قوعام • 05 شىلدە، 2022

ينتەرنەت دۇكەندەردەن اباي بولعان ءجون

32 رەت كورسەتىلدى

تۇتىنۋشىنىڭ قۇقىن قورعاۋ ماسەلەسى ەلىمىزدە ءالى كۇنگە كۇن تارتىبىنەن تۇسەر ەمەس. كەرىسىنشە، ەلەكتروندى ساۋدا شىققاننان بەرى بۇرىنعىدان دا كۇردەلەنىپ كەتتى. سولتۇستىك قازاقستان وبلىسىنىڭ تۇتىنۋشىلاردىڭ قۇقىعىن قورعاۋ دەپارتامەنتىنە ءتۇسىپ جاتقان ارىز-شاعىمنىڭ كوبەيىپ بارا جاتقانىنان وسىنى كورۋگە بولادى.

ماسەلەن، بىلتىر 5 ايدا تۇسكەن شاعىمدار سانى 125 بولىپ، سونىڭ 5،6 پايىزى ونلاين ساۋداعا قاتىستى بولسا، بيىلعى 5 ايداعى شاعىم سانى 170-كە جەتكەن جانە ونىڭ ەلەكتروندى ساۋداعا قاتىستىلارى 31،8 پايىزعا دەيىن كوتە­رىلگەن. دەمەك ارىز-شاعىمنىڭ جالپى سانى بيىل 36 پايىزعا وسكەن، ونىڭ ىشىندەگى ونلاين ساۋداعا قاتىس­تىلارىنىڭ ۇلەسى 6 ەسەگە جۋىق ارتقان.

ەلەكتروندى ساۋدا بويىنشا جاسالاتىن شاعىمداردىڭ نەگىزگى بولىگى – ساتىپ الىنعان تاۋارلاردىڭ ساپاسى ينتەرنەت-سايتتا كورسەتىلگەن سيپاتتاماعا مۇلدە جاناسپايتىنى ەكەن. ماسەلەن، ءبىر ايەل تابيعي بىلعارىدان تىگىلگەن يتاليالىق موكاسينگە تاپسىرىس بەرىپ، ونى قىمبات باعاعا ساتىپ السا، قىتايدىڭ جاساندى تەرىدەن تىگىلگەن ساپاسىز دۇنيەسى بولىپ شىققان. وندايدىڭ بازارداعى باعاسى قالاعان تاۋارىنان ون ەسەدەي ارزان.

ينتەرنەت-دۇكەندەردىڭ كەيبىرى وزدەرىنىڭ اتىنا كىر كەلتىرۋدەن قورىق­پايدى. ويتكەنى حالىقتى الاياقتىقپەن الداۋ ءۇشىن عانا تىركەلگەندەر بولىپ شىعادى. ولار مەملەكەتتىك تىركەۋدە كورسەتىلگەن مەكەنجايىندا دا بولماي شىعادى. ماسەلەن، ەلىمىزدىڭ كوپتەگەن بۇرىشىنان پەتروپاۆلدا تىركەلگەن ءبىر ينتەرنەت-دۇكەنگە شاعىمدار كوپ تۇسكەندىكتەن، ساتىپ الۋشىلاردىڭ قۇقىن قورعاۋ ماقساتىمەن دەپار-
تامەنتتىڭ قىزمەتكەرلەرى ماسەلەنى انىقتاۋ ءۇشىن كورسەتىلگەن مەكەنجايعا بارسا، بۇل جەردە ولاردىڭ ءىزى دە بولماعان. سوندىقتان مۇنداي الاياق فيرمانى تابۋ وڭايعا تۇسپەيدى.

كوپ جاعدايدا ءبىزدىڭ ادامداردىڭ سەنگىشتىگى دە «شىعاسىعا يەسى باسشى» دەگەندەي وزدىگىنەن الدانۋعا جول بەرىپ جاتادى. مىسالى، جارنامالاردا كورسەتىلگەن تاۋاردى العىسى كەلەتىنىن ايتىپ، ساتىپ الۋشى ينتەرنەت-سايتتارعا حابارلاندىرۋ بەرەدى. ءبىراز ۋاقىتتان كەيىن ونىڭ تەلەفونىنا جايلى داۋىسپەن، سەنىمدى سوزدەرمەن ساتۋشى حابارلاسىپ، ىزدەگەن زاتىن ساتاتىنىن ايتادى. الاياقتىڭ مايموڭكەسىنە ەلتىگەن ساتىپ الۋشى تاۋار جەتكىزۋشىنىڭ كونتاكتىلىك دەرەكتەرىن ناقتىلاۋدى دا ۇمىتىپ كەتەدى. تەك قولىنا ساپاسىز تاۋار تۇسكەندە عانا سانىن ءبىر-اق ۇرادى. ساتۋشىنىڭ ناقتى دەرەكتەرى جوق بولعاندىقتان اقشاسىن دا قايتارا المايدى، ساپاسىز تاۋاردى اۋىستىرۋعا دا قولى جەتپەيدى. ەكەۋىنىڭ اراسىندا جازباشا كەلىسىم بولماعاندىقتان قۇقىق قورعاۋ ورگاندارى دا قايران قىلا المايدى. جالعىز-اق تۇتىنۋشىنىڭ قۇقىن قورعاۋ دەپارتامەنتىنە شاعىمدانادى. مۇنداي جاعدايدا ولاردان دا ەش قايران جوق. سوندىقتان «ساتۋشىمىز» دەگەن فيرمانىڭ بارلىق دەرەگىن، مەكەنجايىن، تەلەفوندارىن، ەلەكتروندى ادرەستەرىن باسقا كوزدەردەن انىقتاپ، ادالدىعىنا كوز جەتكىزگەن سوڭ بارىپ قانا ساۋدالاسۋ كەرەك. ال ادال ساتۋشىلار وزدەرىنىڭ دەرەكتەرىن ەشقاشان جاسىرمايدى.

سولتۇستىك قازاقستان وبلىسى تۇتىنۋشىلاردىڭ قۇقىن قورعاۋ دەپارتامەنتىنىڭ باسشىسى ءلازىم مياشەۆا ساتىپ الۋشىنىڭ باسقا دا كەيبىر تالاپتاردى بىلگەنى دۇرىس ەكەنىن ايتتى. مىسالى، ساتۋشىدان تاۋاردىڭ سەرتيفيكاتىن نەمەسە تالاپقا ساي ەكەندىگى تۋرالى دەكلاراتسيانى، اقشا تولەگەندىگى جونىندەگى تۇبىرتەكتى تالاپ ەتۋ كەرەكتىگىن جەتكىزدى. سونداي-اق ينتەرنەت-رەسۋرستاردان ساتۋشىنىڭ رەپۋتاتسياسى تۋرالى پىكىرلەردى دە انىقتاعان ءجون. ال تاۋاردى العان سوڭ ول ايتىلعان ساپاعا ساي بولماسا فوتو جانە بەينەكورىنىستى دالەل جيناۋ كەرەك ەكەن. سوڭعى ۋاقىتتاردا وبلىستىق تۇتىنۋشىلار قۇقىن قورعاۋ دەپارتامەنتىنە Wildberries دەگەن ينتەرنەت-دۇكەننىڭ ارەكەتتەرىنە شاعىم كوپ تۇسكەن. الدانعان تۇتىنۋشىلار اقشالارىن قايتارا الماي سارساڭعا تۇسۋدە. سويتسە، باس كەڭسەسى ماسكەۋ قالاسىندا تىركەلگەن بۇل كاسىپورىنعا بايلانىستى ماسەلەلەر رەسەيگە قارسى جاسالعان سانكتسيالارعا قاتىستى تۋىنداعان. الىس شەتەلدەردەن ساپالى تاۋارلار جەتكىزۋمەن اينالىساتىن بۇل ينتەرنەت-دۇكەن سوڭعى ۋاقىتتا سانكتسيانىڭ الەگىمەن ساتىپ الۋشىلاردان اقشاسىن العانىمەن تاۋارىن جەتكىزە الماي باسى داۋعا قالىپ وتىر.

قورىتا ايتقاندا ينتەرنەت ارقىلى ساۋدا جاساۋشىلار ساتۋشىنىڭ سەنىمدىلىگىنە مۇقيات قاراعانى ءجون. سوندا عانا قاپى قالمايسىز.

 

سولتۇستىك قازاقستان وبلىسى

سوڭعى جاڭالىقتار

اۋەزوۆ جانە تۇركى الەمى

رۋحانيات • كەشە

يدەولوگيا

رۋحانيات • كەشە

مەيىرىم مەن قاتىگەزدىك

رۋحانيات • كەشە

ەسكى مەن جاڭا اراسى

رۋحانيات • كەشە

بي پاديشاسى

رۋحانيات • كەشە

ساپا قايتسە جاقسارادى؟

قازاقستان • كەشە

قايىرىمدىلىقتىڭ ۇلگىسى

قازاقستان • كەشە

ساق ءداۋىرىنىڭ تاسى

تانىم • كەشە

ۇقساس جاڭالىقتار