شىمكەنت قالاسى پوليتسيا دەپارتامەنتى اباي اۋداندىق پوليتسيا باسقارماسىنا جەرگىلىكتى تۇرعىن ارىزدانىپ, الاياقتارعا الدانعانىن ايتقان. ەگدە جاستاعى ايەلدىڭ ايتۋىنشا, 3 ناۋرىزدا بەيتانىس كەلىنشەك مەملەكەت تاراپىنان پاتەر الىپ بەرەمىن دەپ سەندىرگەن. ول 9 000 000 تەڭگەنى قولدى قىلىپ, قازىرگى ۋاقىتقا دەيىن الداپ كەلگەن.
«اتالعان جايت قر قك 190-بابى بويىنشا تىركەۋگە الىندى. ءدال وسىنداي جاعدايمەن پوليتسياعا تاعى بىرنەشە تۇرعىن شاعىمدانىپ, جوعارىداعىداي الاياقتىق ارباۋىنا تۇسكەنىن جەتكىزگەن. كەلىپ تۇسكەن اقپاراتتار اياسىندا جەدەل ىزدەستىرۋ شاراسىن جۇرگىزگەن شىمكەنت پوليتسەيلەرى كۇدىكتى رەتىندە جاس كەلىنشەكتى ۇستادى. ءبىر جارىم جىل ىشىندە شىمكەنت پەن تۇركىستان وبلىسىنىڭ تاعى 39 تۇرعىنى وسى ايەلگە الدانعان. ولاردىڭ كەيبىرىنە پاتەردەن بولەك, بيزنەسىن قولداۋ ءۇشىن مەملەكەتتەن اقشا دا ۋادە ەتىلگەن. كەلگەن شىعىننىڭ جالپى سوماسى 40 ميلليون تەڭگەگە جۋىق», دەلىنگەن حابارلامادا.
قازىرگى تاڭدا تەرگەۋ امالدارى جۇرگىزىلىپ, ءىس سوتقا جولداندى. ءوز كەزەگىندە شىمكەنت پوليتسەيلەرى الاياقتىق نەمەسە باسقا دا قىلمىستاردىڭ الدىن الۋ ءۇشىن تۇرعىندارعا قاۋىپسىزدىك شارالارىن ساقتاۋعا كەڭەس بەرەدى.
ايانا توعانبەك
