قۇرامىنا باق وكىلدەرى, قوعام قايراتكەرلەرى جانە بانك سالاسىنىڭ قىزمەتكەرلەرى ەنگەن قازىلار القاسى بايقاۋدىڭ باس جۇلدەسىنە №15 ورتا مەكتەپتىڭ وقۋشىسى انگەلينا گازديەۆا لايىقتى دەپ تاپتى.
جەڭىمپازعا باس جۇلدە – سوڭعى ۇلگىدەگى iPhone 13 Pro ۇيالى تەلەفونىن قازاقستان جۋرناليستەر وداعىنىڭ قاراعاندى وبلىستىق فيليالىنىڭ ديرەكتورى جانىبەك سادىقانوۆ تابىس ەتتى.
انگەلينا گازديەۆا ءتورت جىلدان بەرى ۆيدەو ءتۇسىرىپ, بەينەمونتاج جاساۋمەن اينالىسىپ كەلەدى ەكەن.
– ۇلكەنگە دە, كىشىگە دە جاڭا دۇنيە ۇسىناتىن تەك تانىمدىق بەينە روليكتەر تۇسىرەمىن. بايقاۋدىڭ شارتى بويىنشا ۇسىنىلعان تاقىرىپ مەنى قاتتى قىزىقتىردى. مەن تۇسىرگەن بەينە-روليكتى كورىپ, ادامدار ينتەرنەت-الاياقتىق دەگەن نە جانە ونىمەن قالاي كۇرەسۋگە بولاتىنىن ءبىلۋى ءۇشىن بارىمدى سالدىم. جەڭىسكە جەتەمىن دەپ كۇتكەن جوق ەدىم. البەتتە, وتە قۋانىشتىمىن! – دەپ اعىنان جارىلدى انگەلينا.
سونداي-اق بايقاۋدىڭ قورىتىندىسى بويىنشا ءبىرىنشى ورىندى ايسۇلتان جاقىپوۆ السا, بەكجان ەسەنوۆ ەكىنشى جۇلدەنى, ال ەلەنا ساحارچۋك ءۇشىنشى ورىندى يەلەندى.
ماراپاتتاۋ ءراسىمىنىڭ سوڭىندا قاراعاندى وبلىستىق پد باسشىسىنىڭ ورىنباسارى ءابىل ءابىلدين بايقاۋعا قاتىسۋشىلارعا العىس ايتىپ, ارىپتەستىك نەگىزدەگى ىنتىماقتاستىقتىڭ الداعى ۋاقىتتا دا جالعاسىن تابا بەرەرىنە سەنىم ءبىلدىردى.
قاراعاندى
