قوعام • 01 شىلدە، 2022

قتج قازاقستاندىق كەمەنىڭ ۋكراينا استىعىن تاسىمالداۋ سەبەبىن ءتۇسىندىردى

«قازاقستان تەمىر جولى» ۇلتتىق كومپانياسى قازاقستاندىق «جىبەك جولى» كەمەسىمەن ۋكراينادان استىق ەكسپورتتالىپ جاتقانىنا قاتىستى پىكىر ءبىلدىردى، دەپ حابارلايدى Egemen.kz.

گاۋھار قاپاش

كەشە بىرقاتار باسىلىمدا قازاقستاندىق «جىبەك جولى» كەمەسىمەن بەرديانسك تەڭىز ساۋدا پورتى ارقىلى ۋكراينادان استىق ەكسپورتتالاتىنى تۋرالى اقپارات جاريالاندى.

«KTZ Express» اق 2021 جىلعى 26 قازاندا «KTZ Express Shipping» جشس رەسەيلىك Green Line LLC كومپانياسىمەن بەربوۋت-چارتەر شارتىن جاساسقانىن تۇسىندىرەدى.

ونىڭ ىشىندە مىناداي شارتتار بار:

- دەدۆەيتى 7000 توننا «جىبەك جولى» كەمەسى ءۇشىنشى تۇلعالارعا بەرۋ قۇقىعىنسىز بەرىلدى (2016 جىلى نەۆسكي كەمە جاساۋ جانە جوندەۋ زاۋىتىنان ساتىپ الىندى);

- 2022 جىلدىڭ 30 قاراشاسىنا دەيىن جارامدى;

- حالىقارالىق تاجىريبەگە سايكەس سانكتسيالىق تارماق بار: «Green Line» جاۋاپكەرشىلىگى شەكتەۋلى سەرىكتەستىگى كەلىسىم-شارت جاساسقان كۇنى جانە ارەكەت ەتۋ مەرزىمى ىشىندە ولارعا ەشقانداي سانكتسيالار قولدانىلمايتىنىنا كەپىلدىك بەرەدى. ايتپەسە، كەمە يەسى كەلىسىمشارتتى دەرەۋ بۇزۋعا قۇقىلى.

ايتا كەتەيىك، «Green-Line» جشس جانە ونىڭ باسشىلىعى (شەپين ا.ۆ.، تيحوميروۆا م.ۆ.) اقش، ەو، ۇلىبريتانيا جانە كانادانىڭ سانكتسيالىق تىزىمىنە ەنبەگەن. تاجىريبەگە جانە جاسالعان شارتتارعا سايكەس جالعا الۋشى جۇكتىڭ ءتۇرى مەن ونى تاسىمالداۋ باعىتتارى بويىنشا كەمە يەسىمەن كەلىسپەيدى.

«Green-Line» جاۋاپكەرشىلىگى شەكتەۋلى سەرىكتەستىگى 1999 جىلدان بەرى استىق جانە مۇناي ترەيدەرى رەتىندەگى ەستونيالىق Mangelbert OU كومپانياسىمەن ۋكراينادان تۇركياعا استىق تاسىمالداۋ قىزمەتىن كورسەتۋگە ۇزاقمەرزىمدى كەلىسىمشارتقا وتىردى. Mangelbert OU باسشىسىنىڭ ايتۋىنشا، 2022 جىلدىڭ 28 ماۋسىمىندا «جىبەك جولى» كەمەسى بەرديانسك تەڭىز ساۋدا پورتىندا (6 927،8 توننا) بيداي تيەپ، پورتتان تۇركيانىڭ قاراسۋ پورتى باعىتىندا شىقتى (بولجالدى ۋاقىت بويىنشا كەمەنىڭ كەلۋى - 1 شىلدە).

سونىمەن قاتار استىقتىڭ ۋكرايندىق ەكەنى، ال تاسىمالداۋ ۋكراينالىق تاراپتىڭ ءوتىنىشى بويىنشا كەلىسىلگەن گۋمانيتارلىق ءدالىز بويىنشا جۇزەگە اسىرىلاتىنىنا سەنىمدى.

بۇل رەتتە «KTZ Express» اق وسى تاسىمالداۋعا قاتىسۋشىلارمەن، سونىمەن بىرگە ديپلوماتيالىق ميسسيا وكىلدەرىمەن بەلسەندى كونسۋلتاتسيالار جۇرگىزەدى. «KTZ Express» اق قولدانىستاعى سانكتسيالىق شەكتەۋلەردى قاتاڭ ساقتاۋعا مىندەتتى ەكەنىن جەتە تۇسىنەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز