الماتى قالالىق توتەنشە جاعدايلار دەپارتامەنتىنىڭ مالىمەتىنشە, تۇنگى 03:10 شاماسىندا ءورت ءسوندىرۋ بريگاداسى «باقوردا» بازارى اۋماعىندا ورنالاسقان قۇرىلىس زاتتارىن ساتاتىن ساۋدا ورنىنا جوعارى رانگ بويىنشا شىقتى.
«وقيعا ورنىنا 8 مينۋتتا جەتكەن ءورت سوندىرۋشىلەر شاتىر استىنا قاتارلاپ كەسىلگەن اعاش ماتەريالدارىنىڭ اشىق جالىنمەن جانىپ جاتقانىن انىقتادى. قىزىل جالىن «باقوردا» ساۋدا ورتالىعىنا تارالۋ قاۋپى تۋىندادى. دەرەۋ ءورت ورنىندا جەدەل شتابتىڭ جۇمىسى باستالدى, ونىمدىلىگى جوعارى ءورت وقپاندارى ەنگىزىلدى, ءورت اۆتوپوەزى ىسكە قوسىلىپ, ۇيىندىلەردى الىپ تاستاۋ ءۇشىن قۇتقارۋ قىزمەتىنىڭ اۋىر-شىنجىر تاباندى تەحنيكاسى تارتىلدى», دەپ حابارلادى دەپارتامەنتتەن.
قابىلدانعان جەدەل شارالارمەن ءتىلسىز جاۋ ءبىر ساعات ىشىندە وقشاۋلانىپ, جالپى اۋدانى 2 مىڭ شارشى مەتردى شارپىعان ءورت تاڭعى 06:35-تە تولىعىمەن ءسوندىرىلدى.
ءورتتى سوندىرۋگە 21 بىرلىك تەحنيكا مەن جەكە قۇرامنان 64 ادام جۇمىلدىرىلدى.
قازا بولعاندار مەن زارداپ شەككەندەر جوق.
قازىرگى ۋاقىتتا ءورتتىڭ شىعۋ سەبەبى انىقتالۋدا.
