ESG كلۋبىنىڭ مۇشەلەرى تۇراقتى دامۋ ماقساتتارىنا قول جەتكىزۋگە, ەنەرگيا تيىمدىلىگىن ارتتىرا وتىرىپ قورشاعان ورتاعا كەلەر زالالدى بارىنشا ازايتۋعا, ەڭبەك جاعدايلارىن جاقسارتۋعا جانە ادام قۇقىقتارىن ساقتاۋعا, سونداي-اق ESG سالاسىنداعى ۇزدىك تاجىريبەلەردى تاراتۋعا ىقپال ەتۋدى كوزدەيدى.
ESG كلۋبىن قۇرۋ تۋرالى كەلىسىمگە قول قويۋ ءراسىمى Astana Finance Days ءداستۇرلى قارجى كونفەرەنتسياسى اياسىندا ءوتتى. باسقوسۋ بارىسىندا كونفەرەنتسياعا قاتىسۋشىلار ESG قاعيداتتارىن ەنگىزۋدى قولداۋدىڭ زاماناۋي ترەندتەرىن, سىن-تەگەۋرىندەرى مەن شارالارىن جان-جاقتى تالقىلادى.
رەيتينگتىك اگەنتتىكتەردىڭ ءادىسناماسىنا سايكەس كومپانيانىڭ ESG قىزمەتىن انىقتايتىن جانە ەكولوگيا, الەۋمەتتىك جاۋاپكەرشىلىك پەن ءتيىمدى كورپوراتيۆتىك باسقارۋ سالالارىن قامتيتىن 70 ءبولىمى بار. ال قارجى نارىقتارىندا ەميتەنتتەرى جەكە كومپانيالار دا, مەملەكەتتەر دە بولىپ تابىلاتىن وسى قىزمەتتى جاقسارتۋعا باعىتتالعان وبليگاتسيالار شىعارىلىمىنىڭ ءوسۋى بايقالعان.
سونداي-اق كونفەرەنتسيادا ESG كومپانيالارىنىڭ قىزمەتىن قارجىلىق ىنتالاندىرۋدىڭ ىقتيمال تەتىكتەرى تۋرالى ءسوز بولىپ, الەمدىك پراكتيكادان مىسالدار كەلتىرىلدى. اتاپ ايتقاندا, ESG كۇن تارتىبىنە بايلانىستى ماسەلەلەردى شەشۋگە باعىتتالعان جوبالاردى نەمەسە باعدارلامالاردى جەڭىلدىكپەن قارجىلاندىرۋ ارقىلى كومپانيالاردىڭ ESG قىزمەتىن ىنتالاندىرۋ مۇمكىندىگى ارتپاق. بۇل تۇستا كومپانيالاردىڭ تۇراقتى دامۋ دەڭگەيىن ارتتىرۋعا عانا ەمەس, ESG باستامالارىن ىسكە اسىرۋ ارقىلى وڭىرلەردىڭ ەكونوميكالىق دامۋىنا ىقپال ەتەتىن فيسكالدىق ىنتالاندىرۋدى قولدانۋ مۇمكىندىگى دە كەڭەيمەك.
كومپانيا وكىلدەرىنىڭ ايتۋىنشا, «التىنالماس» ESG قاعيدالارىن ەنگىزۋ بويىنشا بەلسەندى جۇمىس جۇرگىزە وتىرىپ, بيىلعى جىلى ESG جوعارى رەيتينگتىك باعاسىن الۋعا نيەتتى.
جاڭا ۇيىمنىڭ سەرىكتەستەرى قاتارىندا – «استانا حالىقارالىق قارجى ورتالىعىنىڭ اكىمشىلىگى» اق, «قازاقستان قور بيرجاسى» اق, ەۋرازيالىق دامۋ بانكى, Green Technology Hub, «ەكونوميكالىق زەرتتەۋلەر ينستيتۋتى» اق, «ESG ۇلتتىق تۇراقتى دامۋ وداعى» زتب جانە قازاقستاننىڭ قارجى جانە ونەركاسىپ سەكتورلارىنىڭ باسقا دا كاسىپورىندارى بار.
