«7 شىلدەدە تاڭعى ساعات 4:58 شاماسىندا, «102» پۋلتىنە وبلىس ورتالىعىندا ورنالاسقان ويىن كلۋبىنىڭ كاسسيرى حابارلاستى. جابىرلەنۋشىنىڭ ايتۋىنشا, بەتپەردە تاققان بەلگىسىز بىرەۋلەر ويىنحاناعا قاراقشىلىق شابۋىل جاساعان. ياعني بەتپەردە كيگەن, قولىندا قارۋى بار ەكى ەر ادام كىرىپ, ايتقان تالاپتارىن ورىنداماسا دەنە جاراقاتىن سالامىز دەپ قورقىتقان. ودان ارى جاس جىگىتتەر ارام ويىن ىسكە اسىرىپ, ويىنحاناداعى كاسسا جاشىگىن بۇزىپ, ىشىنەن 350 000 تەڭگە اقشانى الىپ, ءىزىن سۋىتقان», دەدى تۇركىستان وبلىسى پد باستىعىنىڭ ورىنباسارى پوليتسيا پولكوۆنيگى قۇرمانبەك ساحوۆ.
دەرەك قر قك-ءنىڭ 192-بابى 2-بولىگى «قاراقشىلىق» بويىنشا تىركەلگەن.
تۇركىستان وبلىسى كريمينالدىق پوليتسيا باسقارماسى مەن تۇركىستان قالالىق پوليتسياسىنىڭ تاجىريبەلى قىزمەتكەرلەرىنەن ارنايى جەدەل-تەرگەۋ توبى قۇرىلعان. جاقىن ماڭداعى اۋماقتار قارالىپ, ىقتيمال كۋالاردان جاۋاپ الىندى. بەينەباقىلاۋ كامەرالارى تەكسەرىلگەن. جان-جاقتى جەدەل-ىزدەستىرۋ ءىس-شارالارى ناتيجەسىندە ەكى تاۋلىك ىشىندە كۇدىكتى رەتىندە ەكى تۇرعىن انىقتالىپ, ۇستالعان.
«تەرگەۋ بارىسىندا جاس جىگىتتەر قىلمىس جاساعانىن مويىنداپ, ۇرلانعان اقشانى جەكە قاجەتتىلىكتەرىنە جۇمساعانىن جەتكىزدى. سونىمەن قاتار, كۇدىكتىلەردىڭ ءبىرى قولىنداعى تاپانشا ويىنشىق ەكەنىن, ونى قالا بازارلارىنىڭ بىرىنەن ساتىپ العانىن ايتتى. ال قاراقشىلىق شابۋىل جاساعاننان كەيىن ول قارۋدى دارەتحاناعا تاستاعان. ويىنشىق تاپانشا زاتتاي دالەل رەتىندە تاركىلەنىپ الىندى», دەدى قۇرمانبەك ساحوۆ.
قازىرگى ۋاقىتتا سوتالدى تەرگەۋ امالدارى جۇرگىزىلىپ جاتىر. كۇدىكتىلەر قاماۋدا.
