ەۋرازيالىق ەكونوميكالىق وداق 2050 جىلى ىقپالدى بىرلەستىككە اينالادى

استانا. 28 ءساۋىر. مەملەكەت باسشىسى نۇرسۇلتان نازارباەۆ م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە ەۋرازيالىق ينتەگراتسيا تاقىرىبى بويىنشا جۇرگىزگەن دارىسىندە ەۋرازيالىق ەكونوميكالىق وداقتى 2050 جىلعا دەيىن الەمدەگى ينتەگراتسيالىق بىرلەستىكتەردىڭ الدىڭعى ۇشتىگىنە ەنگىزۋ قاجەتتىگىن ايتتى. بۇل تۋرالى «قازاقپارات» اگەنتتىگى حابارلادى. ءدارىس بارىسىندا مەملەكەت باسشىسى: «ەۋرازيالىق ەكونوميكالىق وداق اياسىنداعى ءبىزدىڭ ارىپتەستەرگە 2050 جىلعا قاراي الەمنىڭ 300 بىرلەستىگىنىڭ ىشىندە ەڭ مىقتى ينتەگراتسيالىق ۇيىمداردىڭ ۇشتىگىنە ەنۋ ماقساتىن قويۋدى ۇسىنامىن. قازىردىڭ وزىندە مەن مۇنداي ىقپالداستىقتىڭ تەك ءۇش-تورتەۋىن كورىپ وتىرمىن. بىزگە دە نەگە تالپىنباسقا؟ رەسەي ەكونوميكاسىنىڭ ءرولى وتە ماڭىزدى. سوندىقتان ءبىزدىڭ بىرلەستىكتىڭ دامۋى ەكونوميكالىق پراگماتيزم, جاۋاپكەرشىلىك, ەۆوليۋتسيالىق, اشىقتىق شەڭبەرىندە جۇرگىزىلۋى ءتيىس», – دەدى. بۇدان كەيىن نۇرسۇلتان نازارباەۆ ءسوزىن ساپتاي كەلە, ارىپتەستەرىنە قازاقستاننان ۇلگى الۋدى ۇسىندى. «قازاقستاندا 2050 جىلعا دەيىنگى جاڭا ستراتەگيالىق باعدارلاما ىسكە اسىرىلۋدا. ونىڭ الدىندا بىزدە 2030 جىلعا دەيىنگى باعدارلاما مەرزىمىنەن بۇرىن جۇزەگە استى. ەندى ءبىز عاسىردىڭ ورتاسىندا الەمنىڭ دامىعان 30 ەلى قاتارىنا قوسىلۋدى ماقسات ەتىپ وتىرمىز. بۇل ارمان-قيال ەمەس. بۇل باعدارلاما تولىعىمەن قارجىمەن, ماماندارمەن جانە جوبالارمەن قامتاماسىز ەتىلەدى. ءبىز وسى ماقساتقا تاۋەلسىز, ەۋرازيالىق ەكونوميكالىق كەڭىستىكتىڭ تولىققاندى مۇشەسى رەتىندە قول جەتكىزۋدى كوزدەپ وتىرمىز. ءبىزدىڭ بارلىعىمىز الدىمىزعا وسىنداي جوعارى ماقساتتاردى قويۋىمىز كەرەك», – دەدى نۇرسۇلتان نازارباەۆ. جولدىباي بازار. دەرەككوز: «قازاقپارات». فوتو: Liter.kz.