لوندوندا ءوتىپ جاتقان «ۇلكەن دۋلىعا» ساناتىنداعى «ۋيمبلدون» تۋرنيرىندە ەلەنا رىباكينا اۋەلى جارىستىڭ جارتىلاي فينالىنا جولداما الىپ, قازاقستاندىق تەننيسشىلەر اراسىندا وسىنداي تاريحي مەجەنى باعىندىرعان تۇڭعىش سپورتشى اتانعان ەدى. جارىستىڭ 17-راكەتكاسى بولىپ تىركەلگەن قازاقستاندىق تەننيسشى شيرەك فينالدا دۇنيەجۇزىلىك رەيتينگتە 44-ورىندا تۇرعان اۋستراليالىق ايلا تومليانوۆيچتەن ءۇش سەتتە باسىم ءتۇستى.
ەكى ساعاتقا سوزىلعان باسەكەنىڭ ءبىرىنشى پارتياسىندا اۋستراليالىق تەننيسشى ءا دەگەننەن ەسەپتە العا شىعىپ, سول قارقىنىن پارتيا سوڭىنا دەيىن ساقتاي الدى – 6:4.
تەز ەس جيىپ ۇلگەرگەن ەلەنا رىباكينا ەكىنشى سەتتە قارسىلاسىنان ەسە قايتاردى – 6:2. ال ءۇشىنشى, شەشۋشى پارتيادا دا قازاقستاندىق سپورتشى ءوز مىقتىلىعىن دالەلدەپ, قارسىلاسىنا ەش مۇمكىندىك قالدىرمادى – 6:3. ماتچ بارىسىندا ە.رىباكينا 15 ەيس جاساپ, 9 برەيك-پوينتتىڭ بەسەۋىن ۇتىمدى پايدالاندى.
ءسويتىپ, جەرلەسىمىز فينالعا شىعۋ ءۇشىن الەمنىڭ 18-راكەتكاسى, «ۇلكەن دۋلىعا» جارىسىنىڭ ەكى مارتە جەڭىمپازى رۋمىنيالىق سيمونە حالەپپەن كەزدەستى. ەكى تەننيسشى دە ءبىر-ءبىرىنىڭ قىر-سىرىن وتە جاقسى بىلەدى. سەبەبى بۇعان دەيىن تەننيسشىلەر كورتتا ءۇش مارتە كەزدەسىپ, ەكەۋىندە حالەپ, بىرەۋىندە رىباكينا جەڭىسكە جەتكەن. بۇل ماتچ وتانداسىمىز ءۇشىن كارەراسىنداعى ەڭ ماڭىزدى ويىننىڭ ءبىرى بولدى.
ويىن جەرلەسىمىزدىڭ بىردەن برەيك جاساۋىمەن باستالدى دا, ول ءبىرىنشى پارتيا اياقتالعانشا وسى باسىمدىعىن قارسىلاسىنا بەرگەن جوق – 6:3. ەكىنشى سەت تە ە.رىباكينانىڭ بىردەن برەيك جاساۋىمەن باستالعانىمەن, بۇل جولى س.حالەپ تارازى باسىن تەڭەستىرە الدى. الايدا قارسىلاسىنىڭ بۇل قادامى وتانداسىمىزدىڭ ساعىن سىندىرا العان جوق. ىلە-شالا ەسە قايتارعان ەلەنا تاعى دا ەكى گەيم العا شىقتى دا وسى باسىمدىعىن سەت اياقتالعانشا ۇستاپ تۇردى. قورىتىندى ەسەپ – 6:3, 6:3.
وسىلايشا, ەلەنا رىباكينا ءوزىنىڭ سپورتتىق مانسابىنداعى العاشقى ۇلكەن جەتىستىگىنە قول جەتكىزدى. جالپى, بۇل ونىڭ جەكە عانا تابىسى ەمەس, تۇتاس قازاقستان تەننيسىنىڭ وسىنداي دەڭگەيدەگى العاشقى جەتىستىگى بولىپ وتىرعانىن ەرەكشە اتاپ كورسەتكەن ءجون.
