24 ماۋسىم كۇنى وسكەمەندە جەلدىڭ ەكپىنى 16 م/سەك دەيىن جەتىپ, قالانىڭ ويرانىن شىعاردى. اعاشتار تامىرىمەن وپىرىلىپ, بىرنەشە كولىكتى زاقىمدادى. زاقىمدادى دەگەنىم, بەر جاعى. ايتپەسە, جۋان تەرەك كەيبىر اۆتوكولىكتەردى ورتان بەلىنەن باسىپ قالىپ, كۇل-تالقان ەتتى. اسىرەسە, گاگارين بۋلۆارى, سەۆاستوپلسكايا كوشەلەرى تۇرعىندارىنا قۇتقارۋشىلاردىڭ كومەگى قاجەت بولدى. ال گوگول, ستاحانوۆسكايا, ۆينوگرادوۆ, قازاقستان, بۋروۆ كوشەلەرى, شاكارىم داڭعىلى بويىنداعى قۇلاعان اعاش, بۇتالاردى «تازا وسكەمەن» كاسىپورنىنىڭ قىزمەتكەرلەرى تەز ارادا تازالاپ شىقتى. داۋىلدىڭ جويقىن بولعانى سونداي, ەلەكتر جەلىلەرىنە دەيىن ءۇزىلىپ, ترامۆايلار تۇسالىپ قالعان. بارىنەن بۇرىن ايالداما پاۆيلونىنىڭ ۆەلوسيپەدپەن كەتىپ بارا جاتقان قىز بالانى باسىپ قالعانىنا تۇرعىندار نارازى بولدى. ءدال وسىنداي وقيعا گاگارين بۋلۆارىندا دا بولعان. ايتەۋىر, ابىروي بولعاندا بالالار امان. مەديتسينالىق كومەك كورسەتىلىپتى. دەسە دە ايالداما پاۆيلونىن قابىلداپ العان قۇزىرلى ورگانداردىڭ سالعىرتتىعى ءۇشىن جاپا شەككەن 10 جاسار ءبۇلدىرشىننىڭ اناسى نازگۇل ماگزاتوۆا سوتقا بەرەمىن دەپ وتىر. پوليتسياعا ارىزدانىپ تا قويعان.
– سول كۇنى پوليتسياعا ءوتىنىش جازدىم. تىركەۋدەن ءوتىپتى. بالامنىڭ جاعدايى جالپى جاقسى. ميى شايقالعان, شوشىنىپ قالعان. قازىر اۋرۋحانادا جاتىر. كەشە «تازا وسكەمەن» كاسىپورنى شاقىردى, باردىم. كەرەك جاعدايدى جاسايمىز دەپ وتىر. بىراق سوتقا بەرەمىن. سەبەبى كىنالىلەر جاۋاپ بەرۋگە ءتيىس. كەلەسىدە مۇنداي سالعىرتتىق قايتالانباسىن. مىسالى, ارنايى بارىپ, سول ايالدامانى كوردىم. ءتۇبىن بەتونداپ, مىقتاپ بەكىتىپ قويىپتى. سونى بىردەن نەگە دۇرىس ىستەمەگەن, – دەيدى نازگۇل ماگزاتوۆا.
راس, ساپاسىز قۇرىلىس كوپ بىزدە. قاراپايىم ايالدامانىڭ ءتورت سيراعىن بەكىتە الماعان سوڭ ءزاۋلىم ۇيلەرگە قايدان قاداعالاۋ بولسىن؟! تۇرعىن ءۇي-كوممۋنالدىق شارۋاشىلىعى ماماندارىنىڭ پىكىرىنشە, قاتتى جەل سالدارىنان ورىن العان وقيعاعا بايلانىستى تەكسەرۋ جۇرگىزىلىپ, شالاعايلىق تانىتقان ازاماتتار ايىپتالاتىن كورىنەدى.
نەگىزى ءاۋ باستان تياناقتى اتقارىلۋى كەرەك ەدى. بىرەۋ جاپا شەكپەيىنشە نەگە سەلت ەتپەيمىز, تۇسىنىكسىز. ءبىر كۇنى وسى سالعىرتتىق سان سوقتىرىپ جۇرمەسە ەتتى. ايتقانداي, تجد-ءسىز داۋىلدى ەسكەرتۋ تۋرالى «دارمەن» ءموبيلدى قوسىمشاسىنان بىلە الاسىز. ەگەر داۋىل بولاتىن بولسا, قاۋىپسىزدىك ەرەجەلەرىن ساقتاڭىز. قۇداي ساقتاسىن, توتەنشە جاعداي ورىن الا قالسا, 112 ءنومىرى بويىنشا حابارلاڭىز.
وسكەمەن
