استانا ۇلى ەكونوميكالىق داعدارىس جىلدارىندا ەلىمىزدىڭ شارۋاشىلىعىنىڭ جاندانۋىنا ۇيىتقى بولعان لوكوموتيۆ بولعانىنان باستاپ, رۋحاني, مادەني, ۇلتتىق جاڭعىرۋدىڭ تۋىنا اينالعان اقجولتاي قالا بولعانى تۋرالى اڭگىمەلەر دە كوپ ايتىلدى. ءتىپتى 1994 جىلدىڭ 6 شىلدەسىندەگى جوعارعى كەڭەستىڭ (پارلامەنتتىڭ) وتىرىسىنا سول كەزدەگى پرەزيدەنت ن.نازارباەۆ استانانى الماتىدان اقمولاعا كوشىرۋ تۋرالى ۇسىنىسپەن كەلگەندە وعان قارسى بولعاندار كوپ بولىپ, ۇسىنىس وتپەي قالا ما دەگەن كۇدىك تۋعاندا سپيكەر ءابىش كەكىلباەۆ: «بۇگىن پرەزيدەنتتىڭ تۋعان كۇنى ەكەن, وعان جاساعان سىيىمىز بولسىن, ۇسىنىسىن ماقۇلدايىق», دەگەن ۇتىمدى وي تاستاپ, مەملەكەت باسشىسىنىڭ ءسوزىن سول كەزدەگى اساۋ دەپۋتاتتاردىڭ ماقۇلداۋىنا كوندىرگەنى سياقتى قىزىقتى وقيعالار دا ەسكە الىندى. استانامىزدىڭ ءار جىلدارداعى جەتىستىكتەرى, الەمدىك قالا رەتىندە تانىلعان تابىستارى دا اتالىپ ءوتتى. 70-تەن استام ەلدىڭ وكىلدەرى قاتىسقان ەقىۇ-نىڭ 2011 جىلعى استاناداعى ءسامميتتى, ەكسپو-2017 حالىقارالىق كورمەسىن, «تۋر دە فرانستىڭ» جۇلدەسىن تالاي رەت جەڭىپ العان «استانا» ۆەلوكومانداسىنىڭ جەڭىستەرىن جانە ت.ب. مىنبەرگە شىققاندار كەزەكپەن ەسكە الىپ, وزدەرىنىڭ استانامەن ماقتاناتىنىن جارىسا ايتىپ جاتتى. جەرگىلىكتى اقىندار مارال يمانباەۆا, سامرات قۇسكەنوۆ, كوستيا كرافت جانە باسقالار وزدەرىنىڭ استاناعا ارناعان ولەڭدەرىن وقىدى. «نەت ۆ ميرە تاكوي زەملي, چەم ناش پرەكراسنىي كازاحستان» دەگەن جولدارى بار كوستيانىڭ ولەڭىنە كورەرمەندەر ۇزاق قول سوقتى. ءانشى ابىلايحان اقماعانبەت ساكەننىڭ «كوكشەتاۋ», ۇكىلى ىبىرايدىڭ «گاككۋ» اندەرىن تامىلجىتا ورىندادى. قارتتار اراسىنان وسى كىتاپحاناداعى ادەبيەت ۇيىرمەسىنىڭ مۇشەلەرى نادەجدا كونوۆالوۆا, ليۋبوۆ سيدوروۆا دەگەن اجەيلەر دە ولەڭدەرىن وقىدى. ولاردىڭ ولەڭدەرىندەگى «ۆسەگدا-ۆسەگدا, تى منە نۋجنا, مويا استانا» نەمەسە «مى چۋدو ستوليتسەي سۆوەي گورديمسيا نا ۆەك» دەگەن سياقتى جولدار دا پاتريوتتىق سەزىمدەردى اسقاقتاتىپ تۇردى.
پەتروپاۆل
