ايماقتار • 04 شىلدە، 2022

جامبىل اقىننىڭ جادىگەرلەرى

اتىراۋدا دومبىرا كۇنىنە وراي وبلىستىق تاريحي-ولكەتانۋ مۋزەيىندە « ۇلى جىراۋدىڭ اسىل مۇراسى» اتتى كوشپەلى كورمە ءوتتى. جامبىل اتىنداعى ادەبي-مەموريالدى مۋزەيى ۇيىمداستىرعان كورمەگە اقىننىڭ تۇتىنعان بۇيىمدارى، ونىڭ ىشىندە ەكى دومبىراسى قويىلدى.

جولداسبەك كوشەرباي ۇلى

– جامبىل اقىننىڭ شىعارماشىلىعىنىڭ 75 جىلدىعىنا وراي 92 جاسىندا 12 بولمەلى ءۇي بەرىلگەن ەدى. اتامىز ومىردەن وتكەنگە دەيىن سول ۇيدە تۇردى. ومىردەن وتكەنىنە ەكى جىلدان سوڭ سول ءۇي جامبىل مۋزەيىنە اينالدى. اتىراۋ جۇرتشىلىعىنىڭ نازارىنا ۇسىنىلعان كورمەگە اقىن اتامىزدىڭ پايدالانعان جەكە بۇيىمدارىن، دومبىراسى مەن كيگەن شاپانىن، وتباسىلىق سۋرەتتەردى، وزگە دە قۇندى جادىگەرلەردى اكەلدىك. ءۇش كۇن بويى اتىراۋلىق اعايىنعا جامبىل اقىننىڭ ءومىرى مەن شىعارماشىلىعىنان مول ماعلۇمات ۇسىندىق، – دەيدى اقىننىڭ نەمەرەسى سالتانات جامبىلوۆا.

ونىڭ ايتۋىنشا، اقىننىڭ ادەبي مەموريالدىق مۋزەيى الماتى وبلىسىنىڭ جامبىل اۋدانىنداعى جامبىل اۋىلىندا ورنالاسقان. ال اتىراۋداعى كورمەگە قويىلعان كونە جادىگەردىڭ ءبىرى – جامبىل اقىننىڭ جاس كەزىندە ۇستاعان دومبىراسى. ۇلتتىق اسپاپتىڭ شەگى ەشكىنىڭ ىشەگىنەن جاسالعان.

– قازىر اقىننىڭ ۇرپاقتارى الماتى وبلىسىندا تۇرادى. نەمەرەلەرىنىڭ ءبىرى – مەن جامبىل اتىنداعى ادەبي-مەموريالدى مۋزەيىنىڭ ديرەكتورى بولسام، شوبەرەسىنىڭ ءبىرى وسى مۋزەيدە قور ساقتاۋشىسى بولىپ جۇمىس ىستەيدى. ءبىز ءۇشىن اتامىزدىڭ ەڭ قۇندى جادىگەرى – دومبىراسى مەن شىعارماشىلىعى. اتامىز دومبىراسىن قولىنان تاستاماي، قازاقتىڭ ۇلتتىق اسپابى رەتىندە قادىر تۇتتى، – دەيدى سالتانات جامبىلوۆا.

قازاقستان جازۋشىلار وداعى اتىراۋ وبلىستىق فيليالىنىڭ ديرەكتورى قويشىعۇل جىلقىشيەۆتىڭ پىكىرىنشە، جامبىل اقىن قازاقتىڭ ۇلتتىق ونەرى – ايتىستى كەيىنگى ۇرپاققا جەتكىزىپ، كەڭىنەن ناسيحاتتاۋعا مول ۇلەس قوستى. سول سەبەپتەن اقىننىڭ شىعارماشىلىعى ءالى دە سان قىرىنان زەرتتەلۋى كەرەك.

اتىراۋ وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز