بۇعان دەيىن شاھارداعى تۇركىستان جانە ماڭگىلىك ەل كوشەلەرىندەگى جولدى ەكىگە ءبولىپ تۇرعان قۇرىلىستار تولىعىمەن ءسۇرىلىپ, كولىكتەردىڭ ەركىن قاتىناۋىنا جول اشىلعان بولاتىن. ەندىگى كەزەكتە ءدال وسىنداي جۇمىس تۇران داڭعىلىندا دا ىسكە اسىرىلماق.
«تۇران داڭعىلىنا قاتىستى دا وسىنداي جوسپارىمىز بار. قازىر جوبالاپ جاتىرمىز. ونىڭ بارىنە دەمونتاج جاساپ, كوشەنى كەڭەيتەمىز. سوندا ەكى جاقتان دا سولعا بۇرىلۋ جەڭىل بولادى. ول جوسپارىمىزدا بار. بۇل جۇمىس كەلەسى جىلى ىسكە اسىرىلادى. بيىل ۇلگەرە المايمىز», دەدى قالا باسشىسى.
بۇدان بولەك, التاي كولگىنوۆ نۇر-سۇلتاندا 146 پروبلەمالى ۋچاسكەدە سۋ باسۋ ماسەلەسى شەشىلگەنىن اتاپ ءوتتى. ونىڭ ىشىندە جاڭبىر جاۋعان كەزدە قالانىڭ ەڭ پروبلەمالى اۋماعى سانالاتىن ب.مومىش ۇلى داڭعىلىنداعى ماسەلە تولىعىمەن شەشىلگەن ەكەن.
«قالا بويىنشا 130 شاقىرىمنان استام نوسەر كارىزى مەن ارىق-ناۋا جۇيەسى سالىندى, 1 مىڭعا جۋىق باقىلاۋ جانە جاڭبىر قابىلداعىش قۇدىق, سونداي-اق 20 كم كوللەكتور تازارتىلدى, 6,5 مىڭ قۇبىر بۋلاندىرىلىپ, 350 تونناعا جۋىق تۇنبا قالدىق شىعارىلدى. بۇدان باسقا, جاستار شاعىن اۋدانىندا (تاشەنوۆ پەن اممان كوشەلەرىنىڭ قيىلىسى) جەتكىزۋشى كوللەكتورلاردى قايتا جاڭعىرتۋ ارقىلى تازارتۋ قۇرىلىسى سالىندى. ول تاشەنوۆ, باراەۆ, ءۋاليحانوۆ, پۋشكين, يمانباەۆ كوشەلەرىنىڭ, رەسپۋبليكا, تاۋەلسىزدىك داڭعىلدارىنىڭ جوعارعى بولىگىندە سۋ باسۋ ماسەلەسىن شەشۋگە مۇمكىندىك بەردى», دەدى ەلوردا اكىمى التاي كولگىنوۆ.
