پرەزيدەنت ن.نازارباەۆ: «كەڭەس وداعى قايتا قۇرىلمايدى»

استانا. 28 ءساۋىر. بۇگىن ەلباسى نۇرسۇلتان نازارباەۆ م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە سويلەگەن سوزىندە كەڭەس وداعىنىڭ قايتا قۇرىلۋى مۇمكىن ەمەستىگىن اتاپ ءوتتى. بۇل تۋرالى «24 KZ» تەلەارناسى حابارلادى. «قازىرگى كەزدە ەۋرازيالىق ەكونوميكالىق وداق تۋرالى اڭگىمە بولا قالعان جاعدايدا كەيبىر ساراپشىلار مەن ساياساتكەرلەر ماسەلەنىڭ مانىسىنە بارماي جاتىپ, بولاشاقتا كەڭەس وداعىنىڭ قايتا قۇرىلۋى مۇمكىن ەكەنىن ايتىپ,  قوعامدىق پىكىر قالىپتاستىرۋدا. مەنىڭشە, بۇل قاتە پىكىر جانە قازىرگى ءبىزدىڭ قۇرىپ جاتقان ەكونوميكالىق وداقتىڭ ماقساتىنا مۇلدەم كەلمەيدى», - دەدى پرەزيدەنت. وسىعان دالەل رەتىندە پرەزيدەنت مىناداي مىسالدار كەلتىردى. «بىرىنشىدەن, بۇگىنگى تاڭدا كەڭەستىك قوعامدىق جۇيەنى قۇرۋ ءۇشىن ينستيتۋتسيونالدىق بازا جوق. ەكىنشىدەن, پوستكەڭەسىك كەڭىستىكتەگى حالىقتار وزدەرىنىڭ داستۇرلەرى مەن ەرەكشەلىكتەرىنە ساي مەملەكەتتەرىن قۇرىپ العان. ۇشىنشىدەن, قازىرگى جەكەمەنشىك جۇيەسى, الەۋمەتتىك قۇرىلىمدار مەن قوعامنىڭ ەكونوميكالىق سالالارى كەڭەستىك ارحايكادان الدەقاشان ۇزاپ كەتكەن», - دەدى ول. سونىمەن بىرگە ەلباسى الەمدىك ساياساتكەرلەردىڭ   وڭىرلىك ينتەگراتسيالىق جوبالاردىڭ ىشىندە ەۋرازيالىق ەكونوميكالىق وداقتىڭ قۇرىلۋىنا سىن كوزبەن قارايتىندارىن دا جاسىرمادى. كەزدەسۋدە پرەزيدەنت بۇعان تۇسىنىستىكپەن قارايتىنىن, ويتكەنى, ەۋرازيالىق ەكونوميكالىق وداق بولاشاقتا باسقا دا الەمدىك ينتەگراتسيالىق بىرلەستىكتەرگە باسەكەلەس بولاتىنىن, سول ءۇشىن كەيبىر ەلدەر ەەو-تىڭ قۇرىلۋىنان سەسكەنەتىنىن اتاپ ءوتتى. داستان كەنجالين. دەرەككوز: «24 KZ». فوتو: www.e1.ru.