ۇكىمەت • 01 شىلدە، 2022

وتاندىق كاسىپكەرلەر كەڭەسىنىڭ وتىرىسى جاڭا فورماتتا ءوتتى

قر پرەمەر-ءمينيسترى ءاليحان سمايىلوۆ مەملەكەت باسشىسىنىڭ تاپسىرماسى بويىنشا قۇرىلعان وتاندىق كاسىپكەرلەر كەڭەسىنىڭ وتىرىسىن جاڭا فورماتتا وتكىزدى، دەپ حابارلايدى Egemen.kz.

گاۋھار قاپاش

ۇكىمەت ءباسپاسوز قىزمەتىنىڭ مالىمەتىنشە، وتىرىستىڭ كۇن تارتىبىنە ەكونوميكا جانە كولىك ساياساتى ماسەلەلەرى شىعارىلعان. كۇن تارتىبىندەگى ءبىرىنشى ماسەلە بويىنشا ۇلتتىق ەكونوميكا ءمينيسترى الىبەك قۋانتىروۆ ەكونوميكالىق ساياسات جوباسىن تانىستىردى. جاڭا ساياساتتىڭ نەگىزگى مىندەتى – بارلىق ەكونوميكالىق اگەنتتەردىڭ الەۋەتىن بارىنشا اشۋعا، الەۋمەتتىك تەڭدىكتى قامتاماسىز ەتۋگە جانە كاسىپكەرلىك ارقىلى نارىققا ساي كىرىستەردى بولۋگە، ادال باسەكەلەستىكتى كوتەرمەلەۋگە جانە قورعاۋعا باعىتتالعان دامۋدىڭ اشىق جانە ەركىن مودەلىن قۇرۋ.

«بۇل قۇجاتتىڭ نەگىزگى ماقساتى – ازاماتتارىمىزدىڭ ءال-اۋقاتىن ارتتىرا وتىرىپ، تۇراقتى الەۋمەتتىك-ەكونوميكالىق دامۋدى قامتاماسىز ەتۋ»، دەدى ءاليحان سمايىلوۆ.

سونىمەن قاتار پرەمەر-مينيستر بيزنەس-قوعامداستىق وكىلدەرىن قۇجاتتى تولىقتىرۋ بويىنشا ءوز ۇسىنىستارىن ەنگىزۋگە شاقىردى. كۇن تارتىبىندەگى ەكىنشى ماسەلە بويىنشا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ بايانداما جاسادى. ول بۇگىنگى تاڭدا تەمىرجول جۇك تاسىمالى، اۆتوموبيل جانە تەڭىز كولىگى، سونداي-اق اۋە تاسىمالى بويىنشا مەملەكەتتىڭ جۇيەلى دامۋ شارالارىن قابىلداپ جاتقانىن حابارلادى. وتىرىس بارىسىندا «AUDACIA Express» جشس ديرەكتورى باقىتبەك قادىروۆ جانە «DALA» كومپانيالار توبىنىڭ نەگىزىن قالاۋشى بولاتبەك ناجىمەتدەن ۇلى ءسوز سويلەپ، جۇك تاسىمالداۋ سالاسىنداعى پروبلەمالىق ماسەلەلەردى كوتەردى.

ۇكىمەت باسشىسى وتىرىستى قورىتىندىلاي كەلە، ۇلتتىق ەكونوميكا مينيسترلىگىنە ەكونوميكالىق ساياسات بويىنشا ازىرلەنىپ جاتقان تاسىلدەردە بيزنەستىڭ بارلىق ۇسىنىستارىن ەسكەرۋدى جانە بىرلەسىپ تالقىلاۋدى تاپسىردى.

يندۋستريا جانە ينفراقۇرىلىمدىق دامۋ مينيسترلىگىنە نەگىزسىز تالاپتاردى ازايتۋ جانە وسى سالانىڭ باسەكەگە قابىلەتىن ارتتىرۋ ماقساتىندا كولىك سالاسىنداعى بارلىق تالاپتى قايتا قاراۋ، سونداي-اق بيزنەس-قوعامداستىقپەن بىرلەسىپ، قازاقستاننىڭ كولىك دامۋ ستراتەگياسىنىڭ جوباسىن ساپالى ازىرلەۋدى قامتاماسىز ەتۋ تاپسىرىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز