«سيرەك كەزدەسەتىن جانە قۇرىپ بارا جاتقان جانۋارلار ءتىزىمىنىڭ مەملەكەتتىك عىلىمي-تەحنيكالىق نەگىزدەمەسى قازاقستانداعى بيولوگيالىق رەسرۋرستاردى ءتيىمدى باسقارۋعا جاعداي تۋعىزادى», دەپ جازادى رومان سكليار ءوزىنىڭ جاۋابىندا.
ونىڭ ايتۋىنشا, ومىرتقالى جانە ومىرتقاسىز جانۋارلاردىڭ سيرەك كەزدەسەتىن تۇرلەرىنىڭ جاعدايىنا باعا بەرۋ ءۇشىن عىلىمي-تەحنيكالىق باعدارلاما ازىرلەندى. ونى عىلىم جانە جوعارى ءبىلىم مينيسترلىگى قارجىلاندىرادى دەپ جوسپارلانىپ وتىر.
«جوعارى عىلىمي-تەحنيكالىق كەڭەس ماقۇلداعان جاعدايدا بۇل باعدارلاما اياسىندا قازاقستاننىڭ قىزىل كىتابىنا رەۆيزيا جاسالادى. سونىڭ نەگىزىندە مازمۇنى جاڭارتىلىپ, قىزىل كىتاپقا ارنالعان ۋەب-پورتال قۇرىلادى. ول پورتالدا سيرەك كەزدەسەتىن جانە قۇرىپ بارا جاتقان جانۋارلار تۋرالى مالىمەت تولىققاندى بەرىلەدى. اتالعان شارالاردىڭ ءبارىن ىسكە اسىرۋ ءۇشىن قولدانىستاعى زاڭناماعا اڭشىلىق جانە جانۋارلاردى ساقتاۋ جونىندە ءتيىستى وزگەرىستەر ەنگىزىلەدى», دەپ جازىلعان جاۋاپتا.
