اتالعان شاراعا ۇيىتقى بولعان – قالا ءارحيۆى مەن پرەزيدەنت ءارحيۆى. قوس مەكەمە بىرلەسىپ قۇندى قۇجاتتار مەن تاريحي فوتوسۋرەتتەردى كوپشىلىككە ۇسىندى. قالا حرونولوگياسىنان سىر شەرتەتىن شەجىرەلى دەرەكتەر جيىلعان قاۋىمنىڭ ىستىق ىقىلاسىنا يە بولدى.
كورمە بارىسىندا نۇر-سۇلتان قالاسىنىڭ مەملەكەتتىك ءارحيۆى مەن پرەزيدەنت ءارحيۆى ارنايى دايىنداعان «يستوريا ستوليتسى نەزاۆيسيموگو كازاحستانا ۆ ارحيۆنىح دوكۋمەنتاح» قۇجاتتار جيناعىنىڭ تۇساۋكەسەر ءراسىمى ءوتتى. جيناقتا ەل استاناسىنىڭ الماتىدان اقمولاعا كوشىرىلۋ ناۋقانى, ونىڭ مەملەكەتتىڭ باستى ساياسي ورتالىعى رەتىندە قالىپتاسۋ كەزەڭى كورسەتىلگەن. سونداي-اق پرەزيدەنت ءارحيۆىنىڭ, ۇلتتىق ءارحيۆتىڭ, نۇر-سۇلتان قالاسى مەملەكەتتىك ءارحيۆىنىڭ جانە ورتالىق مەملەكەتتىك كينو-فوتوقۇجاتتار جانە دىبىس جازبالارى ءارحيۆىنىڭ قۇجاتتارى جيناقتالعان.
اشىلۋ سالتاناتىندا ءسوز العان پرەزيدەنت ءارحيۆىنىڭ ديرەكتورى ءاليا مۇستافينا بۇل باسىلىمدا ەلوردانى كوشىرۋ كەزىندەگى جۇزەگە اسىرىلعان اۋقىمدى جوبالاردىڭ ناتيجەلەرى مەن اقمولا قالاسىنىڭ تاريحىنا قاتىستى ناقتى دەرەكتەردىڭ مول ەكەنىن اتاپ ءوتتى. ءارى وسى جيىندى وتكىزۋگە بىرلەسىپ اتسالىسقان قالالىق ارحيۆ ۇجىمىنا العىسىن ءبىلدىردى.
كورمەگە قاتىسۋشىلار 1832 جىلى اقمولا وكرۋگتىك بۇيرىعى شىققاننان باستاپ قازىرگى قازاقستان استاناسىنىڭ بۇگىنگە دەيىنگى تاريحىمەن تانىستى. ءىس-شارا استانا كۇنىنە وراي ۇيىمداستىرىلدى.
