قالا باسشىلىعىمەن بىرلەسىپ بەينەكونفەرەنتسبايلانىس رەجيمىندە قالانىڭ اۋرۋحانالارى مەن ەمحانالارىنىڭ 70-تەن استام باس دارىگەرىنىڭ قاتىسۋىمەن كەڭەس ءوتتى.
قازىرگى ۋاقىتتا ىندەتتىڭ تارالۋ قارقىنى بويىنشا الماتى سارى ايماقتا ورنالاسقان.
ۆيرۋس جۇقتىرۋ جاعدايى 0,2%-عا دەيىن ءوستى, ال ونىڭ تارالۋ كوەففيتسيەنتى 1-دەن جوعارى. جۇقتىرۋ وشاقتارىنىڭ ەڭ كوپ سانى بوستاندىق, المالى, الاتاۋ جانە مەدەۋ اۋداندارىنىڭ اۋماعىندا ورنالاسقان.
ينفەكتسيانىڭ ءوسۋ سەبەپتەرى مەن كوزدەرى - قوعامدىق ورىندارعا بارۋ, ۇيدەگى, قالالىق كولىكتەگى, جۇمىس ورنىنداعى بايلانىستار, سونداي-اق ۆاكتسيناتسيا مەن رەۆاكتسيناتسيا قارقىنىنىڭ تومەندەۋى.
وسى ورايدا قالا اكىمشىلىگى ۆاكتسينالاۋ مەن رەۆاكتسيناتسياعا, ناۋقاستاردى وقشاۋلاۋعا باقىلاۋدى كۇشەيتۋ, نەگىزگى الدىن الۋ شارالارىن ساقتاۋ قاجەتتىلىگى تۋرالى حالىقپەن ءتۇسىندىرۋ جۇمىستارىن جۇرگىزدى.
سونىمەن قاتار الماتىدا پاندەميانىڭ جاڭا تولقىنىنا 7000 توسەك-ورنى بار 23 كوۆيدتىك كلينيكا, ونىڭ ىشىندە 250 رەانيماتسيالىق كلينيكا دايىندالدى.
قر پرەمەر-ءمينيسترىنىڭ ورىنباسارى ەرالى توعجانوۆ ۆاكتسيناتسيا مەن رەۆاكتسيناتسيانى ۇيىمداستىرۋدىڭ, قالانىڭ دەنساۋلىق ساقتاۋ جۇيەسىنىڭ كوروناۆيرۋستىق ينفەكتسيامەن سىرقاتتانۋشىلىقتىڭ كەزەكتى وسۋىنە دايىندىعىنىڭ ماڭىزدىلىعىنا نازار اۋداردى.
«بۇگىن قويىلعان مىندەتتەردى قالانىڭ باس مەملەكەتتىك سانيتارلىق دارىگەرىمەن بىرلەسىپ تالداپ, كوروناۆيرۋستىق ينفەكتسيانىڭ الدىن الۋ جانە تاراتپاۋ بويىنشا قاجەتتى شارالار قابىلداۋدى سۇرايمىن», دەدى ەرالى توعجانوۆ.
