قوعام • 07 شىلدە، 2022

قۇس تۇماۋىنىڭ كەسىرى

109 رەت كورسەتىلدى

كاسپي تەڭىزىنىڭ ۇستىندە قوس قاناتىن سابالاپ، شارق ۇراتىن شاعالا توسىن ىندەتكە ۇشىراعان سەكىلدى. اتىراۋ وبلىستىق ورمان شارۋا­شىلىعى جانە جانۋارلار دۇنيەسى ينسپەكتسياسىنىڭ ءبو­لىم باسشىسى مەرەكە شالقاروۆتىڭ ايتۋىنشا، «قاشاعان» كەن ورنىن يگەرىپ جاتقان «نورت كاسپيان وپەرەيتينگ كومپاني ن.ۆ.» كوم­پانيا­سىنىڭ وكىلدەرى 19 ماۋسىمدا شاعالانىڭ جاپپاي قىرىلعانى جونىندە جەدەل حابار بەرگەن. كەن ورنىنداعى DS-04 جانە DS-01 جاساندى ارالىندا 2 750 قارا شۇبار تۇقىمدى شاعالا قىرىلعان.

– وسىعان بايلانىستى ينسپەكتسيا تاراپىنان ارنايى كوميسسيا قۇرىلىپ، شاعالا قىرىلعان اۋماقتا پروفيلاكتيكالىق تەكسەرۋ جۇرگىزدى. قۇستاردىڭ ءولۋ سەبەبىن انىقتاۋ ماقساتىندا سۋ، توپىراق جانە اۋا سىنامالارى، قۇستاردىڭ ولەكسەلەرى زەرتتەۋگە الىندى. اتىراۋ وبلىسىنىڭ اۋماعىندا وسىعان ۇقساس جاعداي­لاردى انىقتاۋ ماقساتىندا تولىق باقىلاۋ مونيتورينگى قولعا الىندى. ال 26 ماۋسىمدا كاسپي تەڭىزىنىڭ سولتۇستىك بولىگىندەگى شالىگا ارالىنىڭ اۋماعىندا شاعالا تۇقىمداس 2 500 قۇستىڭ ولگەنى انىقتالدى. ونىڭ ىشىندە 1 مىڭ «چەگراۆا»، 1 200 «قارا باس وگىزشاعالا»، 300 «وگىزشاعالا» بار. ولگەن قۇستاردىڭ بيوماتەريالدارى الىنىپ، الماتى قالاسىنىڭ ميكروبيولوگيا جانە ۆيرۋسولوگيا ينستيتۋتىنا جىبەرىلدى، – دەيدى م.شالقاروۆ.

ونىڭ مالىمەتىنە قاراعاندا، ولگەن قۇستاردىڭ سىنامالارىنان «ان5» قۇس تۇماۋىنا وڭ ناتيجە انىقتالعان. بۇل دەرەك اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ ۆەتەريناريا بويىنشا ۇلتتىق رەفەرەنتتىك ورتالىعىنىڭ ماماندارى جول­داعان جاۋاپتا راستالعان. ولگەن قۇستاردىڭ سىنامالارى دياگنوزدى قايتا راستاۋ ءۇشىن حەب ( ۇلىبريتانيا) رەفەرەنتتىك زەرتحاناسىنا جىبەرىلىپ وتىر.

– قازىر وبلىستاعى جاعداي تولىقتاي باقىلاۋعا الىندى. اتالعان جايت انىقتالعالى ولگەن قۇستاردىڭ جالپى سانى 5 750-ءتى قۇراپ وتىر، – دەپ ءمالىم ەتتى م.شالقاروۆ.

وبلىستىق اۋماقتىق ينسپەكتسياسى باسشىسىنىڭ مىندەتىن اتقارۋشى مىرزابەك دۇيسەنوۆتىڭ ايتۋىنشا، اتىراۋ قالاسىنداعى 7 اۋىلدىق وكرۋگ تۇرعىندارىنىڭ ءۇي قۇستارىن ەگۋ قولعا الىندى. دۇيسەنبىگە دەيىن ءتورت وكرۋگتى مەكەن ەتكەن تۇرعىندار يەلىگىن­دەگى 2 382 قۇسى تۇگەلدەي ەگىلگەن. ال ءۇش وكرۋگتەگى ءۇي قۇستارىن وسى اپتانىڭ سوڭىنا دەيىن ەگۋ كوزدەلىپ وتىر.

– اتىراۋ قالاسىنىڭ اۋما­عىن­دا ورنالاسقان 7 وكرۋگتە 1 200 قاز بەن 5 091 تاۋىققا قۇس تۇماۋى اۋرۋىنا قارسى ۆاكتسينا ەگۋ باس­تالدى. بۇل ءۇشىن ۆەتەرينارلىق پرەپاراتتاردىڭ رەسپۋبليكالىق قورىنان 6 291 دوزا ۆاكتسينا ءبولىندى. قازىر «ەپيزووتياعا قارسى رەسپۋبليكالىق وتريادى» رمم-نىڭ اتىراۋ فيليالى مەن كورشىلەس باتىس قازاقستان وبلىسىنان 12 ادامنان جاساقتالعان 4 بريگادا 2 382 قۇسقا ەكپە سالدى، – دەيدى م.دۇيسەنوۆ.

 

اتىراۋ وبلىسى

سوڭعى جاڭالىقتار

شەكارانىڭ شەبى بەرىك

قازاقستان • كەشە

باقىت مينيسترلىگى

قوعام • كەشە

ەلەكتر جەلىلەرى توزىپ تۇر

ەكونوميكا • كەشە

ۇلت ۇستازىنىڭ ۇلاعاتى

احمەت بايتۇرسىن ۇلى • كەشە

«قىلمىسكەر» قالام

ونەر • كەشە

ۇقساس جاڭالىقتار