كوميتەت تاۋارلاردى جونەلتۋشى ەلدىڭ ەكسپورتتىق دەكلاراتسيالارىنان اقپاراتپەن ءوزارا الماسۋ تۋرالى حالىقارالىق شارتتاردى جاساسۋ بويىنشا جوسپارلى جۇمىس جۇرگىزۋدە.
ناقتى ۋاقىت رەجيمىندە تاۋارلاردىڭ قۇنىن جانە ولاردىڭ جونەلتۋشى ەلدە ەكسپورتى كەزىندە كورسەتىلگەن سانىن قازاقستاننىڭ كەدەندىك دەكلاراتسيالارىندا قازاقستاندىق يمپورتتاۋشىلار مالىمدەگەن مالىمەتتەرمەن سالىستىرۋ تەتىگى ىسكە اسىرىلدى.
بۇل رەتتە, دەكلارانتتاردىڭ تاۋارلار تۋرالى جالعان اقپارات جاريالاۋ فاكتىلەرى انىقتالۋدا.
«ماسەلەن, وسى جىلدىڭ مامىر ايىندا قحر-دان ليۋسترالار يمپورتتالدى. دەكلارانت پارتيانىڭ قۇنىن 11 مىڭ دوللارعا كورسەتتى. الايدا قىتايدىڭ كەدەن قىزمەتىنەن اقپارات سۇراتىلىپ, ولاردىڭ مالىمەتتەرى بويىنشا ەكسپورت كەزىندە بۇل جۇكتىڭ قۇنى 240 مىڭ دوللاردى قۇراعانى انىقتالعان.
وسىلايشا, يمپورتتالعان تاۋارلاردىڭ قۇنى 22 ەسە تومەندەتىلدى, ال ورىندالماعان سالىق مىندەتتەمەلەرىنىڭ سوماسى 25 ميلليون تەڭگەنى قۇرادى», دەلىنگەن حابارلامادا.
قحر-نىڭ كەدەن قىزمەتىنىڭ مالىمەتتەرىنە سايكەس, قازاقستانعا ەكسپورتتالاتىن جۇكتەردىڭ بىرىندە «Smart-تەلەديدار» تاۋارى جونەلتىلگەن. الايدا يمپورتتاۋشى كەدەندىك تولەمدەردى تولەۋدەن جالتارۋ ماقساتىندا «تەلەۆيزيالىق قوراپ» تاۋارىن كورسەتكەن.
وسىعان وراي كەدەندىك ساراپتاما جۇرگىزىلىپ, قىتايدان كەلگەن دەرەكتەر راستالدى.
«جۇرگىزىلگەن جۇمىستىڭ ارقاسىندا اعىمداعى جىلدىڭ ءبىرىنشى جارتىجىلدىعىندا جالپى سوماسى 15,8 ميلليارد تەڭگە تاۋارلاردىڭ كەدەندىك قۇنىن تومەندەتۋ فاكتىلەرىنىڭ جولى كەسىلدى, سونداي-اق قازاقستانداعى يمپورت پەن قىتايدان ەكسپورت اراسىنداعى ايىرماشىلىق 1,4 ميلليارد دوللارعا دەيىن تومەندەدى. 2017 جىلى بۇل كورسەتكىش 6,8 ميلليارد دوللارمەن 59% قۇراعان», دەدى مەملەكەتتىك كىرىستەر كوميتەتى.
سىرتقى ەكونوميكالىق قىزمەتتىڭ كەيبىر قاتىسۋشىلارى قابىلدانعان شەشىمدەرمەن كەلىسپەيتىنىن اتاپ وتكەن ءجون. ولار مەملەكەتتىك كىرىستەر كوميتەتىنىڭ جۇرگىزىلىپ جاتقان جوسپارلى جۇمىسىنىڭ بەدەلىن تۇسىرۋگە بارىنشا تىرىسىپ, زاڭدى تۇردە بەلگىلەنگەن تولەمدەردى تولەۋدەن جالتارىپ باعۋدا.
بۇگىنگى تاڭدا كوميتەت قىتايمەن, ازىربايجانمەن, گرۋزيامەن, ۋكراينامەن, وزبەكستانمەن, يرانمەن, تۇركىمەنستانمەن جانە تۇركيامەن اقپارات الماسۋ تۋرالى شارتتار جاساستى.
سونداي-اق ءتيىستى كەلىسىم جاساسۋ ءۇشىن تاجىكستان كەدەن قىزمەتىمەن كەلىسسوزدەر جۇرگىزىلۋدە.
وسى باعىتتاعى جۇمىستار الداعى ۋاقىتتا دا ءوز جالعاسىن تابادى.
ايانا توعانبەك
