قوعام • 05 شىلدە، 2022

تولەۋ مەرزىمى 90 كۇننەن اسقان نەسيەگە سىياقى ەسەپتەۋگە تىيىم سالىندى

قارىز الۋشىلاردىڭ قۇقىقتارىن قورعاۋ ماقساتىندا بىلتىر جەلتوقساندا قابىلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باسقارۋ، ەكىنشى دەڭگەيدەگى بانكتەردىڭ كەپىلدىك ساياساتىن، باعالاۋ قىزمەتىن رەتتەۋدى جانە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ نورمالارى ىسكە اسىرىلۋدا، دەپ حابارلايدى Egemen.kz.

Egemen Qazaqstan

قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە، بيىلعى 1 شىلدەدەن باستاپ رەسىمدەلگەن شارتتار بويىنشا ازاماتتاردىڭ كەپىلسىز تۇتىنۋشىلىق قارىزدارى مەن ميكروكرەديتتەرى بويىنشا مەرزىمى وتكەن بەرەشەگىنىڭ وسۋىنە جول بەرمەۋ ءۇشىن قارىزدى قايتارۋ مەرزىمى 90 كۇننەن كەيىن سىياقى ەسەپتەۋگە تىيىم سالىنادى. بۇل نورما جەكە تۇلعالارعا دارا كاسىپكەر رەتىندە بەرىلگەن قامتاماسىز ەتىلمەگەن كرەديتتەرگە قولدانىلمايدى. بۇگىنگى كۇنى وسىنداي تىيىم سالۋ جەكە تۇلعالاردىڭ يپوتەكالىق قارىزدارىنا قاتىستى قولدانىلاتىنىن ەسكە سالا كەتكەن ءجون.

«ەكىنشى، كەپىلدى قارىز الۋشىلاردىڭ مۇددەلەرىن قورعاۋ جونىندەگى شارالار كۇشەيتىلدى.

بانكتەر جانە بانك قىزمەتى تۋرالى زاڭعا تۇزەتۋلەر ەنگىزىلدى، وعان سايكەس كەپىل بەرۋشى، ونىڭ جەكە نەمەسە زاڭدى تۇلعا بولىپ تابىلۋىنا قاراماستان، ەگەر يپوتەكالىق قارىز بويىنشا ورىندالماعان مىندەتتەمەلەر سوماسى كەپىلمەن قامتاماسىز ەتۋ قۇنىنىڭ 10%-ىنان كەم بولعان جاعدايدا، كەپىل زاتىن اۋىستىرۋعا قۇقىلى. سونىمەن بىرگە كەپىلدى قارىز الۋشىلارعا كەپىلدى – باسپانانى ءۇش اي مەرزىمدە دەربەس سوت ارقىلى نە سوتتان تىس ساتۋ قۇقىعى بەرىلدى. يپوتەكالىق قارىزدار بويىنشا ورىندالماعان مىندەتتەمەلەردى وتەۋ ءۇشىن باسپانانى ساۋدا-ساتتىقتا تومەندەتىلگەن قۇنى بويىنشا ساتۋعا جول بەرمەۋ جانە ساۋدا-ساتتىقتا كەپىل مۇلكىن سوتتان تىس وتكىزۋدەن الىنعان اقشانىڭ جەتكىلىكتىلىگىن قامتاماسىز ەتۋ ءۇشىن كەپىلدىڭ ساتۋ باعاسىنىڭ تومەنگى شەگى كەپىلدىڭ باستاپقى باعالاۋ قۇنىنىڭ 50%-ىنان 75%-ىنا دەيىن كوتەرىلدى»، دەپ جازدى ۆەدوموستۆودان.

كرەديتورلار تاراپىنان جوسىقسىز ارەكەتتەرگە جول بەرمەۋ ءۇشىن كەپىل ۇستاۋشىنىڭ، ونىڭ قىزمەتكەرلەرىنىڭ، ۇلەستەس تۇلعالاردىڭ، سونداي-اق ەنشىلەس ۇيىمداردىڭ ساۋدا-ساتتىققا قاتىسۋىنا تىيىم سالۋ ەنگىزىلگەن.

ء«ۇشىنشى، ازاماتتاردىڭ قارىزدارى بويىنشا كەپىلدى باسپانانى ساتۋعا قوسىمشا شەكتەۋلەر ەنگىزىلدى. تۇزەتۋلەرگە سايكەس، ەگەر يپوتەكالىق قارىز بويىنشا ورىندالماعان مىندەتتەمەنىڭ سوماسى 15%-دان اسپاسا جانە مەرزىمىن وتكىزىپ الۋ مەرزىمى 6 ايدان اسپاسا، وندا كرەديتوردىڭ باسپانا تۇرىندەگى كەپىلدى ءوندىرىپ الۋعا قۇقىعى جوق. سونداي-اق يپوتەكالىق تۇرعىن ءۇي قارىزدارى بويىنشا بلانكىلىك قالدىقتاردى ەسەپتەن شىعارۋ تالاپتارى كەڭەيتىلدى. بۇل شارا وزگە مۇلكى جوق جانە كىرىسى ەڭ تومەنگى جالاقىنىڭ ەكى ەسەلەنگەن مولشەرىنەن اسپايتىن قارىز الۋشىلارعا كەپىلگە سالىنعان باسپانانى سوت ارقىلى ساتقاننان كەيىن قالعان بورىشتى ەسەپتەن شىعارۋعا مۇمكىندىك بەرەدى»، دەلىنگەن حابارلامادا.

ايانا توعانبەك

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز