىر جىلدان كەيىن ول وتستاۆكاعا كەتتى. ايتسە دە 2012 جىلى سيندزو ابە ۇكىمەت باسشىلىعىنا قايتا تاعايىندالدى. بۇل قىزمەتتى 2020 جىلعا دەيىن ۇلكەن ابىرويمەن اتقارعان.
سيندزو ابە بيلىگى كەزىندە فۋكۋسيما اپاتىنىڭ سالدارىمەن كۇرەسىپ, دونالد ترامپپەن تىعىز قارىم-قاتىناس ورناتىپ, ۆلاديمير پۋتينمەن كۋريل ارالدارى تۋرالى كەلىسسوزدەر جۇرگىزۋگە تىرىسقان. نەگىزى, كۋريل ارالدارى ءاۋ باستا جاپونياعا تيەسىلى بولاتىن. وسى ارالداردى قايتارىپ الۋ ماقساتىمەن س.ابە رەسەي پرەزيدەنتى ۆلاديمير پۋتينمەن 27 رەت كەزدەستى. 2019 جىلى كرەملدەگى كەزدەسۋدەن كەيىن ابە مەن پۋتين 1956 جىلعى دەكلاراتسياعا نەگىزدەلگەن ەلدەر اراسىنداعى بەيبىت كەلىسىمدى تالقىلاۋعا دايىن ەكەندىگىن مالىمدەدى. وسىدان كەيىن 2019 جىلى تاعى بىرنەشە كەلىسسوز ءوتتى. 2020 جىلى جاپوندىق باق ابەنىڭ ماسكەۋدەگى جەڭىس شەرۋىنە باراتىنىن جاريالادى. بىراق پاندەمياعا بايلانىستى بۇل جوسپار ورىندالمادى. بيىلعى مامىردا The Economist باسىلىمىنا بەرگەن سۇحباتىندا سيندزو ابە وڭتۇستىك كۋريل ارالدارىن جاپونياعا بەرۋ ماسەلەسىندە العا ىلگەرىلەۋ بار ەكەنىن, ۆلاديمير ءپۋتيننىڭ كەزدەسۋگە دايىن ەكەنىن ايتقان بولاتىن. بىراق بۇل ماقساتىنا جەتە المادى.
سيندزو ابە سونداي-اق حالىقارالىق ساياساتقا قاتىستى كوزقاراسى, ەلدىڭ بۇرىننان قالىپتاسقان انتيميليتاريستىك كوڭىل كۇيىنە قايشى كەلەتىنى جانە «ابەنوميكس» دەپ اتالاتىن ەكونوميكانى قالپىنا كەلتىرۋدىڭ باتىل ستراتەگياسى ارقىلى تانىمال. كونسەرۆاتيۆتىك ۇلتشىلدىقتى جاقتاۋشى ابە ەكى جالپى سايلاۋدا جەڭىسكە جەتكەن جاپونيانىڭ ليبەرالدىق-دەموكراتيالىق پارتياسىن (LDP) باسقاردى.
سيندزو ابەنىڭ كەزىندە قىتاي جانە وڭتۇستىك كورەيامەن ديپلوماتيالىق قارىم-قاتىناستارىندا تۇسىنىسپەۋشىلىك تۋىندادى. اتاپ ايتقاندا, 2013 جىلدان بەرى كورشىلەس ەلدەردە جاپون ءميليتاريزمىنىڭ سيمۆولى سانالاتىن توكيوداعى ياسۋكۋني حرامىنا تۇراقتى تۇردە بارىپ تۇراتىنى شەتەلدىك ارىپتەستەرىنىڭ شىمبايىنا باتتى. نىسان ەكىنشى دۇنيەجۇزىلىك سوعىستان كەيىن قازا تاپقان جاپوندىقتاردى, سونىڭ ىشىندە ءولىم جازاسىنا كەسىلگەن اسكەري قىلمىسكەرلەردى ەسكە الۋعا ارنالعان. جاپونيانىڭ سولشىل دەموكراتيالىق فراكتسيالارى دا ابەنىڭ وسى عيباداتحاناعا بارۋىن ەل تاريحىن اقتاۋ جانە جاپوندىق اسكەريلەردىڭ كورشىلەرىنە جاساعان سۇمدىق قىلمىستارىن ۇمىتۋ ارەكەتى رەتىندە قاراستىرىپ, نارازىلىقتارىن بىلدىرگەن ەدى.
2015 جىلى سيندزو ابە ۇجىمدىق ءوزىن-ءوزى قورعاۋ تۋرالى زاڭنىڭ قابىلدانۋىنا قول جەتكىزدى. قۇجاتقا سايكەس, جاپونيا بيلىگى ەكىنشى دۇنيەجۇزىلىك سوعىستان كەيىن العاش رەت جاپونيانى نەمەسە شابۋىلعا ۇشىراعان دوس ەلدەردى قورعاۋ ماقساتىندا شەتەلدەگى سوعىس قيمىلدارىنا قاتىسۋعا ءوزىن-ءوزى قورعاۋ كۇشتەرىن جىبەرە الادى. كوپشىلىكتىڭ قارسىلىعىنا قاراماستان, جاپون پارلامەنتى بۇل زاڭدى قابىلدادى.
وسىلايشا, سيندزو ابە جالپىعا جاققانىمەن, جالقىعا جاقپاي 67 جاسىندا وققا ۇشىپ مەرت بولدى.
