الەم • 03 شىلدە، 2022

ىندەت قايتا ءورشىدى

108 رەت كورسەتىلدى

الەمدە COVID-19 ينفەكتسياسى قايتا ءورشىدى. ۇلتتىق ستاتيس­تيكا باسقارماسىنىڭ (ONS) سوڭعى مالىمەتتەرىنە سۇيەنسەك، اسىرەسە ۇلىبريتانيادا ىندەت جۇقتىرعاندار سانى ايتارلىقتاي ارتقان.

سوڭعى مالىمەتتەر بويىنشا ۇلىبريتانيادا شامامەن 2،3 ميلليون ادام نەمەسە ءاربىر 30-شى ادام ۆيرۋس جۇقتىرعان. بۇل ءبىر اپتا بۇرىنعى كورسەتكىشتەن 32 پايىزعا كوپ. دەرتكە شالدىققانداردان Omicron شتامىنىڭ قوسالقى BA.4 جانە BA.5 نۇسقالارى انىقتالعان. «بۇل جاڭا ەكى نۇسقانىڭ تارالۋى وتە جىلدام»، دەيدى ينفەكتسيونيست ماماندار.

ماۋسىمنىڭ سوڭعى اپتاسىندا ONS انگليا مەن ۋەلستە ءاربىر 30-شى، سولتۇستىك يرلانديادا ءاربىر 25-ءشى، شوتلانديادا ءاربىر 18-ءشى ادام ىندەت جۇقتىرعانىن حابارلادى. ۇلتتىق ستاتيستيكا باسقارماسىنىڭ قىزمەتكەرى سارا كروفتس: «بۇكىل ۇلىبريتانيادا ءبىز BA.4 جانە BA.5 نۇسقالارىنىڭ وسۋىنە ىقپال ەتكەن جارتى ميلليوننان استام ينفەكتسيانىڭ تۇراقتى ءوسۋىن كورىپ وتىرمىز»، دەپ مالىمدەدى ەلدىڭ باق وكىلدەرىنە. سونىمەن قاتار ول اتالعان جاڭا ينفەكتسيالار ەلدىڭ بارلىق ايماقتارىندا جانە بارلىق جاس توپتارىندا ءوسىپ جاتقانىن ايتتى.

دارىگەرلەر بولسا ءالى دە ۆاك­تسينا الماعانداردى، اسىرەسە 75 جاستان اسقان تۇرعىنداردى كوۆيد-19-عا قارسى ەكپە الۋعا شاقىرىپ وتىر. دارىگەرلەر ىندەتتى ەڭسەرۋدىڭ بىردەن-ءبىر جولى ۆاكتسينا ەكەنىن ايتادى. «الايدا ىندەت تۇبەگەيلى جويىلىپ كەتپەگەنىن ءبىلىپ وتىرسا دا ادامداردىڭ ءبىرازى ءالى دە ەكپە الۋعا قارسى» دەپ مالىمدەدى ولار.

BBC مالىمەتى بويىنشا انگ­ليادا 30 ماۋسىمدا اۋرۋحاناعا 9 مىڭعا جۋىق كوۆيد پاتسيەنتى ورنا­لاس­تىرىلعان، ال شىلدەنىڭ ءۇش كۇ­نىندە ولاردىڭ سانى ەكى ەسەگە وسكەن. ساراپشىلار ۇلىبري­تا­نيانىڭ قالعان بولىگىنەن الىنعان دەرەكتەر از بولعانىمەن، وسى ايدا ىندەتتى جۇقتىرۋ كۇرت ءوسۋى مۇمكىن دەپ بولجاپ وتىر. الاي­دا مەديتسينا ساراپشىلارى قا­زىرگى ۋاقىتتا اۋرۋحانالارداعى كو­ۆيدپەن اۋىراتىنداردىڭ سانى 2021 جىلدىڭ قاڭتارىندا كورو­ناۆيرۋستىڭ الفا تولقىنى كە­زىندەگى 34 مىڭنان استام رەكورد­تىق كورسەتكىشىنەن الدەقايدا تومەن ەكەنىن ايتادى. «كوۆيدكە وڭ ناتيجە كورسەتكەن اۋرۋحاناداعى ناۋقاستاردىڭ بارلىعى ەمدەل­مەيدى، كەيبىرەۋلەرى باسقا سەبەپ­تەرمەن جاتىر، بۇل ولارعا كۇتىم جاساۋدى قيىنداتىپ وتىر»، دەيدى لوندون ورتالىق اۋرۋحاناسىنىڭ باس دارىگەرى. بۇل قازىر اۋرۋحانادا جاتقان ناۋقاستاردىڭ شامامەن ۇشتەن ەكىسىنە قاتىستى. انگليادا جانساقتاۋ بولىمىندە جاتقان كوۆيد پاتسيەنتتەرىنىڭ سانى ماۋسىم ايىنىڭ باسىندا 111-دەن 211-گە جەتكەن. ستاتيستيكالىق مالىمەتتەرگە كوز جۇگىرتسەك، 2021 جىلدىڭ قاڭتارىندا جانساقتاۋ بولىمشەلەرى تولعان كەزدە 3 700-دەن استام ادام وسىنداي كومەككە مۇقتاج بولعان.

دەنساۋلىق ساقتاۋ قىز­مەت­كەرلەرى سوڭعى التى اي ىشىندە ەكپە الماعان 75 جاستان اسقان كەز كەلگەن ادامعا كوۆيد دەرتىنەن جانە گوسپيتاليزاتسيادان قورعانۋ ءۇشىن ۆاكتسينا الۋ قاجەتتىگىن ەسكەرتىپ وتىر. ۇلىبريتانيانىڭ دەنساۋلىق ساقتاۋ قاۋىپسىزدىگى اگەنتتىگىنىڭ (UKHSA) كلينيكالىق باعدارلامالار ديرەكتورى مەري رەمسي وسى جاستاعى تۇرعىنداردىڭ شامامەن 16 پايىزى ءالى ۆاكتسينا الماعانىن ايتادى. ول سونداي-اق ادامداردىڭ باسقالارمەن ارالاسقان كەزدە قاۋىپسىزدىك ەرەجەلەرىن ساقتاۋ قاجەتتىگىن ەسكەرتەدى. ويتكەنى، «قازىر ادامدار بوساڭسىپ، اۋرۋدى مۇلدەم ەسىنەن شىعارعان، سوندىقتان ولار قوعامدىق جەرلەردە، جابىق عيماراتتا بەتپەردە كيگەندەرى دۇرىس. ەگەر سىزدە رەسپيراتورلىق ينفەكتسيانىڭ بەلگىلەرى بولسا، سونداي-اق جوعارى تەمپەراتۋرا نەمەسە ءوزىڭىزدى ناشار سەزىنسەڭىز، ۇيدە نەمەسە باسقا ادامداردان، اسىرەسە ەگدە نەمەسە وسال توپتاعى ادامداردان الىس بولۋعا تىرىسىڭىز»، دەدى دوكتور رەمسي. سونىمەن قاتار UKHSA-نىڭ كوۆيد بويىنشا باس مەديتسينالىق كەڭەسشىسى، دوكتور سيۋزان حوپكينس، BBC-گە: «مەنىڭ ويىمشا، بۇل سۋىق تيۋدەن وزگە نارسە، ويتكەنى ادامدار 10 كۇنگە دەيىن اۋىرادى، دەرتتىڭ بەلگىلەرى بولعان كەزدە ناۋقاس باسقا ادامداردان اۋلاق بولۋى كەرەك. ءتۇرلى فەستيۆال، ءىس-شارالارعا بارۋدان باس تاتقان ءجون، ويتكەنى بۇل بارلىق جەرلەردە ينفەكتسيا قاۋپىن ارتتىرادى»، دەدى. ال لەستەر ۋنيۆەرسيتەتىنىڭ ۆيرۋسولوگ دارىگەرى دجۋليان تانگتىڭ ايتۋىنشا، دەرتتىڭ قازىرگى ەكى جاڭا قوسالقى نۇسقاسى وزگەلەرگە قاراعاندا كوبىرەك پروبلەما تۋدىرۋى مۇمكىن. «جاز ايلارىندا اۋرۋحاناعا جاتىپ ەمدەلەتىن ناۋقاستاردىڭ سانى ارتۋى مۇمكىن، اسىرەسە ۆاكتسينا الماعاندار، سونىمەن قاتار ۆاكتسيناسى مەن تابيعي يممۋنيتەتى السىرەگەن ادامدار كوپ زارداپ شەگۋى مۇمكىن»، دەدى دارىگەر.

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار