تەاتر ءومىرى, تەك وپەرا, بالەت, كونتسەرتتەرمەن شەكتەلمەيدى. ونەر ورداسىندا بىرقاتار الەۋمەتتىك جوبا ىسكە اسىرىلىپ, ەلوردا مەكتەپتەرىمەن اۋقىمدى جۇمىستار جۇرگىزىلىپ, ساحنا سىرتىنداعى شىعارماشىلىق ومىرگە دە ساياحات ۇيىمداستىرىلۋدا. وسى ورايدا «دوستار كلۋبىن» قۇرۋ مادەني ءارى تانىمدىق ءىس-شارالاردىڭ سانىن كوبەيتەتىنىن انىق كورسەتىپ وتىر.
ايتا كەتەيىك, كلۋبقا ەنۋ ءراسىمى وتە وڭاي: كەز كەلگەن كورەرمەن ءوتىنىش-ساۋالدامانى تولتىرىپ, ول ماقۇلدانىپ, جارنا تولەنگەننەن كەيىن, تەاتر دوسى «دوس», «قۇرمەتتى دوس», «ارىپتەس», «دەمەۋشى» سەكىلدى مۇشەلىك ساناتىنا قاراي بەرىلەتىن جەڭىلدىكتەر تۋرالى مالىمەتتەرى بار اتاۋلى كلۋب كارتاسىن الادى.
– مۇنداي بىرلەستىكتەر الەمگە تانىمال كوپتەگەن تەاتردا بار. «استانا وپەرانىڭ» «دوستار كلۋبىنا» مۇشە بولۋى جۇمباق تەاتر الەمىنە جاقىنداي تۇسۋگە, ونىڭ ومىرىنە بەلسەندى ارالاسۋعا, سونداي-اق ەلىمىز بەن قالامىزدىڭ مادەني يگىلىگىن ارتتىرۋ, ساقتاۋ ىسىنە ءوز ۇلەسىڭدى قوسۋعا مۇمكىندىك بەرەدى, – دەيدى «استانا وپەرا» ديرەكتورىنىڭ ورىنباسارى ايجان قۇرمانعاليەۆا. – ءبىزدىڭ باستامامىزعا ءۇن قاتقان بارشا جانعا ۇلكەن العىسىمدى بىلدىرگىم كەلەدى. تەاتر مەن كورەرمەندەردىڭ ءوزارا ءتيىمدى ىنتىماقتاستىعى ونەردى قادىرلەيتىندەرگە سىرتتان باقىلاپ تۇرۋشى عانا ەمەس, سونىمەن بىرگە تەاتردىڭ جوبالارى مەن باعدارلامالارىنىڭ بەلسەندى قاتىسۋشىسى بولۋعا جاعداي جاسايدى.
«تەاتر دوسىنىڭ» جەڭىلدىكتەرى قاتارىنا جەكە مەنەدجەرىنىڭ بولۋى, باستى دايىندىقتار مەن ەكسكليۋزيۆتى ءىس-شارالارعا شاقىرۋ بيلەتىن الۋ مۇمكىندىگى, رەپەرتۋارلىق جوسپاردىڭ اشىقتىعى, ساحنا سىرتىنا ساياحات جاساۋ سەكىلدى باسقا دا ارتىقشىلىقتار كىرەدى.
بۇدان بولەك, «قۇرمەتتى دوس» اتاعى قويىلىمدىق توپ مۇشەلەرىمەن جەكە تانىستىق, قولتاڭبا الۋ تۇرىندەگى ەكسكليۋزيۆتەرگە مۇمكىندىك بەرەدى.
ال «ارىپتەس» پەن «دەمەۋشىنىڭ» ارتىقشىلىق اياسى بۇدان دا كەڭ. ولار رەسمي كەزدەسۋ وتكىزۋ, قول قويۋ ءۇشىن تەاتر عيماراتىن پايدالانۋ, جىلىنا ەكى رەت افيشالاردا ءوز لوگوتيپتەرىن ورنالاستىرۋ سەكىلدى باسقا دا قۇقىقتارعا يە.
