كەشكى ساعات 19:00-دە باستالاتىن بۇل ونەر دوداسى وبلىس ورتالىعىنىڭ باستى الاڭىندا اشىق اسپان استىندا ءوتتى. كوك جەلەكتى اپپاق قايىڭ مەن سۇلۋ قاراعايعا كومكەرىلگەن ساحناعا شىعاتىن ونەرپازدار قازاق, ورىس, تاتار, باشقۇرت, ازەربايجان, ارميان حالىقتارىنىڭ اندەرى مەن بيلەرىن ورىنداپ, كورەرمەنگە رۋحاني ءلاززات سىيلادى. اندەر مەن بيلەردى ورىندايتىندار قاتارىندا وڭىرىمىزگە بەلگىلى انشىلەر مەن ونەر ۇجىمدارى بولدى. اتاپ ايتقاندا دامەش قۇرمانكينا, بۇركىت جاڭاي, يۋليا ستادۋحينا, اناستاسيا سيمونوۆا, مەدەت يبادۋللا, لاۋرا كۇرلەۋىتوۆا, ءدىلناز ەسجان, مۇرات بەكجانوۆ, Miami, Melomax توپتارى, «ازيا ساۋند» ەسترادالىق ءانسامبلى, Bright band توبى جانە باسقالار. ولاردىڭ ورىنداۋىنداعى «جۇرەگىم سەن اڭساعان», «قازاق قىزدارى», «يا ليۋبليۋ», «سەزىم سىرى», «ماۋسىمجان», «تانتسۋي سو منوي», «سەن سۇلۋ», «بوزجورعا», «قايداسىڭ», «ماحاببات مۇڭى», «شىركىن-اي», «بەلىي فلاگ» جانە ت.ب. اندەر كەشكى قىزىلجاردىڭ اسپانىن اسەم اۋەنگە بولەدى. فەستيۆال كەشتەرى ءار كۇن سايىن ونەردىڭ جاڭا جانرىن قامتىپ وتىردى. ماسەلەن, ءبىر كەشتە حورەوگرافيالىق تۋىندىلار بولىپ, بي ۇجىمدارى ونەر كورسەتسە ەرتەسىنە ەسترادا جۇلدىزدارى ساحناعا شىقتى. ءداستۇرلى اندەر كەشى دە ءوز الدىنا بولەك.
سولتۇستىك قازاقستان وبلىسى مادەنيەت باسقارماسىنىڭ ۇيىمداستىرۋىمەن جۇزەگە اسقان وسىناۋ ونەر كەشتەرى تۇرعىندارعا قۋانىش سىيلاپ, كوڭىلدەرىن كوك اسپانعا كوتەردى.
پەتروپاۆل
